Xəzər Universiteti

• Neftçilər kampusu — 3 tədris binası, ümumi sahəsi 9 300 m². Ünvan: Bakı şəhəri, Məhsəti küçəsi 11 (Neftçilər metrostansiyası yaxınlığı)
• Mərkəz kampusu — 1 tədris binası (1 115 m²), 283 nəfərlik Fikrət Əmirov Konfrans-Konsert Mərkəzi. Ünvan: Bakı şəhəri, Bəşir Səfəroğlu küçəsi 122
• Buzovna kampusu — otel, konfrans və istirahət mərkəzi (3 140 m²), 0,85 hektar torpaq sahəsi. Ünvan: Bakı şəhəri, Buzovna qəsəbəsi, dənizkənarı
• Binəqədi kampusu — Xəzər Universiteti və Dünya Məktəbi üzrə təhsil kompleksi (15 776 m²), 3 tədris binası və 3 mərtəbəli idman kompleksi. Ünvan: Bakı şəhəri, Naxçıvani küçəsi 9
• Sumqayıt kampusu — 6 132,7 m² sahəsi olan tədris binası və 4,6 hektar torpaq sahəsi. Ünvan: Sumqayıt şəhəri, Bakı küçəsi 37, 44-cü məhəllə
• Gəncə kampusu — tədris binası (5 878 m²), qonaq evi, idman kompleksi və 1,62 hektar torpaq sahəsi. Ünvan: Gəncə şəhəri, Kəpəz rayonu, Atabəylər prospekti 76
• Nərimanov kampusu — 3 binadan ibarət tədris kompleksi (11 335,84 m²). Ünvan: Bakı şəhəri, Nərimanov rayonu, Əhməd Rəcəbli küçəsi 1, ev 35A
• Bakıxanov kampusu — 26,93 hektar torpaq sahəsi və 1 900 m² tədris binası. Ünvan: Bakı şəhəri, Sabunçu rayonu, Bakıxanov qəsəbəsi, Elşən Mehdiyev küçəsi 408

• 
  Neftçilər kampusu
• 
  Neftçilər kampusu
• 
  İçərişəhər kampusu

• Yataqxana — 3 mərtəbəli bina, ümumi sahəsi 1 400 m². Ünvan: Bakı şəhəri, 8-ci km qəsəbəsi, Şirin Mirzəyev küçəsi 32
• HASVET Baytarlıq Təbabəti Fakültəsi. Ünvan: Bakı şəhəri, Cəmşid Naxçıvanski küçəsi 72
• Buzovna ərazisində 25,748 hektar özəl torpaq sahəsi — universitet şəhərciyinin tikintisi üçün layihələndirmə və hazırlıq işləri aparılır.

Humanitar, Təhsil və Sosial Elmlər Fakültəsi Xəzər Universitetində yaradılan ilk fakültələrdən biridir. 1992-ci ildən etibarən Humanitar fakültəsinin yaradılması barədə qərar qəbul edilmişdir. Fakültənin əsas fəaliyyət istiqamətləri:

• Humanitar, təhsil və sosial elmlər sahəsində yüksəkixtisaslı mütəxəssislərin hazırlanması
• Aparıcı universitetlərin təcrübəsi nəzərə alınmaqla müasir tədris proqramlarının hazırlanması
• Humanitar, təhsil və sosial elmlər sahəsində elmi tədqiqatların aparılması, elmi məqalələrin nəşri
• Seminarlar, təlimlər, vebinarlar və yerli və beynəlxalq elmi konfransların təşkili
• Beynəlxalq akademik əməkdaşlığın həyata keçirilməsi
• Müəllimlərin peşəkar inkişafını dəstəkləyən təlimlərin keçirilməsi
• Cəmiyyət üçün faydalı sosial, mədəni və maarifləndirici layihələrin həyata keçirilməsi

İqtisadiyyat və Menecment fakültəsi 1991-ci ildə təsis edilmişdir. Fakültə Azərbaycanda iqtisadiyyat və biznes təhsili sahəsində fəaliyyət göstərən ali təhsil strukturlarından biridir. Tədris prosesində Qərb təhsil sisteminin əsas prinsipləri regional ehtiyaclar nəzərə alınmaqla tətbiq olunur. Fakültədə təhsil dünyanın müxtəlif aparıcı universitetlərində təhsil almış professor-müəllim heyətinin iştirakı ilə müasir kurikulumlar əsasında həyata keçirilir.

Fakültə yerli biznes strukturları, beynəlxalq təşkilatlar və maliyyə institutları ilə əməkdaşlıq edir. Bu əməkdaşlıq məzunların maliyyə, audit, marketinq və idarəetmə sahələrində peşəkar fəaliyyətə hazırlanmasına yönəlmişdir. Fakültənin fəaliyyəti tələbələrin qlobal iqtisadi çağırışların öyrənilməsi və həlli prosesində iştirak etməsinə şərait yaradır, eləcə də iqtisadiyyat və biznesin əsas istiqamətləri üzrə biliklərin inkişafına və yayılmasına töhfə verməyi hədəfləyir.^[2]

İqtisadiyyat və Menecment fakültəsində iqtisadiyyat və biznesin müxtəlif sahələri üzrə tədris və elmi-tədqiqat fəaliyyəti həyata keçirilir. Fakültə bakalavr təhsil pilləsində iqtisadiyyat, marketinq, maliyyə, mühasibat uçotu, menecment və turizm ixtisasları üzrə təhsil proqramları təqdim edir. Müəllim heyətinin elmi-tədqiqat və tədris fəaliyyətinin geniş spektri, eləcə də xarici alimlər və ali təhsil müəssisələri ilə əməkdaşlıq əlaqələri proqramların beynəlxalq təhsil standartlarına uyğunlaşdırılmasına imkan verir.

Fakültədə alternativ və bərpa olunan enerji mənbələrinin iqtisadiyyatı, enerji səmərəliliyi, ətraf mühitin mühafizəsi və əlaqəli sahələr üzrə elmi tədqiqatlara diqqət yetirilir.

