Kloi Stivens Sevini (18 noyabr 1974[1][2][…], Sprinqfild[d], Massaçusets) — ABŞ aktrisası; kinorejissor. Müstəqil kinoda cəsarətli mövzulara meyil etməsi ilə seçilir. "Qızıl Qlobus" mükafatını alıb, "Oskar" və "Praymtaym Emmi" mükafatlarına da namizəd olub.
| Kloi Sevini | |
|---|---|
| ing. Chloë Sevigny | |
 | |
| Doğum adı | Chloë Stevens Sevigny |
| Doğum tarixi | 18 noyabr 1974[1][2][…] (51 yaş) |
| Doğum yeri |
|
| Fəaliyyəti | aktrisa, televiziya aktrisası, kino aktrisası, model[d], dəb dizayneri, kinorejissor, ssenarist |
| Fəaliyyət illəri | 1992-ci ildən |
| Boyu | 1,73 m |
| IMDb | ID0001721 |
| chloesevigny.com | |
 Vikianbarda əlaqəli mediafayllar | |
Məktəb illərini geridə qoyan K. Sevini həyatını hansı istiqamətə yönəldəcəyini çox gözləmir. Modellik dünyası ona ilk fürsəti verir. "Sonic Youth" və "The Lemonheads" kimi dövrün məşhur qruplarının musiqi videolarında göründükcə adı get-gedə çox dilə düşür. Moda dairələri onu "it girl" kimi damğalayır, bu ad da uzun müddət onunla qalır.
Kino tərəfə meyil isə gec gəlmir. 1995-ci ildə "Uşaqlar" filmi ilə ekrana çıxan K. Sevini müstəqil kinonun ab-havasına tez alışır. O dövrdə müstəqil kino öz dilini axtarırdı, K. Sevini də həmin dilin daşıyıcılarından biri olur. 1996-cı ildə "Ağacaltı məkan" (orij. "Trees Lounge") filmindəki rolu bu mərhələnin təbii davamı sayılır.
Karyerasının ən yaddaqalan səhifəsi isə "Kişi ağlamaz" (orij. "Boys Don't Cry") ilə açılır. 1999-cu ildə Lana Tisdel obrazını ekranda yaşadan K. Sevini tamaşaçını yerindən oynadır. Bu çıxış "Oskar" sərəncamçılarının da nəzərindən qaçmır, K. Sevini "Ən yaxşı ikinci dərəcəli qadın rolu" üzrə nominasiya alır.
2000-ci illər K. Sevini üçün müstəqil kinoda qızğın dövr olur. "Amerikalı psixopat" (2000), "Şər aşiqəsi" (orij. "Demonlover") (2002), "Şənlik əjdahası" (orij. "Party Monster") və "Doqvill" (2003), "Şabalıdı dovşancıq" (orij. "The Brown Bunny") (2004) bu mərhələnin ən səciyyəvi işləridir. Bununla belə, adını ən çox "Şabalıdı dovşancıq" ilə eşidiblər. Filmdəki həqiqi seks səhnəsi aktrisa haqqında uzun illər davam edəcək müzakirələrin fitini yandırıb.
Bu illərin ardınca "HBO" ona yeni bir imkan təqdim edir. 2006-cı ildə "Böyük məhəbbət" (orij. "Big Love") serialına qoşulan aktrisa Nikolett Qrant obrazını beş mövsüm boyunca yaşadır. Bu iş 2010-cu ildə "Qızıl Qlobus" mükafatı ilə nəticələnir. Böyük ekranda isə Devid Finçerin "Zodiak" (2007) filmi onun o dövrdəki ən diqqətəlayiq seçimi olur.
Sonrakı illərdə isə K. Sevini televiziya dünyasından əl çəkməyib. Britaniya istehsalı "Tutdu ya tutmadı" (orij. "Hit and Miss") (2012) serialında baş rolda çıxış edib. "Portlandiya" (2013) və "Amerikan qorxu hekayəsi"nin iki mövsümündə ikinci planda görünüb. "Netflix"in "Qan bağı" (orij. "Bloodline") (2015–2017) serialında isə üç il boyunca ekranda qalıb.
Uzun bir yolun sonunda 2024-cü il K. Sevini üçün xüsusi bir il olur. "Bədheybətlər: Menendes qardaşlarının hekayəsi" (orij. "Monsters: The Lyle and Erik Menendez Story") serialındakı oyunu ilə aktrisa ilk dəfə "Praymtaym Emmi" nominasiyasına adını yazdırıb.
