Sabah FK

Sabah Futbol Klubu 8 sentyabr 2017-ci ildə “Bridge Group of Companies” Məhdud Məsuliyyətli Cəmiyyəti tərəfindən təsis olunub.^[2]

Komanda 2017/2018-ci illər mövsümündə Azərbaycan Birinci Divizionunda mübarizə apardı.^[3] Komandanın baş məqşçisi bir zamanlar Neftçi PFK-ni çalışdırmış azərbaycanlı mütəxəssis Arif Əsədov oldu.^[4] Komandanın heyəti əsasən azərbaycanlı futbolçulardan quruldu. 4 oktyabr 2017-ci ildə Sabah FK futbolçuları birinci dəfə rəsmi oyunda meydana çıxdılar.^[5] Evdə Binə FK-ya qarşı baş tutan oyunda Sabah FK rəqibi üzərində minimal hesabla qələbə qazanaraq rəsmi oyunlarda birinci qələbəsini qazandı.^[5] Komandanın tarixi qolunu 30-cu dəqiqədə Məhəmməd Alıyev vurdu.^[5] Birinci Divizionun 1-ci dövrəsini Sabah FK üç qələbə, bir heç-heçə və beş məğlubiyyətlə başa vurdu. Növbəti dövrədə Sabah futbolçuları nəticələri yaxşılaşdırmağa başladı və doqquz oyunda üç qələbə və dörd heç-heçə ilə meydandan ayrıldılar. Qış transfer pəncərəsi çərçivəsində Sabah FK heyətini 2 legioner futbolçu cəlb etdi – moldovalı Artiom Zabun və rusiyalı Qvanzav Maqomedov. Üçüncü dövrə də Sabah FK nəticələrini yaxşılaşdırmağa davam etdi və 9 oyunda 5 qələbə və 2 heç-heçə ilə meydandan ayrıldı. Ümumi nəticədə Sabah FK Azərbaycan Birinci Divizionunun 2017/2018-ci illər mövsümünü 11 qələbə, 7 heç-heçə və 9 məğlubiyyətlə beşinci pillədə başa vurdu. Komandanın heyətində ən məhsular futbolçular – 8 qolla Raul Yaqubzadə, 5 qolla İlqar Ələkbərov, 4 qolla Emin Mehdiyev, Məhəmməd Alıyev və Şirməmməd Məmmədov və 3 qolla Artiom Zabun oldular. Həmin mövsüm Sabah FK həm də Azərbaycan Kubokunda debüt etdi. Komanda 1/8 final mərhələsində Azərbaycan Premyer Liqası təmsilçisi Sumqayıt FK-ya məğlub oldu (0:3).

"Sabah" Futbol Klubu Azərbaycan Premyer Liqasında ilk oyununu 2018-ci il avqustun 12-də "Keşlə" Futbol Klubuna qarşı keçirdi. "ASK Arena"da keçirilən debüt matçında 1:0 hesabıyla qalib gələn "Sabah", həm də, yüksək liqada ilk qələbəsini qazanmış oldu. Qarşılaşmada yeganə qola Marko Deviç imza atdı. Ukrayna millisinin keçmiş üzvü "Sabah" Futbol Klubunun Azərbaycan Premyer Liqasında ilk qolunun müəllifi kimi adını klubun tarixinə yazdırdı.

2022-ci ilin dekabrında Murad Musayevin rəhbərlik etdiyi klub, "Sumqayıt"ı 6:0 hesabı ilə məğlub edərək Azərbaycan Premyer Liqasında tarixinin ən böyükhesablı qələbəsini qazanıb.^[6]

2022-23-cü il mövsümündə Azərbaycan Premyer Liqasının gümüş medallarını qazanaraq tarixində ilk dəfə avrokuboklara yollanıb.

2023-24-cü il mövsümü Azərbaycan Premyer Liqasını 3. yerdə tamamlayaraq yenidən avrokuboklarda iştirak etmək hüququ qazandı. Kubokda isə 1/4 finalda Qarabağ qarşısında mübarizəni dayandırdı.Burada alınan 1-7 lik məğlubiyyət klub tarixinin ən böyükhesablı məğlubiyyəti olub.^[7]

2024-25 mövsümündə "Sabah" Azərbaycan Kubokunun final mərhələsinə yüksəlib. Komanda 1 iyun 2025-ci ildə keçirilən final oyununda "Qarabağ" ilə qarşılaşıb. Mehdi Hüseynzadə adına Sumqayıt şəhər stadionunda oynanılan matçda "Sabah" rəqibini 3:2 hesabı ilə məğlub edərək tarixində ilk dəfə Azərbaycan Kubokunun qalibi olub.^[8] Bu qələbə ilə "Sabah" 2025–26 UEFA Avropa Liqasının birinci təsnifat mərhələsinə vəsiqə qazanıb.

"Sabah"ın loqosunda klubun adı üzərində təsvir edilən günəş şüaları sabaha açılan yeni gün, yeni ümidlər, yeni qələbələri təcəssüm etdirir. Qalxan isə müdafiə əzminin, oyunda komandanın qapısının toxunulmazlığının ifadəsidir.

"Sabah"ın əsas rəngləri qara-çəhrayıdır. Çəhrayı rəng Masazır gölünün rəngini özündə əks etdirir.

