Kömək
Bu səhifəni kitabınıza əlavə edin
Kitabı göstər (0 səhifə)
Səhifə təklif edinSofiya Karmina Koppola (14 may 1971[1], Nyu-York, Nyu-York ştatı[1]) — ABŞ rejissoru və sabiq aktrisa. "Oskar", "Qızıl Qlobus", "Qızıl Şir" və Kann mükafatlarının sahibidir.[2] "BAFTA" və "Praymtaym Emmi" mükafatlarına namizəd olmuşdur.[3][4]
| Sofiya Koppola | |
|---|---|
| ing. Sofia Coppola | |
.jpg) S. Koppola Venesiya Film Festivalında (2025-ci il). | |
| Doğum adı | Sofia Carmina Coppola |
| Doğum tarixi | 14 may 1971[1] (54 yaş) |
| Doğum yeri | |
| Uşağı | 2 |
| Atası | Frensis Ford Koppola |
| Fəaliyyəti | aktrisa, kinorejissor, ssenarist, yazıçı, kino aktrisası, rejissor |
| Fəaliyyət illəri | 1972-ci ildən |
| Təhsili |
|
| Mükafatları |
 |
| IMDb | ID0001068 |
 Vikianbarda əlaqəli mediafayllar | |
Valideynləri - kinorejissor Elinor və Frensis Ford Koppoladır. Aktrisalıq fəaliyyətinə 1972-ci ildə atasının "Xaç atası" kriminal dramında körpə rolu ilə başlamışdır. Bir sıra musiqi kliplərində iştirak etmiş, 1986-cı ildə "Peggi Syu ərə gedir" komediya filmində ikinci dərəcəli rol ifa etmişdir. 1990-cı ildə "Xaç atası 3" filmində Maykl Korleonenin qızı Meri Korleone obrazını canlandırmışdır.
S. Koppola rejissorluq fəaliyyətinə "Bakirə intiharları" (1999) gənclər dramı ilə başlamışdır. Kirsten Danst ilə ilk yaradıcılıq əməkdaşlığı məhz bu filmdə reallaşmışdır. Filmlərində Amerika cəmiyyətində tənhalıq, maddi vəziyyət, imtiyazlılıq, təcridolma, gənclik, qadınlıq və yeniyetməlik məsələləri əksini tapmışdır. "Tərcümə çətinlikləri" (2003) komediya-dramı üçün "Oskar" mükafatının "Ən yaxşı orijinal ssenari" kateqoriyasında təltif edilmiş, "Ən yaxşı rejissor" nominasiyasına təqdim edilən üçüncü qadın rejissor statusunu qazanmışdır. Sonrakı illərdə "Mariya Antuanetta" (2006) tarixi dramını, "Haradasa" (2010) ailə dramını, "The Bling Ring" (2013) satirik kriminal dramını, "Məczub olmuş" (2017) cənub qotik trillerini, "Uçurumun kənarında" (2020) komediyasını və "Prisilla" (2023) bioqrafik dramını ərsəyə gətirmişdir.[5][6]
2015-ci ildə "Netflix" üçün hazırladığı "Əsl Mürrey Miladı" Milad musiqi-komediya xüsusi buraxılışı "Praymtaym Emmi" mükafatının "Ən yaxşı televiziya filmi" nominasiyasına layiq görülmüşdür.[7]
Sofiya Ford Koppola 1971-ci il mayın 14-də Nyu-York şəhərində anadan olmuşdur.[8] Sənədli film müəllifi Elinor Neil və kinematoqrafçı Frensis Ford Koppolanın sonbeşiyidir. Ata xətti ilə[9] İtaliyanın Lukaniya[10] və Neapol[11] bölgələrindən olan nəslin davamçısıdır. Uşaqlıq illəri Kaliforniya ştatının Razerford ərazisindəki ailə təsərrüfatında keçmişdir.[12] 15 yaşında "Chanel" şirkətində təcrübə proqramında iştirak etmişdir.[13] 1990-cı ildə Müqəddəs Yelena orta məktəbini bitirmişdir.[14] Mills kollecində təhsil almış, 1993–1994-cü tədris ilində rəssamlıq təhsili üçün Kaliforniya İncəsənət İnstitutuna köçürülmüşdür.[15] Sonradan İncəsənət Mərkəzi Dizayn Kollecində Pol Yasminin rəhbərliyi altında təhsil almışdır. Ali təhsilini başa vurmadan "Milkfed" adlı geyim istehsalı müəssisəsi təsis etmişdir. Hazırda məhsulları yalnız Yaponiya bazarında realizə olunur.[16]