K. Sevini üçün kamera arxası da ən az önündəki qədər maraqlı olub. 2016-cı ildə "Məstan" (orij. "Kitty") qısametrajlısını çəkib və beləliklə rejissorluğa ilk sınağını verib. Üçüncü filmi "Ağ əks-səda" (orij. "White Echo") isə 2019-cu ildə Kannın ən prestijli müsabiqələrindən birində, "Qısametrajlı filmə görə Qızıl Palma Budağı" yarışmasında yer alıb. Moda isə onun üçün həmişə ayrıca bir ehtiras olub. İllər ərzində sərgilədiyi fərqli və cəsarətli geyim tərzi onu sənaye daxilində stil ikonası mərtəbəsinə qaldırıb.[3]
Kloi Stivens Sevini[4] 1974-cü il noyabrın 18-də ABŞ-nin Massaçusets ştatındakı Sprinqfild şəhərində anadan olub.[5] Canin və Harold Devid Sevininin ikinci uşağıdır.[6][7] Valideynləri onun doğumundan qısa müddət əvvəl Kaliforniyanın Marin qraflığı bölgəsindən şərqə qayıdıblar.[8] Böyük qardaşı Polun "A.R.E. Weapons" qrupunda çaldığını bilənlər az deyil.[9] K. Sevini adının üzərindəki xüsusi işarəni ("Chloë") özü sonradan əlavə edib, doğum sənədlərində belə bir şey olmayıb. Anası polyak əsilli olsa da, atası fransız-kanadalı köklərindən gəlir.[10]
K. Sevini və qardaşı münasib həyat standartları olan Darien şəhərində (Konnektikut) dindar bir ailənin övladları kimi böyüyüblər.[11][12][13] Ailə katolik dəyərlərinə bağlı, amma eyni zamanda qənaətcil bir həyat sürüb. Atası illər ərzində mühasiblikdən rəsm müəllimliyinə keçib.[14] Darien olduqca varlı bir şəhər olub, amma Sevinilər orada "imkanlı məhəllənin kasıb bohem ailəsi" damğasını daşıyıblar. K. Sevini atası barədə sonradan belə söyləyib: "bizi o şəhərdə böyütmək üçün çox əziyyət çəkib, ən böyük arzusu isə bizim sakit və arxayın bir yerdə böyüməyimiz olub."[15]
Hələ uşaqlıqda bel əyriliyi üzə çıxıb, amma heç vaxt cərrahiyyə masasına uzanmayıb. Yayları adətən "YMCA"nın teatr düşərgəsində keçib, orada səhnəyə çıxıb, baş rollar oynayıb.[16][17] Darien liseyində Alternativ Təhsil Proqramında oxuyub. Həmin illərdə aktyor Tofer Qreys və onun kiçik bacısına baxıcılıq edib.[18] Yeniyetməlik dövründə isə ailəsinin üzv olmağa imkanı çatmadığı bir klubun tennis kortlarını süpürüb pul qazanıb.[19]
Özünü "tənha" və "depressiyalı bir yeniyetmə" kimi təsvir edib. Məktəbdənkənar həyatında ciddi bir şey yox idi, yalnız arabir böyük qardaşı ilə skeytbord sürür, ya da özünə paltar tikirdi.[20] Orta məktəb dövründə tamam yoldan çıxır, narkotiklərə, ələlxüsus hallüsinogenlərə əl uzadır. Dediyi kimi, atası bundan xəbərdar idi, hətta buna izin vermişdi, sadəcə "pis hallar yaşayarsa kəsməsini" şərt qoymuşdu. Atasının bu sərbəstliyinə rəğmən, anası onu anonim alkoqoliklər toplantılarına zorla göndərib.
K. Sevini gənclik illərində narkotik işlətməsi barədə danışanda gizlətmir: "Ailəm həmişə yaxşı olub, istəmərəm ki, bunlar onların üstünə yıxılsın. Məncə o vaxtlar sadəcə çox darıxmışdım... Düşünürəm ki, gənc yaşda bunları başıma gətirdiyim üçün indi böyük adam kimi bunlara heç istəyim yoxdur. Tanıdığım elə böyüklər var ki, bunu heç dadmayıblar, böyük yaşda narkotiklərə başlamaq isə daha bəd olur."
