Moyka Zlobko Vayql arfa ifaçısı və Lyublyana Universiteti Musiqi Akademiyasının müəllimi olmaqla yanaşı, Sloveniya və həmçinin dünyada solo ifaçı və kamera musiqisi sahəsində tanınmış öncül musiqiçilərdən biridir.

O, 1991-ci ildə Lyublyanadakı Musiqi Akademiyasının məzunu olmuş və fəaliyyətinə solo arfa ifaçısı kimi Lyublyananın Milli Sloven Opera və Balet teatrının orkestrində başlamışdır. Lakin tezliklə bütün istedadını solo və kamera musiqisinə həsr etmək qərarına gəldi. Daha sonra o, Hamburqda professor Mariya Qrafın müəllimlik etdiyi Musiqi və Teatr Akademiyasında arfa ifası üzrə aspiranturanı bitirmişdir.

Tezliklə Moyka Zlobko geniş və müxtəlif məzmunlu repertuara malik tanınmış solo ifaçısına çevrildi. O, bir sıra bəstəkarları arfa ilə solo musiqisi, eləcə də müxtəlif alətlərlə səsləndirilən əsərlər yazmağa həvəsləndirmişdir. Bu əsərləri məhz özü tez-tez bütün dünyada öz konsertlərində müvəffəqiyyətlə ifa edir.

Solo ifaçı kimi o, çoxsaylı məşhur ansambllar, o cümlədən Berlin Simfonik Orkestri, Stokholm Kamera Orkestri, Hamburq Filarmoniyasının Kamera Orkestri, Leypsiq Simli Kvarteti, Ars Amata Sürix, Venesiyadakı Paduya Orkestri, Belqrad Filarmoniyası, Sarayevo Filarmoniyası, Kiyev Milli Kamera Orkestri və Zaqrebdəki Xorvat Kamera Orkestri, "Uiener Konsert Verein" və digər orkestrlərin müşayiəti ilə çıxış etmişdir. Moyka Zlobko Vayql daha çox Sloveniya Filarmoniyası və RTV Sloveniya Simfonik Orkestri ilə birgə solo ifaçı kimi çıxış etmişdir.

Kamera musiqisi ustası kimi o, bu cür ansambllarda çıxış etmiş, onun həm solo, həm də orkestrin müşayiəti ilə ifaları bir sıra radio və televiziya verilişlərində yayımlanmışdır. Moyka Zlobko Vayqlın bu günə qədər yeddi solo CD-si işıq üzü görmüşdür.

Musiqi bu qabaqcıl ifaçını bütün Avropa boyu səyahətə vadar etmişdir. O, ifaçı kimi İsveç, Norveç, Latviya, İtaliya, Almaniya, İsveçrə, Avstriya, Portuqaliya, Macarıstan, Çexiya Respublikası, Polşa, Xorvatiya, Makedoniya Respublikası, Serbiya, Monteneqro və Kanadada qonaq ifaçı kimi çıxış etmişdir. O, həmçinin Budapeşt, Dubrovnik, Şlezvik-Qolşteyn, Skopye, Riqa, Klagenfurt, Split və Lyublyanada keçirilən musiqi festivallarında da iştirak etmişdir.

O, 2000-2002-ci illər arasında Vyanada, 2002-2004-cü illər arasında isə Berlində yaşamış və işləmişdir.

Moyka Zlobko Vayql 28 noyabr 2011-ci ildə Bakıda M.Maqomayev adına Azərbaycan Dövlət Filarmoniyasında Leypsiq simli kvarteti ilə konsert vermişdir.

4 avqust 2012-ci ildə Qəbələdə keçirilən IV Beynəlxalq Musiqi Festivalı çərçivəsində Sloveniyanın məşhur "Tartini kvarteti"nin konserti zamanı Miran Kolbl, Romeo Druker, Aleksandr Milosev, Milos Milejnik kimi musiqiçilərlə birlikdə çıxış etmişdir.

Moyka Zlobko Vayql Lyublyana Musiqi Akademiyasının arfa və kamera musiqisi üzrə professorudur.