Təbiət elmləri və Mühəndislik fakültəsi 1 fevral 2019-cu il tarixində Xəzər Universitetində fəaliyyət göstərən Mühəndislik və Tətbiqi elmlər fakültəsinin bazasında yaradılmışdır.^[3] Fakültənin yaradılması Azərbaycanın müasir inkişaf səviyyəsinə uyğun olaraq elm tutumlu sənaye sahələri üçün istehsal proseslərini təşkil etmək və innovativ texnologiyalarla işləmək bacarığına malik mütəxəssislərin hazırlanması zərurəti ilə əlaqədardır.

Mühəndislik və Tətbiqi elmlər fakültəsi 1991-ci ildə Xəzər Universitetinin təsis edilməsi ilə eyni dövrdə fəaliyyətə başlamışdır. Fakültə fəaliyyəti dövründə müxtəlif mühəndislik ixtisasları üzrə mütəxəssislər hazırlamış, beynəlxalq standartlara uyğun tədris proqramları və dərslərin təşkili sahəsində təcrübə formalaşdırmışdır. Hazırda fakültədə ali təhsilin bakalavr, magistratura və doktorantura pillələri üzrə təhsil proqramları həyata keçirilir.

Fakültənin tədris və elmi fəaliyyəti analitik düşüncə, yaradıcılıq və tədqiqat bacarıqlarının inkişafına yönəlmişdir. Təhsil prosesi mühəndislik və təbiət elmləri sahəsində nəzəri biliklərin praktiki tətbiqi prinsipi əsasında təşkil olunur.

Bakalavr proqramları

Fakültədə aşağıdakı bakalavr ixtisasları üzrə təhsil proqramları təklif olunur:^[4]

Hasvet Baytarlıq Fakültəsi Xəzər Universitetinin tərkibində 20 iyun 2025-ci il tarixində təsis edilmişdir.^[5] Fakültənin formalaşdırılması prosesi 2024-cü ilin noyabr ayından etibarən Xəzər Universitetində Baytarlıq Təbabəti departamentinin fəaliyyətə başlaması ilə başlanmışdır. 1 may 2025-ci il tarixində Xəzər Universiteti ilə Türkiyənin Hasvet A.Ş. şirkəti arasında əməkdaşlıq protokolu imzalanmışdır. Bu əməkdaşlıq çərçivəsində Hasvet Baytarlıq Təbabəti Fakültəsi yaradılmışdır.

Xəzər Universiteti ilə Türkiyənin Hasvet Anonim Şirkəti arasında qurulan strateji əməkdaşlıq fakültənin beynəlxalq standartlara əsaslanan tədris modelinin formalaşdırılmasına imkan yaratmışdır. Fakültənin tədris prosesi müasir elmi prinsiplərə, metodoloji yanaşmalara və innovativ pedaqoji üsullara əsaslanır.

7 iyul 2025-ci il tarixində Hasvet tərəfindən təsis edilmiş Bakı Beynəlxalq Baytarlıq Xəstəxanası Xəzər Universiteti Hasvet Baytarlıq Təbabəti Fakültəsinin Tədris və Təcrübə Xəstəxanası statusunu almışdır.

Əsas fəaliyyət istiqamətləri

Hasvet Baytarlıq Təbabəti Fakültəsi baytarlıq təhsili, elmi-tədqiqat və klinik xidmət sahələrində fəaliyyət göstərir. Fakültənin əsas istiqamətlərinə bakalavr və magistratura səviyyələrində nəzəri və praktik tədrisin təşkili, heyvan sağlamlığı, infeksion və zoonoz xəstəliklər, baytarlıq epidemiologiyası üzrə elmi tədqiqatların aparılması, klinik baza vasitəsilə diaqnostika və müalicə xidmətlərinin göstərilməsi, eləcə də milli və beynəlxalq elmi əməkdaşlığın inkişaf etdirilməsi daxildir.

Tədris və tədqiqat sahələri

Fakültənin tədqiqat sahələri heyvan sağlamlığının monitorinqi və qorunması, infeksion və zoonoz xəstəliklərin profilaktikası və müalicəsi, baytarlıq epidemiologiyası, genetik xəstəliklərin molekulyar və klinik təhlili, heyvan rifahının qiymətləndirilməsi və laboratoriya tədqiqatlarını əhatə edir. Fakültədə həmçinin Vahid sağlamlıq (One Health) yanaşması çərçivəsində heyvan, insan və ətraf mühit sağlamlığı arasındakı qarşılıqlı əlaqələrin multidisiplinar şəkildə öyrənilməsinə yönəlmiş tədqiqatlar aparılır.

Təbiət elmləri, Sənət və Texnologiya üzrə Yüksək Təhsil Fakültəsi Xəzər Universitetinin rektorunun 30 sentyabr 2020-ci il tarixli U/290 nömrəli əmrinə əsasən yaradılmışdır.^[6] Fakültə magistratura və doktorantura səviyyəsində tədrisin keyfiyyətinin yüksəldilməsi, yüksəkixtisaslı mütəxəssislərin, elmi və elmi-pedaqoji kadrların hazırlanması məqsədilə “Magistratura, doktorantura və elmi işlər bölməsi”nin bazasında formalaşdırılmışdır.

Fakültənin əsas məqsədi ölkənin davamlı inkişafı üçün prioritet və strateji əhəmiyyət daşıyan sahələr üzrə müstəqil və peşəkar fəaliyyət göstərə bilən mütəxəssislərin, eləcə də elmi və elmi-pedaqoji kadrların hazırlanmasıdır. Tədris prosesi Azərbaycan Respublikasının Elm və Təhsil Nazirliyinin normativ sənədlərinə, eləcə də Azərbaycan Respublikası Prezidenti yanında Ali Attestasiya Komissiyasının tələblərinə uyğun şəkildə həyata keçirilir.

