Tahir Süleyman 1954-cü ildə Ermənistan SSR-nin Vedi rayonu tərkibindəkii Xalisa kəndində, bir kürd ailəsində anadan olmuşdur. O, Azərbaycanın paytaxtı Bakıda orta məktəbi bitirdikdən sonra Azərbaycan Dövlət Pedaqoji Universitetində Azərbaycan dili fakültəsinə qəbul olmuş və 1980-ci ildə oranı bitirmişdir. Universiteti bitirdikdən sonra Ermənistana qayıtmış, Vedi rayonunda bir orta məktəbdə kürd və Azərbaycan dillərini tədris etməyə başlamışdır. 1988-ci ildə Tahir Süleyman ailəsi ilə birlikdə Ermənistandan deportasiya edilmişdir. O, Bakıda məskunlaşmış, həmin vaxtdan jurnalist kimi fəaliyyət göstərir. Evlidir, bir oğlu var.

Tahir Süleyman 2003-cü ildə "Diplomat" həftəlik qəzetini təsis etmişdir. Qəzet kürd, Azərbaycan, rus və türk dillərində çap olunurdu. Burada Kürdüstan Fəhlə Partiyasının (PKK) liderləri Murad Karayılan və Abdullah Öcalana dəstək verən yazılar dərc olunmuşdur. Tahir Süleyman özü Abdullah Öcalanı "milli azadlıq hərəkatının rəhbəri" adlandırmışdır. O, zaman-zaman İraqa gedərək, oradakı İraq Kürdüstanı iqtidarı ilə görüşlər keçirmişdir. Tahir Süleyman Azərbaycan mətbuatında dəfələrlə separatizmlə məşğul olmaqda ittiham edilmişdir. Buna baxmayaraq, PKK ilə bir əlaqəsi olmadığını demişdir. 2008-ci ildə qəzetin təsisçisi Tahir Süleymanın "ölkə Türkiyənin gününə salına bilər" ifadələri səbəbilə qəzetin Azərbaycan nəşriyyatında çapı dayandırılmış, Tahir Süleyman isə qəzetini dərc etmək üçün Gürcüstanın paytaxtı Tblisi şəhərinə getməyə məcbur olmuşdur.