Fərid Hüseyn 10 oktyabr 1989-cu ildə Kürdəmir şəhərində dünyaya gəlib. 1995–2006-cı illərdə M.Ə. Rəsulzadə adına Kürdəmir rayon 2 saylı tam orta məktəbdə təhsil alıb. 2006-cı ildə Azərbaycan Mədəniyyət və İncəsənət Universitetinin Sənətşünaslıq fakültəsinin "Nəşriyyat işi və redaktəetmə" ixtisasına, 2008-ci ildə Bakı Slavyan Universitetinin iki illik "Yaradıcılıq" fakültəsinin "Poeziya" bölümünə daxil olub. Hər iki universiteti 2010-cu ildə bitirib. 2010–2013-cü illərdə ADMİU-nun "Kultralogiya" fakültəsinin "Mədəniyyətşünaslıq" ixtisası üzrə magistr təhsili alıb.

2010-cu ildə Azərbaycan Yazıçılar Birliyinə (AYB) üzv olub. AYB və Mədəniyyət Nazirliyinin nəzdində faəliyyət göstərən "Gənc ədiblər məktəbi"ni bitirib. Hazırda N. Gəncəvi adına Milli Azərbaycan Ədəbiyyatı Muzeyinin dissertantıdır və "Azərbaycan ədiblərinin ev muzeylərindəki şəxsi fondların tədqiqi və nəşri prinsipləri" mövzusunda elmi mövzu üzərində çalışır.

Serbiya Yazıçılar Birliyinin üzvüdür.

Fərid Hüseyn 2019-cu ildən AYB-nin Gənclər Şurasının sədridir.

Fərid Hüseyn 2010 və 2021-ci illərdə Prezident təqaüdünə layiq görülüb. 2021-ci ildə Serbiya Respublikasının Semska Mitrovika — İmperatorluq şəhərinin fəxri vətəndaşı seçilib və adı Çaçak şəhərinin Mırçayevçi qəsəbəsindəki şairlər məhəlləsinin girişində yerləşən bulağın yanındakı daş lövhəyə vurulub.

2021-ci ildən AYB-nin katibliyinin və Üzvlüyə Qəbul Komissiyasının, həmçinin, "Ədəbiyyat qəzeti"nin redaksiya heyətinin üzvüdür. Şeirləri Türkiyə, qazax, özbək, qırğız türkcəsinə və ingilis, rus, belarus, ukrayn, serb, gürcü, rumın dillərinə tərcümə edilərək dünyanın müxtəlif ölkələrinin mətbuat orqanlarında çap olunub.

İştirak etdiyi beynəlxalq sərgilər

F. Hüseyn London, Qahirə, Budapeşt, Praqa, Peterburq və İstanbulda keçirilən beynəlxalq kitab sərgilərində iştirak edib.

O, həmçinin İstanbul Şeir Festivalı, Sapanca Şeir Festivalı, Tiflis Poeziya Festivalı, Moldovada Avropa Şairlər Baharı Festivalı, Dünya Yazarlarının Belqrad Görüşləri, Tatarıstanda "Ana dili bayramı" və Abdulla Tukay Poeziya günləri, Özbəkistanda Azərbaycan Mədəniyyəti və Ədəbiyyatı günləri və IX Babil Şeir Festivalında ölkəmizi təmsil edib.

"Eşq" kitab seriyası

Fərid Hüseyn "Eşq" kitab seriyasını təsis edib. Onun rəhbəri olduğu kitab seriyasından Məmməd Orucun "Oyun havası" (povest, 2012), Eldar Baxışın "Sərçə balası" (şeirlər, 2012), İsi Məlikzadənin "Qırmızı yağış" (roman, 2013), Asif Atanın "İnam və şübhə" (2015), Serkanın "İtkin gül" (roman, 2011) Tuğrul Tanyolun "Sən əlimdən tutanda" (şeirlər, 2019), Adnan Özerin "Kasıbın eşq nəğməsi" (şeirlər, 2019), Gjeke Marinajın "Sevginin 24 saat" (şeirlər, 2018), Koman Şovanın "Sevginin izi ilə" (şeirlər, 2020) nəşrləri işıq üzü görüb.