Təbiət elmləri, Sənət və Texnologiya üzrə Yüksək Təhsil Fakültəsi magistratura və doktorantura pillələri üzrə dərəcə proqramları təklif edir. Fakültədə tədris dili əsasən ingilis, bəzi ixtisaslar üzrə isə Azərbaycan dilidir. Tədris və elmi-tədqiqat prosesinə yerli və xarici ölkələrdən olan yüksəkixtisaslı mütəxəssislər cəlb olunur və proqramlar beynəlxalq təhsil standartlarına uyğun şəkildə həyata keçirilir.

Xəzər Universitetinin Kitabxana-İnformasiya Mərkəzi 1991-ci ildə yaradılmışdır.^[7] Mərkəz universitetin Neftçilər, Mərkəz və Nərimanov kampuslarında, eləcə də Bakı Dünya Məktəbi, Sumqayıt Dünya Məktəbi və Gəncə Dünya Məktəbinin kampuslarında fəaliyyət göstərir. Müasir infrastrukturla təmin olunmuş kitabxana tədris, elmi-tədqiqat və peşəkar inkişaf proseslərinin səmərəli təşkili baxımından mühüm rol oynayır.

Kitabxananın fondu dünyanın müxtəlif ölkələrindən əldə edilmiş, elmin müxtəlif sahələrini əhatə edən müasir dərsliklər və monoqrafiyalarla zəngindir. Kitabxana-İnformasiya Mərkəzi ProQuest Central, EBSCO, Web of Science, Scopus, ScienceDirect, Cambridge University Press, OnePetro və Gravür Dünyası Rəqəmsal Gravür Kitabxanası kimi beynəlxalq elmi informasiya resurslarına çıxış imkanları təqdim edir.

Nəzəri Fizika Tədqiqat Mərkəzi Xəzər Universitetinin nəzdində fəaliyyət göstərən elmi-tədqiqat strukturudur və 15 dekabr 2023-cü il tarixində yaradılmışdır.^[8] Mərkəzin əsas məqsədi müasir nəzəri fizikanın aktual istiqamətləri üzrə fundamental elmi tədqiqatların aparılması, beynəlxalq elmi əməkdaşlığın genişləndirilməsi və bu sahədə akademik potensialın inkişaf etdirilməsidir.

Mərkəzdə yüksək enerjilər fizikası, qravitasiya və kosmologiya, eləcə də kondensə olunmuş maddə fizikası sahələrində tədqiqatlar aparılır. Elmi fəaliyyətlə yanaşı, Mərkəz tədris və maarifləndirici təşəbbüslərdə də iştirak edir.

Aşağıölçülü Materiallar Tədqiqat Mərkəzi Xəzər Universitetinin nəzdində fəaliyyət göstərən elmi-tədqiqat mərkəzidir və 15 noyabr 2023-cü ildə yaradılmışdır.^[9] Mərkəz nanoölçülü və qabaqcıl materialların tədqiqi və inkişafı ilə məşğul olur.

Tədqiqat istiqamətlərinə nanomateriallar, nazik bərk təbəqələr və kompozit materiallar daxildir. Bu sahələr üzrə aparılan elmi araşdırmalar, nəşrlər və beynəlxalq əməkdaşlıqlar vasitəsilə Mərkəz qlobal akademik mühitə töhfə verir.

Astrofizika və Kosmologiya Tədqiqat Mərkəzi Xəzər Universitetinin nəzdində fəaliyyət göstərən elmi-tədqiqat mərkəzidir və 15 oktyabr 2024-cü il tarixində yaradılmışdır.^[10] Mərkəz nəzəri kosmologiya, hissəcik astrofizikası və modifikasiya olunmuş cazibə nəzəriyyələri sahələrində elmi araşdırmalar aparır. Yarandığı dövrdən etibarən mərkəz müasir astrofizikanın aktual problemlərinin öyrənilməsinə yönəlmiş tədqiqatlarla akademik mühitdə fəal iştirak edir.

Mərkəzin əsas tədqiqat istiqamətlərinə nəzəri kosmologiya (kainatın mənşəyi, təkamülü və mümkün sonlu vəziyyətlərinin riyazi və fiziki modellər əsasında araşdırılması), hissəcik astrofizikası (elementar hissəciklərin kosmik proseslərdə rolu) və modifikasiya olunmuş cazibə nəzəriyyələri (kainatın sürətlənən genişlənməsinin alternativ nəzəri modellərlə izahı) daxildir.

Mühəndis Biomateriallar Tədqiqat Mərkəzi Xəzər Universitetinin nəzdində fəaliyyət göstərən elmi-tədqiqat mərkəzidir və 15 may 2024-cü il tarixində yaradılmışdır.^[11] Mərkəzin əsas fəaliyyəti dayanıqlı biomaterialların tədqiqi və inkişafına yönəlmişdir.

Elmi araşdırmalar biomaterialların ətraf mühitin mühafizəsi, səhiyyə və baytarlıq sahələrində tətbiq imkanlarını əhatə edir. Mərkəzin tədqiqat istiqamətlərinə ekoloji cəhətdən təhlükəsiz biomaterialların hazırlanması, biomaterialların səhiyyədə (implantlar, dərman daşıyıcı sistemlər, toxuma mühəndisliyi) və baytarlıq təbabətində terapevtik məqsədlərlə tətbiqi daxildir.

Nano Bioanalitik Kimya Tədqiqat Mərkəzi Xəzər Universitetinin nəzdində fəaliyyət göstərən elmi-tədqiqat mərkəzidir və 15 aprel 2024-cü il tarixində yaradılmışdır.^[12] Mərkəz analitik kimya və nano-bioanalitik mühəndislik sahələrinin kəsişməsində elmi araşdırmalar aparır.

