Lotaringiya Universiteti (fransızca: Université de Lorraine və ya qısaldılmış şəkildə UL) — Fransanın Qrand Est regionunda, Lotaringiya ərazisində yerləşən dövlət tədqiqat universitetidir. Universitet 2012-ci il yanvarın 1-də Anri Puankare adına Universitet (Nansi I), Nansi II Universiteti, Metsdə yerləşən Pol Verlen adına Universitet və Lotaringiya Milli Politexnik İnstitutunun (INPL) birləşməsi nəticəsində yaradılmışdır. Bu birləşmənin məqsədi Lotaringiya regionunun əsas ali məktəblərini bir araya toplamaq idi. Birləşmə prosesi 2009-cu ildə Tədqiqat və Ali Təhsil Qovşağı (fransızca: Pôle de recherche et d'enseignement supérieur, PRES) yaradılması ilə başlamış və 2012-ci ildə tamamlanmışdır.
| Lotaringiya Universiteti UL[1] | |
|---|---|
| Université de Lorraine | |
 | |
 | |
| Şüar | Biliklər arasında dialoq — yeniliyin açarıdır. |
| Əsası qoyulub | 5 dekabr 1572 |
| Yenidən təşkil olunub | 1 yanvar 2012 |
| Tip | Dövlət universiteti |
| Rektor | Elen Bulanje |
| Tələbə sayı | 62 000 |
| Doktor sayı | 1 900 |
| Professor sayı | 4 000 |
| Şəhər | Nansi, Mets |
| Ölkə |
 Fransa |
| Rənglər |
Qara, Sarı və Ağ |
| Sayt | www.univ-lorraine.fr |
| 48°41′46″ şm. e. 6°10′35″ ş. u.HGYO | |
 |
|
 Vikianbarda əlaqəli mediafayllar | |
Hazırda universitetin Lotaringiya regionu üzrə 51 kampusu mövcuddur. Əsas kampuslar Nansi və Mets şəhərlərinin ətrafında yerləşir. Digər kampuslar isə Epinal, Sen-Dye-de-Voj, Bar-le-Dyuk, Lunevil, Tionvil-Yuts, Lonqvi, Forbak, Sen-Avold və Sarqemin şəhər və kommunalarında yerləşir.
Lotaringiya Universitetində 62 000-dən çox tələbə təhsil alır (onlardan 10 000 nəfəri beynəlxalq tələbədir). Xarici tələbələr əsasən Lüksemburq, Almaniya, İtaliya, Çin, Mərakeş, Əlcəzair, Tunis, Seneqal, Kamerun və Kot-d'İvuardan gəlirlər. Universitetdə ümumilikdə 7 000 əməkdaş çalışır.
1558-ci ildə Verdendə müstəqil yepiskop knyazlığı tərəfindən Lotaringiya torpaqlarında ilk universitetin yaradılması üçün cəhd edilsə də uğursuzluqla nəticələndi.[2]
1572-ci il dekabrın 5-də Bar Hersoqluğunda Pont-a-Musson kommunasında yezuit universitetinin yaradılması ilə indiki universitetin təməli qoyuldu. Bu təşəbbüs Lotaringiya hersoqu III Karl və onun əmisi oğlu, Lotaringiyalı II Lüdovikin dəstəyi ilə həyata keçirilmişdir. Onlar yeni universitetə öz ambisiyalarına uyğun imkanlar verdilər, beləki qısa müddət ərzində tələbələrin sayı artdı və tanınmış müəllim heyətinə malik Pont-a-Musson Universiteti xarici tələbələri cəlb etməyə başladı.
Lotaringiyanın Fransaya birləşdirilməsi və universtitetin Nansiyə köçürülməsi üçün hersoq Stanislav Leşşinskinin vəfat etməsi gözlənilməli idi. Bu baş verdikdən sonra universitet 1768-ci ildə Nansi şəhərinə köçürüldü.[3] 25 il sonra 1793-cü ildə Fransa inqilabı zamanı inqilabçılar tərəfindən bağlanılmış, yarım əsrdən çox bağlı qaldıqdan sonra 1864-cü ildə yenidən fəaliyyət göstərməyə başlamışdı.
1968-ci ildə qəbul edilən For qanununa əsasən Anri Puankare Universtiteti (Nansi I), Nansi II universiteti və Lotaringiya Milli Politexnik İnstitutu Nansi Universiteti adı altında təşkil olundu. 1971-ci ildə isə Pol Verlen Universitetinin əsası qoyuldu.
2012-ci ildə Nansidəki üç ali təhsil müəssisəsi və Metsdə yerləşən universitet birləşdirilərək "Lotaringiya Universiteti" adı altında yenidən təşkil olundu.
2024-cü ildə dərc olunan Dünya Universitetlərinin Akademik Reytinqinə (ARWU) əsasən, Lotaringiya Universiteti dünyada 300, Fransada isə 10 ən yaxşı universitet arasında yer almış, "Mədən və Mineral Mühəndislik" fakültəsi üzrə isə Avropanın ən yaxşı universiteti seçilmişdir.[4]
- Fransua Jeni (1861–1959), "Sərbəst elmi araşdırma" anlayışını pozitiv hüquqa daxil edən fransız professoru və hüquqşünası
- Viktor Qrinyar (1871-1935), 1912-ci ildə Kimya üzrə "Nobel" mükafatı alan zaman universitetdə tədqiqatçı və müəllim kimi fəaliyyət göstərmişdir.
- Loran Şvarts (1915-2002), 1950-ci ildə Filds medalı alarkən universitetdə tədqiqatçı və müəllim idi.
- Jan-Pyer Serr (1926), 1954-cü ildə Fields medalı alarkən universitetdə dosent (fransızca: maître de conférences) idi.
- Aleksandr Qrotendik (1928-2014), sonralar müasir həndəsənin yaradılmasında aparıcı fiqur olan məzun.
- ↑ 1 2 https://www.lasemaine.fr/helene-boulanger-elue-a-la-presidence-de-luniversite-de-lorraine/.
- ↑ Mari-Katrin Vinyal Suleyro. "XVI və XVII əsrlərdə Lotaringiyada Din və Siyasət". Europa Moderna. 2010. səh. 64. doi:10.3406/emod.2010.847.
- ↑ "Recueil des ordonnances et règlemens de Lorraine" [Lotaringiyanın sərəncam və qaydalarının toplusu]. cild XI. 1770. səh. 370. İstifadə tarixi: 13 iyun 2025.
- ↑ "ShanghaiRanking's Academic Ranking of World Universities". www.shanghairanking.com. İstifadə tarixi: 2025-06-13.
univ-lorraine.fr — Lotaringiya Universitetinin rəsmi saytı