San-Marino Avroviziya Mahnı Müsabiqəsinə ilk dəfə 2008-ci ildə qoşulmuş və ümumilikdə 9 dəfə müsabiqədə iştirak etmişdir. O, müsabiqədə iştirak etmiş 50-ci ölkə olmuşdur. Lakin müsabiqənin ən kiçik ölkəsi üçün Avroviziyada debüt uğurlu alınmamışdır. Miodio qrupu yarımfinalda sonuncu yeri tutaraq finala adlaya bilməmişdir. Bunun ardınca San-Marino növbəti müsabiqələrdə iştirakdan imtina etmiş və iki illik fasilədən sonra 2011-ci ildə yenidən Avroviziyada iştirakını bərpa etdmişdir. Lakin ölkə təmsilçiləri növbəti üç il boyunca yenə də müsabiqənin finalına vəsiqə qazana bilməmişdir. San-Marino ilk dəfə Danimarkanın paytaxtı Kopenhagendə keçirilən 2014 Avroviziya Mahnı Müsabiqəsində Valentina Monettanın ifa etdiyi "Maybe" mahnısı ilə ölkəsini ilk dəfə Avroviziya finalına yüksəltmişdir. Bundan başqa Valentina Monetta San-Marinonu Avroviziyada 2012, 2013 və 2017-ci illərdə də təmsil etmişdir. İndiyədək San-Marinonun Avroviziyada əldə etdiyi ən yüksək nəticə 2019-cu ildə türk ifaçı Serhatın ifa etdiyi "Say Na Na Na" mahnısı ilə finalda 19-cu yeri tutması olmuşdur.