Elmi fəaliyyət nanotexnologiya yanaşmalarının kimyəvi və bioloji sistemlərin yüksək dəqiqliklə analizində tətbiqinə yönəlmişdir. Mərkəzin əsas məqsədi müasir analitik üsulların inkişaf etdirilməsi və multidissiplinar tədqiqatların təşviq olunmasıdır.

Riyaziyyat və Onun Tətbiqləri Mərkəzi (RTM) riyaziyyat elminin nəzəri əsaslarının və praktik tətbiqlərinin inkişafına yönəlmiş ixtisaslaşmış elmi-tədqiqat qurumudur və 10 fevral 2024-cü il tarixində təsis edilmişdir.^[13]

Mərkəz fundamental riyaziyyat sahələrində yüksək səviyyəli elmi araşdırmaların aparılmasını, əldə olunan nəticələrin elmi ictimaiyyətə təqdim edilməsini və riyaziyyatın fizika, mühəndislik və digər tətbiqi sahələrdə istifadəsinin təşviqini qarşısına məqsəd qoymuşdur. Mərkəzin əsas elmi-tədqiqat istiqamətlərinə funksional analiz, operatorlar nəzəriyyəsi, topologiya, diferensial həndəsə, spektral nəzəriyyə və integral tənliklər daxildir.

Ağıllı Sistemlər üzrə Tədqiqat Mərkəzi Xəzər Universitetinin nəzdində fəaliyyət göstərən elmi-tədqiqat mərkəzidir və 15 may 2024-cü il tarixində təsis edilmişdir.^[14] Mərkəz müasir və sürətlə inkişaf edən ağıllı sistemlər sahəsində fundamental və tətbiqi elmi araşdırmaların aparılmasını qarşısına məqsəd qoymuşdur.

Mərkəzin elmi-tədqiqat istiqamətlərinə Əşyaların İnterneti (IoT) və kompüter şəbəkələri, böyük verilənlərin analizi, süni intellekt, maşın və dərin öyrənmə, multimediya siqnallarının emalı, eləcə də daxili (embedded) və avtonom sistemlər daxildir. Bu istiqamətlər intellektual texnologiyaların nəzəri əsaslarının inkişafına və real tətbiqlərinin genişləndirilməsinə xidmət edir.

Hüceyrə Patologiyası Tədqiqat Mərkəzi (HPTM) hüceyrə patologiyası, genetika və xəstəliklərin diaqnostikası sahəsində fəaliyyət göstərən elmi-tədqiqat mərkəzidir və 12 noyabr 2015-ci il tarixində təsis edilmişdir.^[15]

Mərkəz hüceyrə biologiyası, genetik və bakterial xəstəliklərin öyrənilməsi, erkən diaqnostik biomarkerlərin aşkarlanması, bitki genetikasının tədqiqi və innovativ diaqnostik metodların işlənməsi istiqamətlərində fundamental və tətbiqi tədqiqatlar aparır.

Enerji Sistemləri Tədqiqat Mərkəzi enerji sahəsində elmi-tədqiqat və inkişaf işlərinə həsr olunmuş mərkəzdir və 15 dekabr 2024-cü il tarixində yaradılmışdır.^[16]

Mərkəz bərpa olunan enerji, enerji idarəçiliyi və optimallaşdırma, çoxkanallı enerji sistemləri, enerji çevrilməsi texnologiyaları, elektrik və qaz şəbəkələri üzrə dayanıqlı və innovativ həllərin hazırlanmasına yönəlmiş elmi fəaliyyət göstərir.

Yeni Materiallar və Yaşıl Kimya Tədqiqat Mərkəzi— ətraf mühitin davamlı inkişafı və enerji həlləri sahəsində tədqiqat və inkişaf işlərinə həsr olunmuş elmi-tədqiqat mərkəzidir. Mərkəz 15 dekabr 2024-cü il tarixində təsis edilmişdir. Mərkəz yaşıl kimya və innovativ material həlləri sahəsində bir sıra elmi nailiyyətlər əldə etmişdir. Mərkəzin tədqiqatları həm ekoloji, həm də texnoloji problemlərin həllinə yönəlmişdir. ^[17]

Yeni Materiallar və Yaşıl Kimya üzrə Tədqiqat Mərkəzində aşağıdakı əsas sahələr üzrə tədqiqatlar aparılır:

• Ətraf mühitin çirklənməsinin müəyyənləşdirilməsi: Ekosistemlərə, hava, su və torpaq keyfiyyətinə təsir edən çirkləndiricilərin öyrənilməsi və ekoloji zərərin azaldılması üçün davamlı həllərin işlənməsi.
• Batareya və enerji saxlama sistemləri: Daha səmərəli və ekoloji cəhətdən təmiz enerji saxlama sistemlərinin inkişaf etdirilməsi; bu sahədəki nailiyyətlər bərpa olunan enerji tətbiqlərində mühüm rol oynayır.
• Ağıllı polimerlər: Ətraf mühitin qorunması, tibbi cihazlar və davamlı istehsal sahələrində istifadə edilə bilən ağıllı polimerlərin inkişaf etdirilməsi.
• Mərkəz elmi ictimaiyyətə əhəmiyyətli töhfələr vermiş, üç əsas məqalə dərc etmişdir. Bütün bu məqalələr Web of Science və Scopus bazalarında indekslənmişdir ki, bu da aparılan tədqiqatların keyfiyyətini və əhəmiyyətini nümayiş etdirir. Bu nəşrlər mərkəzin yaşıl kimya və material elmlərinin inkişafına sadiqliyini vurğulayır.

