Elcan Hacıyev 2019-cu ildə Antalya şəhərində yeniyetmələrin beynəlxalq turnirini və U-18 Azərbaycan Çempionatını gümüş medallarla başa vurdu. 2020-ci ildə isə Poreç şəhərində (Xorvatiya) yeniyetmələrin Avropa Çempionatını beşinci pillədə tamamladı.

Elcan Hacıyev 2021-ci ildə İtaliyada gənclər arasında Dünya Çempionatının bürünc medalına sahib oldu. Noyabrda isə Azərbaycanda IJF Grand Slam turnirini bürünc medalla başa vurdu. 2022-ci ildə Tbilisi şəhərində də (Gürcüstan) IJF Grans Slam turnirinin bürünc medalına sahib olan Elcan Hacıyev mövsüm ərzində Praqa şəhərində (Çexiya) gənclər arasında Avropa Çempionatının qalibi oldu, Ekvadorda isə gənclər arasında Dünya Çempionatını gümüş medalla başa vurdu.

Elcan Hacıyev 2023-cü ilin yanvarında Portuqaliyada IJF Qran-Prisində gümüş, iyununda isə Düşənbədə IJF Qran-Prisində bürünc medallara sahib oldu. Komanda hesabında iyulda Çinin Çendu şəhərində Universiada Oyunlarını bürünc medalla başa vurdu.

2024-cü il Elcan Hacıyev üçün ən uğurlu mövsümlərdən oldu. Yanvarda Portuqaliyada IJF Qran-Pri turnirini bürünc, fevralda Fransada IJF Grand Slam turnirini gümüş, martda Gürcüstanda IJF Grand Slam turnirini gümüş medallarla başa buran Elcan Hacıyev apreldə Xorvatiyanın Zaqreb şəhərində baş tutan Avropa Çempionatında bütün rəqibləri üzərində qələbə qazanaraq Avropa çempionu oldu. Mayda Qazaxıstanda da IJF Grand Slam turnirini də bürünc medalla başa vurdu. IJF olimpiya reytinq cədvəlinə əsasən Elcan Hacıyev və Murad Fətiyev olimpiya normativinə uyğun idi, amma olimpiada da bir MOK-u ancaq bir idmançı təmsil etməlidir deyə Azərbaycan Cüdo Federasiyası Hacıyev və Fətiyev arasında seçim apardı. İyulun 1-də federasiya olimpiada da Elcan Hacıyevin mübarizə aparması barədə qərar qəbul etdi.