S. Koppola uşaqlıq və yeniyetməlik dövründə moda, fotoqrafiya, musiqi və dizayn sahələri ilə məşğul olmuşdur. İbtidai mərhələdə onun kinematoqrafiya sahəsinə yönəlmək niyyəti olmamışdır. 1998-ci ildə "Ulduzdan dad al" adlı ilk qısametrajlı filmini çəkdikdən sonra bu sənətin onun maraq dairəsindəki bütün elementləri özündə ehtiva etdiyini müəyyənləşdirmiş və rejissorluq fəaliyyətini davam etdirmək qərarına gəlmişdir.[17]
1992-ci ildə S. Koppola kinorejissor Spayk Cons ilə görüşmüş, 1999-cu ildə nikaha daxil olmuş və 2003-cü ildə nikahlarını pozmuşlar. Rəsmi məlumatda S. Koppolanın mətbuat xidməti boşanma qərarının təəssüf hissi ilə qəbul edildiyini qeyd etmişdir. "Tərcümə çətinlikləri" filmindəki baş qəhrəmanın həyat yoldaşı obrazının S. Consun prototipi olduğu məlumdur. Bunu S. Koppola filmin nümayişindən sonra təsdiqləmiş və bildirmişdir ki, "obrazda S. Consun və yaşanmış hadisələrin müəyyən elementləri əks olunmuşdur".[18][19]
2003–2005-ci illərdə S. Koppola Kventin Tarantino ilə münasibətdə olmuşdur. Münasibətlərinə son qoyduqdan sonra onlar arasında dostluq əlaqələri davam etmişdir.[20]
S. Koppola musiqiçi Tomas Mars ilə 27.08.2011 tarixində İtaliyanın Bernalda şəhərində, "Palazzo Margherita" sarayında nikah bağlamışdır. İlk tanışlıqları "Bakirə intiharları" filminin musiqi tərtibatı zamanı baş tutmuşdur.[21] Nikahdan iki övladları dünyaya gəlmişdir: qardaşı Romanın[22][23] şərəfinə adlandırdığı Romi (28.11.2006) və Kosima (may, 2010).[24] Ailə 2010-cu ilədək Parisdə məskunlaşmış, sonra Nyu-Yorka köçmüşdür.[25]
S. Koppola ictimai diqqətdən kənar həyat tərzi seçmiş, övladlarının onun peşə fəaliyyətindən və səfərlərindən təsirlənməməsinə səy göstərmişdir. Övladlarını ictimai diqqətdən kənar saxlamaq seçiminin şəxsi təcrübəsindən irəli gəlib-gəlmədiyi sualına cavab olaraq bildirmişdir ki, övladlarının həyata qarşı biganə yanaşmasını məqbul saymır.
Filmlər
| İl | Ad | Rejissor | Ssenari müəllifi | Prodüser | Qeydlər |
|---|---|---|---|---|---|
| 1989 | Nyu-York qissələri | Yox | Hə | Yox | Seqment: "Zoi olmayan ömür" |
| 1998 | Ulduzdan dad al | Hə | Hə | Hə | Qısametrajlı film |
| 1999 | Bakirə intiharları | Hə | Hə | Yox | |
| 2003 | Tərcümə çətinlikləri | Hə | Hə | Hə | |
| 2006 | Mariya Antuanetta | Hə | Hə | Hə | |
| 2010 | Haradasa | Hə | Hə | Hə | |
| 2013 | The Bling Ring | Hə | Hə | Hə | |
| 2017 | Məczub olmuş | Hə | Hə | Hə | |
| 2020 | Uçurumun kənarında | Hə | Hə | Hə | |
| 2023 | Nağıllar ölkəsi | Yox | Yox | Hə | |
| Prisilla | Hə | Hə | Hə | ||
| 2025 | Sofiyadan Mark | Hə | Yox | Yox | Sənədli film |
- ↑ 1 2 3 4 Deutsche Nationalbibliothek Record #129584800 // Ümumi tənzimləmə nəzarəti (GND) (alm.). 2012—2016.