Mərkəzin tədqiqatları ətraf mühit çirklənməsinin müəyyənləşdirilməsi, batareya və enerji saxlama sistemləri, ağıllı polimerlər sahələrini əhatə edir. Mərkəzin elmi nəşrləri Web of Science və Scopus bazalarında indekslənmişdir.

eiLink Tədqiqat və İnkişaf Mərkəzi — enerji sektoru, süni intellekt və siqnal emalı sahələrində fəaliyyət göstərən ixtisaslaşmış elmi-tədqiqat qurumudur. Mərkəz 2015-ci ildə təsis edilmişdir.^[18] Elmi-tədqiqat istiqamətləri

1. Enerji sektoru: Mərkəz neft və qaz mühəndisliyi sahəsində qabaqcıl tədqiqatlar aparır, o cümlədən geologiya, maye dinamikası, tətbiqi termodinamika və qazma mühəndisliyi üzrə araşdırmalar. Bu tədqiqatlar Azərbaycanın aktiv enerji sektorunun inkişafında mühüm rol oynayır.
2. Süni intellekt alqoritmləri: Mərkəz müxtəlif sahələrdə süni intellektin tətbiqinə yönəlmiş qabaqcıl alqoritmlərin hazırlanması və tətbiqi ilə məşğuldur, mürəkkəb problemlərin həllində texnologiya və elmi tədqiqatı birləşdirir.
3. Siqnal emalı: Mərkəz kommunikasiya sistemləri və verilənlərin emalı texnologiyalarında irəliləyişlərə töhfə verən yüksək səviyyəli siqnal emalı tədqiqatları aparır.

Mərkəz neft və qaz mühəndisliyi, süni intellekt alqoritmləri və müasir siqnal emalı texnologiyaları üzrə tədqiqatlar aparır.

Dayanıqlı İqtisadi İnkişaf Tədqiqat Mərkəzi iqtisadiyyat, ətraf mühit və sosial elmlər sahəsində elmi araşdırmalar aparan qurumdur və 6 iyul 2024-cü il tarixində yaradılmışdır.^[19]

Mərkəz iqtisadi siyasət, ekoloji faktorlar və sosial dinamikaların qarşılıqlı təsirini öyrənərək davamlı inkişaf modelləri hazırlamağı hədəfləyir.

Psixologiya Tədqiqat Mərkəzi — psixologiyanın müxtəlif sahələrində elmi-tədqiqat işləri aparan qurumdur. Mərkəz 1 dekabr 2024-cü il tarixində təsis edilmişdir.^[20] Elmi-tədqiqat istiqamətləri:

• Klinik psixologiya: Mərkəz əqli sağlamlıq pozuntularının öyrənilməsi, terapevtik müdaxilələr və psixoloji qiymətləndirmələr üzərində işləyir. Tədqiqatlar mental sağlamlıq vəziyyətləri, müalicənin effektivliyi və psixoloji dayanıqlılıq mövzusunda aparılır.
• Sosial psixologiya: İnsan davranışı və qərar qəbuletməsinə sosial faktorların təsirini öyrənir. Tədqiqat sahələri arasında sosial identiklik, qərəz, qrup dinamikası və sosial təsir mövzuları yer alır.
• Ailə psixologiyası: Ailə dinamikasının psixoloji rifah üçün vacib rolunu nəzərə alaraq valideyn-uşaq münasibətləri, nikah məmnuniyyəti və ailədaxili münaqişələrin həlli araşdırılır. Həmçinin sosial və iqtisadi dəyişikliklərin ailə strukturlarına təsiri öyrənilir.

Mərkəzin əsas istiqamətləri klinik, sosial və ailə psixologiyası üzrə elmi araşdırmaları əhatə edir.

Mövlana Ədəbi-Fəlsəfi Araşdırma Mərkəzi -dil, ədəbiyyat və mədəni tarix sahələrində tədqiqat aparan elmi qurumdur. Mərkəz 1 aprel 2022-ci il tarixində təsis edilmişdir. Mərkəz akademik tədqiqatların aparıldığı bir mərkəz olaraq intellektual müzakirələrin təşviqi və ixtisaslaşmış sahələrdə biliklərin inkişaf etdirilməsi sahəsində mühüm rol oynayır.^[21] Elmi-tədqiqat istiqamətləri:

1. Dil və Ədəbiyyat Araşdırmaları: Dil, ədəbiyyat nəzəriyyəsi və mədəniyyətin ədəbi aspektləri üzrə tədqiqatlar aparılır.
2. Tarix və Mədəniyyət Araşdırmaları: Tarixi proseslər, mədəniyyətin inkişafı və mədəni irsin öyrənilməsi üzrə elmi fəaliyyət həyata keçirilir.

Bu sahələr mərkəzin bütün akademik araşdırmalarının təməlini təşkil edir və yeni biliklərin kəşfi, elmi dialoqun inkişafı və qlobal anlayışın genişləndirilməsinə xidmət edir.

Mədəni Antropologiya və Folklor İnstitutu — mədəni irsin öyrənilməsi və qorunmasına həsr olunmuş ixtisaslaşmış tədqiqat mərkəzidir. İnstitut xüsusilə Türk xalqlarının ənənələri, folkloru və antropologiyası sahəsində fəaliyyət göstərir. Məkəz 19 fevral 2024-cü il tarixində təsis edilmişdir və türk xalqlarının zəngin mədəni irsini təbliğ edən əsas qurumlardan birinə çevrilmişdir.^[22]

Elmi-tədqiqat istiqamətləri:

1. Mədəni-antropoloji tədqiqatlar: Türk xalqları daxilində mədəni və sosial həyatın müxtəlif aspektlərinin öyrənilməsi; mədəniyyətin inkişafı, ənənələr və sosial praktikalara dair dərinləşdirilmiş anlayışın əldə edilməsi.
2. Azlı Türk xalqlarının folklor nümunələrinin öyrənilməsi: Folklorun sənədləşdirilməsi, təhlili və qorunması; bu sahəyə ənənəvi nağıllar, miflər və nəsildən-nəsilə ötürülən şifahi tarix daxildir.
3. Türk xalqlarının maddi və qeyri-maddi mədəni irsinin araşdırılması və təşviqi: Maddi (memarlıq abidələri, eksponatlar) və qeyri-maddi (ritual, dil, folklor) mədəni irsin sənədləşdirilməsi və tanıdılması üçün elmi resursların ayrılması.

