Bu dövrlə bağlı məlumatlar yetərli qədər olmadığından ikinci sülalənin siyasi vəziyyəti, qonşu xalqlarla münasibəti çox zəif öyrənilib.

Bu xanədanlıq birinci sülalənin süqutundan sonra hakimiyyətə gəlib və Misirin dövlət quruluşunun təkmilləşməsi, dini və inzibati sistemlərin formalaşmasında önəmli rol oyanıb.

II sülalə dövründə əhali arasında dinin güclənməsi, yeni dini mərkəzlərin yaranması müşahidə olunub. Manefon Tinisin paytaxt şəhər statusunu qoruduğunu yazır.

Tanınmış misirşünas Volfanq Helqə görə Misir bu dövrdə iki yerə bölünüb. Ayrılma səbəbi kimi cəmiyyətdə dini fərqlərin güclənməsi önə çıxardılır. Buna görə II sülalə fironlarının bir hissəsi Yuxarı, digər bir hissəsi isə Aşağı Misirdə hökmranlıq edib.

İlk firon Hotepsehemuy ölkəni birləşdirmək və daxili sabitliyi bərpa etmək məqsədilə müxtəlif tədbirlər həyata keçirmişdi. Onun adı "iki güc barışır" mənasını verir ki, bu da o dövrdə Yuxarı və Aşağı Misirin yenidən birləşməsinə işarə edir.

Sülalənin digər önəmli fironlarından biri Peribsen olub. Peribsen, təxminən e.ə. 2760-cı ildə hakimiyyətə gəlib və ölkədəki dini dəyişikliklərlə yadda qalıb. O, ənənəvi günəş tanrısı Ra əvəzinə Seth tanrısını öz qoruyucu tanrısı kimi qəbul edirdi. Bu dəyişiklik həm də Peribsenin dövründə baş verən dini böhranı, Misir cəmiyyətində yaranmış qarşıdurmaları əks etdirir.

Sülalənin son fironu Xasexemuy isə ölkənin yenidən sabitliyə qovuşmasında mühüm rol oynayıb. Deltada baş qaldıran üsyanı yatırıb və ölkənin cənub və şimalını yenidən birləşdirməyi bacarıb. O, özünü həm Hor, həm də Set tanrılarının himayədarı kimi təqdim edirdi.

II sülalə hökmdarlarının adları, sıralaması və hakimiyyət illəri haqqında məlumatlar dəqiq deyil. İlk üç firon bir çox mənbələrdə eynidir.

1. . 2024-10-07 tarixində . İstifadə tarixi: 2024-11-15.