- ↑ Gonzalez, Sandra. "Sofia Coppola is first woman to win Cannes director prize in 56 years". CNN. İstifadə tarixi: 30 may 2017.
- ↑ Blumberg, Naomi. "Sofia Coppola | American director". Encyclopaedia Britannica. İstifadə tarixi: 30 may 2017.
- ↑ Silverstein, Melissa. "Sofia Coppola Wins Top Prize at Venice Film Festival". Women and Hollywood. 15 sentyabr 2010 tarixində orijinalından arxivləşdirilib. İstifadə tarixi: 12 sentyabr 2010.
- ↑ Sales, Nancy Jo. "THE SUSPECTS WORE LOUBOUTINS | Vanity Fair | March 2010". Vanity Fair | The Complete Archive (ingilis). 28 mart 2020 tarixində arxivləşdirilib. İstifadə tarixi: 6 dekabr 2021.
- ↑ The Bling Ring (ingilis), 14 iyun 2013, İstifadə tarixi: 6 dekabr 2021
- ↑ "A Very Murray Christmas". Television Academy. İstifadə tarixi: 15 fevral 2023.
- ↑ "Sofia Coppola". Encyclopedia Britannica. İstifadə tarixi: 12 mart 2022.
- ↑ "Sofia Coppola Interview". The Talks. 22 iyun 2011.
- ↑ Cowie, Peter. Coppola: a biography. Da Capo Press. 1988. 2. ISBN 978-0-306-80598-1.
- ↑ Michael Cabanatuan. "Italia Coppola – mother of filmmaker". SFGate. 23 yanvar 2004. İstifadə tarixi: 14 may 2014.
- ↑ Bartlett, Amanda. "Sofia Coppola's teen years in the Bay Area shaped disturbing Priscilla Presley film". SFGate. 3 noyabr 2023. 31 dekabr 2023 tarixində arxivləşdirilib.
- ↑ Armstrong, Lisa. "Sofia Coppola: I'm more interested in looking than being looked at". The Times. London. 4 iyun 2008. 15 iyun 2011 tarixində orijinalından arxivləşdirilib. İstifadə tarixi: 3 iyun 2008.
- ↑ Coppola, Sofia. "Interview with Sofia Coppola". WTF Podcast (Müsahibə). Interviewed by Marc Maron. 22 iyun 2017.
- ↑ Menkes, Suzy. "Sofia Coppola: Discreet, chic and grown-up". The New York Times. 14 oktyabr 2008. İstifadə tarixi: 29 iyul 2009.
- ↑ Lee, Helen. "Did you know Sofia Coppola has a fashion line called MilkFed?". Sassybella.com. 5 noyabr 2007. İstifadə tarixi: 29 iyul 2009.
- ↑ Coppola, Sofia. "Sofia Coppola on making The Virgin Suicides: 'When I saw the rough cut I thought: Oh no, what have I done?'". The Guardian (ingilis). 25 yanvar 2018. İstifadə tarixi: 15 aprel 2018.
- ↑ "Sofia Coppola, Spike Jonze to divorce". USA Today. 9 dekabr 2003. İstifadə tarixi: 5 iyul 2013.
- ↑ Thorpe, Vanessa. "Spike Jonze: Master of the Wild Things". The Guardian. 6 dekabr 2009. İstifadə tarixi: 5 iyul 2013.
- ↑ "5 Things You Didn't Know About Sofia Coppola". Vogue. 5 iyun 2017. İstifadə tarixi: 30 iyun 2021.
- ↑ "Exclusive! Sofia Coppola Gives Birth!". E! Online. 28 noyabr 2006. İstifadə tarixi: 12 sentyabr 2010.
- ↑ Keegan, Rebecca Winters. "People: Dec. 11, 2006". Time (ingilis). 3 dekabr 2006. ISSN 0040-781X. İstifadə tarixi: 11 fevral 2018.
- ↑ "People: Nicole Kidman, Sofia Coppola, Michael Richards". International Herald Tribune. 29 mart 2009. İstifadə tarixi: 27 avqust 2012.
- ↑ Garratt, Sheryl. "LA Confidential". The Daily Telegraph. 4 dekabr 2010. səh. M.28.
- ↑ "My New York: Sofia Coppola". 19 dekabr 2010.
- Sofiya Koppola — IMDb səhifəsi