Çin Araşdırmaları Mərkəzi — Çinin zəngin mədəniyyətini, Azərbaycanın Çin ilə artan əlaqələrini və Sinologiya (Çinşünaslıq) sahəsini araşdıran elmi-tədqiqat qurumudur. Mərkəz 21 oktyabr 2022-ci il tarixindən etibarən fəaliyyət göstərir.^[23] Mərkəzin fəaliyyəti Çinin daxili mədəni xüsusiyyətlərini və beynəlxalq rolunu, xüsusilə Azərbaycan ilə münasibətlərini öyrənməklə mədəni mübadiləni və akademik tədqiqatı təşviq etməyə yönəlmişdir.

Elmi-tədqiqat istiqamətləri:

1. Çin mədəniyyəti: Çinin tarixi, fəlsəfi və bədii irsi ilə bağlı araşdırmalar, qlobal mədəni irsə töhfələrinin öyrənilməsi.
2. Azərbaycan-Çin münasibətləri: Azərbaycan və Çin arasındakı diplomatik, iqtisadi və mədəni əlaqələrin araşdırılması və bu sahədə qarşılıqlı əməkdaşlığın təhlili.
3. Sinologiya (Çinşünaslıq): Çin dili, tarixi, cəmiyyət və inkişaf proseslərinin hərtərəfli öyrənilməsi.
4. Bu tədqiqat sahələri mərkəzin Çini həm daxili mədəniyyət aspektlərindən, həm də beynəlxalq əlaqələr kontekstində əhatəli şəkildə öyrənməyə sadiqliyini əks etdirir.

Beynəlxalq və Qlobal Ali Təhsil Tədqiqat Mərkəzi ali təhsilin qlobal inkişafına yönəlmiş elmi-tədqiqat qurumudur və 30 yanvar 2025-ci ildə yaradılmışdır.^[24]

Karyera və Məzunlar Mərkəzi — Xəzər Universitetində tələbələr və məzunların peşəkar inkişafını dəstəkləyən qurumdur. Mərkəz 18 iyun 2001-ci il tarixində ABŞ-ın Avrasiya Fondu tərəfindən maliyyələşdirilən “Xəzər Universitetində 1999–2001-ci illərdə Karyera Mərkəzinin İnkişafı Layihəsi” çərçivəsində Peşə İnkişaf Mərkəzi olaraq yaradılmışdır. 01 dekabr 2023-cü il tarixindən etibarən Peşə İnkişaf Mərkəzinin bazasında Karyera və Məzunlar Mərkəzi fəaliyyət göstərir.^[25] Mərkəzin əsas fəaliyyət istiqamətləri:

• Tələbə və məzunların peşəkar iş həyatına hazırlanması və karyera inkişafının dəstəklənməsi.
• İşəgötürənlərlə əməkdaşlıq quraraq təcrübə və iş imkanlarının təmin edilməsi.
• Universitet ilə məzunlar arasında qarşılıqlı əlaqələrin gücləndirilməsi.

Fəxri məzunlar

Xəzər Universitetində alim və ziyalıların elm, mədəniyyət və incəsənətin mühüm məsələləri haqqında mütəmadi olaraq keçirilən konfrans və ya seminarlar, onların müzakirə olunduğu məclisdir. Elm və Sənət Məclisi 2006-cı ildə Professor Hamlet İsaxanlı tərəfindən təsis edilmişdir. Bu məclis son illərdə Azərbaycanda elm və sənət adamlarının, ziyalıların məmnuniyyətlə gəldikləri bir yerdir. Adətən ayda bir və ya iki dəfə keçirilən "Elm və Sənət Məclisi"nin materialları çap olunur.

Elm və Sənət Məclisinin ilk toplantısı 2006-cı il oktyabrın 10-da keçirilib. İndiyə qədər Azərbaycandan olan tanınmış alimlərlə yanaşı, dünyanın bir sıra ölkələrindən, o cümlədən, ABŞ, Türkiyə, İngiltərə, Şotlandiya, İtaliya, Rusiya, Misir, Hollandiya, İran, Gürcüstan və s. ölkələrdən dəvət olunmuş, öz sahələrində böyük söz və nüfuz sahibi olan alimlər Elm və Sənət Məclisində müxtəlif mövzularda maraqlı mühazirələr oxumuşlar. Hazırda məclisin materiallarından ibarət 2 toplu kitab şəklində çap olunmuş, digəriləri çapolunma ərəfəsindədir.

Avrasiya Hasilat Sənayesi Bilik Mərkəzi 2010-cu ilin sentyabrında Xəzər Universiteti ilə ABŞ-nin Gəlirlərə Nəzarət İnstitutu (Revenue Watch Institute) arasında imzalanmış Anlaşma Memorandumuna əsasən yaradılmışdır. Mərkəz Bakı şəhərində, Xəzər Universitetində yerləşir.^[30]

Mərkəzin əsas fəaliyyəti Avrasiya məkanında, xüsusilə keçmiş Sovet respublikalarında hasilat sənayesi (neft, qaz və dağ-mədən) sahəsində fəaliyyət göstərən qeyri-hökumət təşkilatları və media nümayəndələrinin bilik və bacarıqlarının artırılmasına yönəlmişdir. Mərkəz dövri olaraq təlimlər təşkil edir, beynəlxalq və regional səviyyədə tanınmış təlimçiləri dəvət edir və ehtiyacı olan QHT və media işçilərini müsabiqə yolu ilə seçərək təlimlərə cəlb edir.

Təlimlərin əsas mövzularına neft-qaz və dağ-mədən sənayesində sazişlər, Mədən Sənayesində Şəffaflıq Təşəbbüsü (EITI), müstəqil rifah fondları və büdcə idarəçiliyi daxildir. Təlimlərin iştirakçıları Azərbaycan, Qazaxıstan, Qırğızıstan, Monqolustan, eləcə də Bolqarıstan, Rumıniya, Albaniya, Ukrayna və Əfqanıstan kimi ölkələrdən dəvət olunur.