• 2009-cu ildə "Əlifba sırası" adlı şeirlər və esselərdən ibarət ilk kitabı işıq üzü görüb.
• 2013-cü ildə "Dözmək üçün məşq" adlı şeirlər və esselərdən ibarət ikinci kitabı çap olunub.
• 2013-cü ildə İrandakı həbsxana xatirələrindən bəhs etdiyi "Qandalı görməsin" adlı memuar kitabı oxuculara təqdim edilib.
• 2016-cı ildə "Bir də heç vaxt" adlı şeirlər kitabı nəşr edilib. 2017-ci ildə bu kitab "Больше никогда" adıyla rus dilində çap edilib.
• 2017-ci ildə "Əlvida ağacları" adlı şeirlər kitabı işıq üzü görüb.
• 2017-ci ildə mərhum şair Fərhad Metenin həyat və yaradıcılığı haqqında qələmə aldığı "Ömür – doğum günü hədiyyəmiz" kitabı nəşr edilib.
• 2017-ci ildə tanınmış şairlərin həyat yoldaşlarından aldığı on səkkiz müsahibədən ibarət "Hər kəsin öz eşqi" adlı kitabı işıq üzü görüb.
• 2020-ci ildə "Uçurum peyğəmbəri" adlı məqalələr toplusu nəşr edilib.
• 2020-ci ildə L. Tolstoyun "Anna Karenina" romanı haqqında yazdığı "İntihar ilahəsi" adlı kitabı işıq üzü görüb.
• 2020-ci ildə müsahibələrdən ibarət "Sevdiyim əsər" və şeirlərindən ibarət "Təkrarın tənhalığı" adlı kitabları çap edilib.
• 2021-ci ildə xalq şairi M. Yaqub haqqında "Tərəddüdün yaşıdı" adlı kitabı nəşr olunub.
• 2021-ci ildə N. Gəncəvi yaradıcılığı ilə bağlı müsahibələrdən ibarət "Nizami söhbətləri" adlı kitabı işıq üzü görüb.

Xaricdə çap olunan kitabları

• 2017-ci ildə Amerikada "Kəpənək dərsi" ("Studying a butterfly") adlı şeirlər toplusu çapdan çıxıb.
• 2019-cu ildə Özbəkistanda "Səmərqənd divanı" ("Camarkand devoni") adlı poetik silsiləsi nəşr edilib.
• 2019-cu ildə Serbiyada "Qəlbin tərbiyə dərsləri" ("Часови васпитања духа") adlı şeirlər kitabı oxuculara təqdim olunub.
• 2020-ci ildə Türkiyədə "Yalan bayramı" adlanan şeirlər kitabı nəşr edilib.
• 2021-ci ildə Moldovada "Yaddaşın vəfa borcu" ("İnchinare memoriei") adlı şeirlər kitabı işıq üzü görüb.
• 2021-ci ildə Türkiyədə "Yaddaş ilanı" ("Hafıza yılanı") adlı şeirlər kitabı çap edilib.

2006-cı ilin "Nobel" mükafatçısı Orxan Pamukun "Yeni Həyat" və "Bəyaz Qala" romanlarını, həmçinin O. Pamukun esselərindən ibarət "Mənzərədən parçalar" kitabını, 20-dən çox türk şairinin 50-yə qədər şeirlərini, fransız esseisti Mişel Montenin esselərini, Alber Kamünün esselərini, Dino Busattinin, Vasili Şukşinin hekayələrini, Yılmaz Ərdoğanın şeirlərini və esselərini Azərbaycan dilinə çevirib. Həmçinin Frans Kafkanın sevgilisi Milenaya yazdığı məktubları və Milenanın F. Kafkanın ən yaxın dostu Maks Broda yazdığı məktubları da dilimizə tərcümə edib.

2019-cu ildə Orxan Kamalın "Nazim Hikmət ilə üç il yarım həbsdə" kitabını Azərbaycan türkcəsinə uyğunlaşdırıb.

2021-ci ildə tanınmış türk şair Sunay Akının seçmə şeirlərdən ibarət "Yastığındakı çuxur" adlı kitabını tərcümə edib.

Müxtəlif vaxtlarda Luiza Qlük, Frans Kafka, Alber Kamü, Vasili Şukşin, Mario Benedetti, Yuliana Veliçkovskaya, Əli əl-Şalah, Nina Smiç, Aqi Mişol, Meyr Veyselter, Əmir Or, Ronni Somek, Kokis Kristos, Nagy Hajnal Csilla, Əhməd Zəkəriyyə, Najvan Dərviş, Linda Hestinq, Svetlana Boym, Mahmud Dərviş kimi müəlliflərin şeir və hekayələrini Azərbaycan dilinə çevirib.

• 2017-ci ildə Azərbaycan Respublikası Mədəniyyət və Turizm Nazirliyinin təsis etdiyi "Qızıl Kəlmə" ədəbi mükafatının qalibi olub.
• 2018-ci ildə "Nəsimi Şeir Festivalı"nın laureatlarından biri olub.
• 2019-cu ildə Azərbaycan Respublikası Gənclər və İdman Nazirliyinin "İlin gənc şairi" mükafatının sahibi olub.
• 2019-cu ildə Vaqif Səmədoğlu Mərkəzinin "Vaqif Səmədoğlu" medalına layiq görülüb.
• 2021-ci ildə "Dünya Yazarlarının Belqrad Görüşü" adlı poeziya tədbirində nüfuzlu "Povelja Morave" beynəlxalq ədəbi mükafatına layiq görülüb.
• 2021-ci ildə Mədəniyyət Nazirliyinin təsis etdiyi ilə təltif edilib.
• 2022-ci ildə I Türk Dünyası Ədəbiyyat və Kitab Festivalı çərçivəsində TÜRKSOY-un "Mahtumkulu" medalı ilə təltif edilib.