Bu gün 3 iyun 2024, Bazar ertəsi (İlin 23. həftəsi); bu an saat 20:37 UTC

14. Həftə

Vikipediya məqalələrindən

• Ankarada yerləşən Anıtqəbir mavzoleyi 1941-ci ildə Türkiyə Hökümətinin keçirdiyi layihə müsabiqəsi nəticəsində 48 digər layihə arasından seçilmiş memarlar Emin Onat və Əhməd Orxan Ardanın birgə layihəsi əsasında inşa edilmişdir.
• 743-744 illərdə inşa edilmiş Şamaxı Cümə məscidi Cənubi Qafqazda Dərbənd cümə məscidindən sonra ən qədim məsciddir.
• Mexaniki reduktor fırlanma momentini bir və ya bir neçə mexaniki ötürmənin köməyi ilə ötürən və çevirən mexanizmdir.
• Qadınlar arasında şahmat üzrə ilk dünya çempionu Vera Mençik ikinci dünya müharibəsi zamanı 1944-cü il iyunun 27-də Londonun bombardımanı zamanı həlak olmuşdur.
• Şimal Torpağı arxipelağının mərkəzi hissəsində yerləşən Oktyabr İnqilabı adası Bolşevik adasından Şokalski boğazı, Komsomoles adası və Pioner adasından Qırmızı Ordu boğazı vastəsi ilə ayrılır.
  

bax – müzakirə et – –

15. Həftə

Vikipediya məqalələrindən

• Seul şəhərində yerləşən və tərk edilmiş "Yongma Land" (şəkildə) əyləncə parkı K-pop müğənniləri və qrupları tərəfindən tez-tez çəkiliş məkanı kimi istifadə olunur.
• Türkiyə dələduzu Sülün Osman 1950–1960-cı illərdə tramvay, Qalata qülləsi, şəhər meydanlarındakı saatlar, şəhər xətləri və dəniz paroxodları kimi dövlət mülklərini insanlara satmış və ya kirayəyə vermişdir.
• Azərbaycanda qeydə alınmış sonuncu Turan pələngi ovu 1932-ci ildə Göytəpədə qeydə alınmış, dişi və erkək pələng ovlanmışdır.
• Estonəsilli keçmiş sumoçu Baruto Kayto öz döyüş adını Baltik dənizinin yapon dilindəki səslənişindən (Baruto) götürmüşdür.
• Buddist keşişi Soen Şaku 1905–1906-cı illərdə ABŞ-də Zen buddizminə dair mühazirələr vermiş və ABŞ-də Zen meditasiyası təşkil edən ilk şəxs olmuşdur.

bax – müzakirə et – –

16. Həftə

Vikipediya məqalələrindən

• Lutsk şəhərində yerləşən Böyük sinaqoq (şəkildə) İkinci Dünya müharibəsinə qədər şəhərin yəhudi icmasının dini və mədəni mərkəzi olsa da, hazırda idman zalı kimi istifadə olunur.
• Kaqava prefekturasının Kotohira qəsəbəsində yerləşən Böyük Konpira teatrı Yaponiyanın ən qədim kabuki teatrıdır.
• Yuqoslaviya krallığının Yaponiyadakı ilk fəxri konsulu olmuş Eyiçiro Ueyama Yuqoslaviyada geniş yayılmış çoxillik qızçiçəyinin ekstraktı əsasında ağcaqanad qovucu sarğac ixtira etməsinə görə tanınır.
• Dünyada püstəyə həsr olunmuş ilk və yeganə muzey olan Qaziantep Püstə Muzeyinin binası püstə formasında dizayn edilmişdir.
• Şima ispan kəndində Altamira mağarasının replikası və Pireney dağlarına əsaslanan "Pireney" amerikan təpələri attraksionu yaradılmışdır.

bax – müzakirə et – –

17. Həftə

Vikipediya məqalələrindən

• Azərbaycan polyaklarından olan mexanik və mesenat Vitold Zqlenitski xeyriyyəçilik fəaliyyətlərinə görə Bakıda Polşalı Nobel kimi tanınırdı.
• Behbud Mustafayev Roma-Katolik kilsəsi tarixində katolik din xadimi olan ilk azərbaycanlıdır.
• Hyu Qlass (şəkildə) qrizli ayısı tərəfindən hücuma məruz qalmasına baxmayaraq 200 mil (320 km) məsafə qət edərək, sağ qalmağı bacarmışdır.
• XX əsrdə Amerikada kommunistlərə qarşı Qırmızı təhlükə təbliğatı aparılmışdır.
• Edqar Allan Ponun hekayəsi əsas obrazın London küçələrində tanımadığı bir nəfəri təqib etməsindən bəhs edir.
• 1930-cu illərin əfsanəvi mafiya rəhbərlərindən olan Al Kapone bir müddət Kaliforniya ştatının, San Fransisko şəhərində yerləşən Alkatraz həbsxanasında saxlanılmışdır.
• Rus mistik Qriqori Yefimoviç Rasputinin ölümündən sonra evində tapılmış məktublarında sui-qəsd yolu ilə öldürüləcəyini yazmışdır.

bax – müzakirə et – –