Mərkəzin təşkil etdiyi ilk təlim 2011-ci il fevralın 15–22-də keçirilmişdir. Təlimdə dörd ölkədən 15 nəfər vətəndaş cəmiyyəti nümayəndəsi iştirak etmişdir.

Multimedia Mərkəzi 1994-cü ildə Xəzər Universitetində yaradılmışdır.^[31]

Mərkəzin əsas fəaliyyət istiqamətləri universitetlə bağlı tədbir və mərasimlərin foto və video çəkilişinin həyata keçirilməsi, materialların montajı və arxivləşdirilməsi, eləcə də media sahəsinə maraq göstərən tələbələr üçün təlimlərin təşkilindən ibarətdir.

Miqrasiya Araşdırmalar Mərkəzi Avropa İttifaqının TEMPUS və UNIMIG layihələri çərçivəsində yaradılmış Regional Tədqiqat Şəbəkəsinin tərkib hissəsidir.^[32]

Mərkəzin əsas məqsədi miqrasiya sahəsində elmi tədqiqatların aparılması, təlimlərin təşkili və əldə edilən tədqiqat nəticələrinin yayılmasıdır. Mərkəz milli, regional və beynəlxalq səviyyələrdə miqrasiya ilə bağlı məlumat bazası təqdim edir və müxtəlif akademik və ictimai qurumlarla əməkdaşlıq edir.

Xəzər Universitetinin Keyfiyyətin Təminatı Mərkəzi 1999-cu ildə TEMPUS proqramı çərçivəsində yaradılmışdır.^[33] Mərkəz universitetdə daxili keyfiyyət təminatı sisteminin təkmilləşdirilməsi, beynəlxalq reytinqlərdə iştirakın koordinasiyası və akkreditasiya proseslərinə metodoloji dəstəyin göstərilməsi ilə məşğuldur.

Ombudsman Mərkəzi 9 fevral 2018-ci ildə yaradılmışdır.^[34] Mərkəz tələbələrin universitet mühitində üzləşdikləri problemlərin məxfi və qeyri-rəsmi şəkildə araşdırılmasını və onların həllinə dəstək göstərilməsini təmin edir.

Xəzər Psixoloji Xidmət Mərkəzi (qısaca XPXM) Xəzər Universiteti nəzdində fəaliyyət göstərən struktur bölmələrdən biridir. Mərkəz 2016-cı ildə universitet rektorunun müvafiq əmri əsasında yaradılmışdır. XPXM-in rəsmi açılış təqdimatı 29 fevral 2016-cı ildə keçirilmişdir.

Mərkəzin əsas məqsədi universitet mühitində psixoloji sağlamlığın qorunması və inkişaf etdirilməsidir. XPXM Xəzər Universitetinin tələbələri, akademik və inzibati-texniki heyəti üçün psixoloji dəstək xidmətləri göstərir. Bununla yanaşı, mərkəz universitetdən kənar şəxslərə və geniş ictimaiyyətə də psixoloji xidmətlər təqdim edir.

XPXM-in fəaliyyət istiqamətlərinə psixoloji konsultasiya və psixoterapiya xidmətləri daxildir. Xidmətlər fərdi, zərurət olduqda isə qrup formatında həyata keçirilir. Mərkəz həmçinin psixoloji mövzularda seminarlar, treninqlər və maarifləndirici təlimlər təşkil edir. Bu tədbirlər psixoloji rifahın və psixoloji savadlılığın artırılmasına, şəxsi inkişafın dəstəklənməsinə yönəlmişdir.

Mərkəzdə psixologiya sahəsində elmi-tədqiqat işləri aparılır və əldə olunan nəticələr müvafiq elmi tədbirlərdə təqdim olunur. XPXM universitet tələbələri üçün psixoloji xidmətləri ödənişsiz əsaslarla həyata keçirir. Mərkəzdə stress, narahatlıq, depressiya, adaptasiya çətinlikləri, ailə və ünsiyyət problemləri kimi mövzular üzrə yardım göstərilir. Hər bir müraciət edən şəxsə fərdi yanaşma tətbiq olunur.

XPXM fəaliyyətində etik prinsiplərə xüsusi önəm verir. Müraciət edən şəxslərlə bağlı məlumatların məxfiliyi ciddi şəkildə qorunur.

Mərkəzin fəaliyyəti universitet daxilində görülən işlərlə məhdudlaşmır. XPXM-in təşəbbüsü və iştirakı ilə beynəlxalq psixologiya konfransları təşkil olunur. Mərkəzin əməkdaşları müxtəlif ölkələrdə və yerli səviyyədə keçirilən elmi və ixtisasartırma tədbirlərində iştirak edir, həmçinin Xəzər Universitetindən kənar qurumlarda psixoloji mövzularda təlim və maarifləndirici çıxışlar edirlər. Bu fəaliyyətlər cəmiyyətin psixoloji bilik səviyyəsinin artırılmasına və mərkəzin ölkə miqyasında tanınmasına töhfə verir. ^[35]

Əlilliyi olan tələbələrin ali təhsilə inteqrasiyasını dəstəkləmək, onların təhsil imkanlarını genişləndirmək və inkişaf üçün zəruri şərait yaratmaq məqsədilə fəaliyyət göstərən struktur bölmə. Mərkəz Avropa İttifaqının “Əlilliyi olan şəxslərin Azərbaycanın ali təhsil müəssisələrinə inteqrasiyası” (ESFIDiP) layihəsi çərçivəsində yaradılmışdır.

Mərkəzin əsas məqsədi əlilliyi olan tələbələr üçün təhsil resurslarına çıxışın təmin edilməsi, bacarıq və potensiallarının inkişafına dəstək göstərilməsi, eləcə də ali təhsildə bərabər imkanların təşviqidir. Mərkəz bu məqsədlə təlim və kurslar təşkil edir, oxşar profilli mərkəzlərlə təcrübə mübadiləsi aparır və cəmiyyətdə əlillik anlayışı üzrə maarifləndirmə fəaliyyətləri həyata keçirir.