"Sabah" Futbol Klubunun təsisçisi "Bridge Group of Companies"-in rəhbəri Yaqub Hüseynovdur. "Sabah"ın prezidenti Maqsud Adıgözəlovdur.

Klubda Müşahidə Şurası (MŞ) da fəaliyyət göstərir. MŞ 5 üzvdən ibarətdir – Firudin Qurbanov (Azərbaycan Respublikası təhsil nazirinin müavini), İqor Ponomaryov (azərbaycanlı keçmiş futbolçu və məşqçi, 1988-ci ilin olimpiya çempionu, SSRİ-nin əməkdar idman ustası), Rəhman Hacıyev ("1news.az" saytının və "Bakinskiy raboçiy" qəzetinin rəhbəri), Rauf Xəlilov (sahibkar), Yaqub Hüseynov (sahibkar).

Müşahidə Şurasının sədri Firudin Qurbanovdur.^[9]

• son yenilənmə: 25.10.2025-ci il, Araz-Naxçıvan-Sabah oyunundan sonra

• son yenilənmə: 25.10.2025-ci il, Araz-Naxçıvan-Sabah oyunundan sonra

• ^{Qısaltmalar: YF = yarım-final, 1TM = 1-ci təsnifat mərhələsi, 2TM = 2-ci təsnifat mərhələsi, 3TM = 3-cü təsnifat mərhələsi, PO = pley-off mərhələsi}

Klub geyim dəstində qara-çəhrayı rənglərdən istifadə edir. "Sabah"ın ev forması qara-çəhrayı, səfər forması isə ağ-çəhrayı rəngdədir.

Klub I Divizionda çıxış etdiyi zaman İspaniyanın "Joma" firmasının geyim dəstindən istifadə edirdi. "Sabah" Premyer Liqaya vəsiqə qazandıqdan sonra "Joma"nı İtaliyanın "Macron" firmasıyla əvəzlədi. 2020-ci ildən komanda "Nike" firmasının geyim dəstindən istifadə edir.

Azərbaycan Premyer Liqası

• Gümüş medal (1): 2022/23
• Bürünc medal (1): 2023/24

Azərbaycan Kuboku

• Qızıl medal (1): 2024/25

"Sabah" Futbol Klubu ev oyunlarını Masazır qəsəbəsində yerləşən "Bank Respublika Arena"da keçirir. "Bank Respublika Arena" 13 000 nəfər azarkeş tutumuna malikdir.

Stadionun oyun meydançası təbii ot örtüyünü ilə əhatə olunmuşdur. Stadionun ərzisində futbolçuların soyunub geyinmə otaqları, tibb məntəqəsi, mətbuat konfransı üçün nəzərdə tutulmuş zal ilə yanaşı, dəvətlilərin oyunları izləməsi üçün xüsusi otaqlar mövcuddur.

Sözügedən stadion əvvəlki illərdə "Neftçi" və "Qarabağ" klublarının müvəqqəti olaraq Premyer Liqa oyunlarına ev sahibliyi etmişdir. "Sabah" Futbol Klubu yüksək liqada "Bank Respublika Arena"dan əsas stadion kimi istifadə edən ilk klubdur. Azərbaycan Premyer Liqasının 2022/2023 mövsümündə ən çox azarkeş məhz bu stadionunda keçirilən "Sabah" FK — "Qarabağ" FK oyununda qeydə alınıb. 0:0 hesabı ilə nəticələnən görüşü 10000 nəfər tribunadan canlı izləyib.

4 avqust 2025 tarixində yenilənib.

"Sabah" Futbol Klubu "Vətən" Respublika İxtisaslaşdırılmış Olimpiya Ehtiyatları Uşaq Gənclər Futbol Məktəbi ilə əməkdaşlıq edir. "Vətən" 1967-ci ildə uşaq və gənclər futbol məktəbi kimi təsis olunmuşdur. İlk illərində "Vətən" Futbol Məktəbinə Azərbaycanın futbol əfsanəsi Ələkbər Məmmədov rəhbərlik etmişdir. 26 dekabr 2007-ci il tarixindən etibarən Azərbaycan Respublikasının Təhsil Nazirliyinin qərarı ilə məktəbin adı rəsmi olaraq "Vətən" Respublika İxtisaslaşdırılmış Olimpiya Ehtiyatları Uşaq Gənclər Futbol Məktəbi olmuşdur.

"Vətən" Futbol Məktəbinin Bakı şəhərində yerləşən iki kampusu mövcuddur. Bu futbol məktəbində Bakı şəhərindən olanlarla yanaşı, Azərbaycanın müxtəlif bölgələrindən olan istedadlı uşaq və yeniyetmələr də məşq edir. "Vətən" Futbol Məktəbinin futbolçularından ibarət komandalar mütəmadi olaraq xaricdə təşkil olunan beynəlxalq futbol turnirlərində çıxış etmək imkanı qazanırlar.

Uzun müddətdi fəaliyyət göstərən futbol məktəbinin müxtəlif yaş qrupları AFFA-nın təşkil etdiyi yarışlarda uğurla çıxış edirlər. 2017/2018-ci il mövsümündə 7 yaş qrupunda (U10, U11, U12, U13, U14, U15 və U16) çempionatlara qatılan "Vətən" RİOEUG futbol məktəbi yekunda 3 qızıl (U11, U12 və U15), 1 gümüş (U16) və 1 bürünc (U10) medal qazanmaqla özünəməxsus rekordu yeniləyib.