Mərkəz fəaliyyətində Azərbaycan Respublikasının qanunvericiliyini, beynəlxalq hüquqi aktları və Xəzər Universitetinin daxili normativ sənədlərini rəhbər tutur və universitet rektoruna tabedir. ^[36]

Xəzər Universiteti Konfutsi İnstitutu Bakı Dövlət Universitetinin nəzdində fəaliyyət göstərən Konfutsi İnstitutunun filialıdır.^[37]

Avropa İttifaqı Araşdırmalar Mərkəzi — 2014-cü ildə Siyasi Elmlər və Fəlsəfə Departamentinin nəzdində yaradılmışdır. Mərkəzi Avropa ilə bağlı tədqiqatların aparılması, seminar və tədbirlərin təşkili məqsədilə fəaliyyət göstərir. Mərkəz sinif otağı kimi istifadəyə uyğun olaraq ağıllı lövhə, noutbuklar və təqdimatlar üçün digər avadanlıqlarla təchiz olunub. Həmçinin, diskussiyalar və müxtəlif simulyasiya oyunlarının keçirilməsi üçün dəyirmi masa mövcuddur. ^[38]

Nailəxanım Muzeyi — Xəzər Universiteti və Dünya Məktəbinin həmtəsisçisi, pedaqoq və musiqiçi Nailəxanım İsayevanın həyat və fəaliyyətinə həsr olunmuş muzeydir. Muzey Dünya Məktəbi kompleksində yerləşir və 1 aprel 2022-ci ildə açılmışdır. Nailəxanım İsayevanın xatirəsinin əbədiləşdirilməsi məqsədilə muzeyin yaradılması barədə qərar Xəzər Universiteti Direktorlar və Qəyyumlar Şurası tərəfindən qəbul edilmişdir. Muzey ekspozisiyası Nailəxanım İsayevanın şəxsi həyatı, pedaqoji və musiqi fəaliyyəti ilə bağlı yazılı sənədlər, fotoşəkillər, xatirə əşyaları, geyimlər, kitablar, not nəşrləri və incəsənət nümunələrindən ibarətdir. Muzeydə Nailəxanımın bəstələdiyi mahnılara həsr olunmuş xüsusi guşə, fortepiano-royal və audio-vizual materiallar yer alır. Ekspozisiyanın bir bölməsi Azərbaycan mədəniyyətində iz qoymuş görkəmli qadınlara həsr edilmişdir və bu istiqamətdə ölkədə nadir muzey nümunələrindən biri hesab olunur. Muzeydə həmçinin Nailəxanım Fondunun yaradılması və qız və qadınların ali təhsilinə dəstək məqsədilə təsis olunmuş təqaüd təşəbbüsləri haqqında məlumat təqdim edilir. ^[43]

Azərbaycan qədim zamanlardan bəri dünya xalçaçılıq mərkəzlərindən biri olmuşdur. Mütəxəssislər Azərbaycanda Quba, Şirvan, Qarabağ, Təbriz, Gəncə, Qazax kimi əsas xalçaçılıq məktəblərini qeyd edirlər. Xəzər Universitetinin Xalça Muzeyi həm muzey, həm də emalatxana kimi fəaliyyət göstərir. Peşəkar sənətkarların başçılıq etdiyi muzey və emalatxanada toplanan kiçik və böyük ölçülü xalça və başqa toxunma əşyalar əsasən tələbələr tərəfindən hazırlanmışdır. Muzey və emalatxana incəsənət üzrə seçmə fənn götürərək kredit qazanmaq istəyən tələbələrin istifadəsi üçün də açıqdır.

Xəzər Universitəsi nəzdində zərgərlik muzeyi-təlim mərkəzi fəaliyyət göstərir. Xəzər Universiteti zərgərlik mərkəzində daha çox gümüş üzərində iş aparılır. Bu mərkəz zərgərlik fənnini seçən tələbələr üçün laboratoriya rolunu da oynayır. Burada emalatxana işlərinə peşəkar zərgər rəhbərlik edir.

Xəzər Universitetində 2010-cu ildə yaradılmış Kukla Muzeyi Ana Dünya Məktəbinin nəzdində yerləşir. Muzey jurnalist Tahirə İskəndərovanın övladlarının Dünya məktəbinə bağışladığı kukla eksponatları əsasında yaradılmışdır. Muzeydə 400-dən çox kukla eksponatları var. 2010-cu il aprel ayının 21-də muzeyin rəsmi açılış mərasimi keçirildi. Hazırda da bütün eksponatlar diqqətlə qorunub saxlanılır.

Xəzər Universiteti Nəşriyyatı universitetin kitab, jurnal və digər çap məhsullarını nəşr edir. Fəaliyyət dairəsinə dərslik, monoqrafiya, elmi jurnallar və tərcümələr daxildir.

Xəzər Humanitar və Sosial Elmlər Jurnalı açıq girişli, resenziyalı elmi jurnaldır.^[44] Web of Science Core Collection bazasında indeksləşdirilmişdir.

Khazar Journal of Science and Technology (KJSAT) 2015-ci ildən nəşr olunur.^[45] Riyaziyyat, fizika, kimya, biologiya, yer elmləri, kompüter elmləri, tibb və mühəndislik sahələrində tədqiqatları dərc edir.

Azərbaycan Arxeologiyası Xəzər Universitetinin nəşr etdiyi elmi jurnaldır.^[46] Jurnal Azərbaycan arxeologiyası sahəsində aparılan tədqiqatları əhatə edir.

Xəzər Xəbər 1995-ci ildən universitet qəzeti kimi fəaliyyət göstərir. 2015-ci ildən ikidilli (Azərbaycan və ingilis dili) jurnal formatında nəşr olunur. Baş redaktoru professor Hamlet İsaxanlıdır.