Aktrisanın atası xərçəngdən 1996-cı ildə vəfat edib. Qızı o vaxt 22 yaşında idi.
1990-cı illərin sonlarında aktrisa britaniyalı müğənni Carvis Koker ilə romantik münasibət yaşayıb. Onun pop ulduzu həyatına yaxından şahid olan aktrisa bu dövr haqqında sonralar belə danışıb:
 |
Uelsin lap ucqar yerlərini dolaşırdıq, uşaqlar küçədə ardımızca qaçırdı. İçimdən dedim, bu əzabdır. Bunun ona nə etdiyini gördüm və o gündən anladım ki, belə bir şöhrət mənə lazım deyil. Elə buna görə də işlərimi özüm seçirəm. Xoşladığım rejissorlarla çəkiliş edirəm, içimdən gələn rollara can atıram.[21] |  |
2000-ci illərin əvvəlində K. Sevini "A.R.E. Weapons" qrupundan musiqiçi Mett Makoli ilə romantik münasibətə girir. Cütlük səkkiz il davam edən bu münasibətə 2008-ci ilin əvvəlində son qoyur. 2018-ci ildə isə K. Sevini xorvatiyalı sənət qalereyası rəhbəri Siniş Maçkoviç ilə görüşməyə başlayır. Cütlük 2020-ci il martın 9-da evlənir,[22] mayın 2-də isə K. Sevini bir oğul dünyaya gətirir.[23]
K. Sevini 2016-cı ildəki ABŞ prezidentlik seçkilərində senator Berni Sandersi dəstəkləyib,[24] dörd il sonra da eyni seçimi edib.[25]
2019-cu ildə K. Sevini və Nataşa Lionn 1980-ci il "Göydəndüşmə" (orij. "Out of the Blue") filminin orijinal çəkiliş materialları əsasında bərpası üçün ictimai maliyyələşmə kampaniyası təşkil ediblər. Hər iki aktrisa filmin öz sənət həyatlarına ciddi təsir etdiyini deyib.[26][27][28]
Katolik imanına bağlıdır və mütəmadi olaraq kilsəyə gedir.
- 1 2 Chloë Sevigny // filmportal.de. 2005.
- 1 2 Chloë Sevigny // GeneaStar.
- ↑ Yotka, Steff. "Chloë's Scene, 21 Years Later". Vogue. 20 aprel 2015. 20 sentyabr 2018 tarixində arxivləşdirilib. İstifadə tarixi: 19 sentyabr 2018.
- ↑ Odell, Amy. "Chloë Sevigny Doesn't Know When to Stop Talking". The Cut. 9 yanvar 2009. ISSN 0028-7369. 29 dekabr 2018 tarixində arxivləşdirilib. İstifadə tarixi: 7 oktyabr 2016.
The umlaut isn't on my birth certificate. I had this book as a child called Chloë and Maude, and there was an umlaut on the e, and I said, I want that! It's a little flair.
- ↑ Monush, Willis, 2006. səh. 380
- ↑ "Chloë Sevigny (II) Biography". Yahoo! Movies. 18 fevral 2010 tarixində orijinalından arxivləşdirilib.
- ↑ "Harold D. Sevigny, 12 Feb 1996". Connecticut Death Index, 1949–2001. Stamford, Fairfield, Connecticut, Connecticut Department of Health, Hartford. 9 dekabr 2014 – Ancestry.com vasitəsilə.
- ↑ O., Jimmy. "Int: Chloe Sevigny". JoBlo.com. 2007. 7 mart 2007 tarixində arxivləşdirilib.
- ↑ "A&M Entertainment: Paul Sevigny". A&M Entertainment. 16 mart 2010 tarixində arxivləşdirilib. İstifadə tarixi: 15 mart 2010.
- ↑ "Harold David Sevigny, 28 Dec 1940, Birth". Vermont Vital Records. State Capitol Building, Montpelier, Vermont. FHL microfilm 2,051,520 – Ancestry.com vasitəsilə.
- ↑ Hyland, Veronique. "Chloë Savigny's 'Really Into' the Pope Right Now". The Cut. 18 iyun 2014. 2 iyun 2016 tarixində arxivləşdirilib. İstifadə tarixi: 22 aprel 2016.
- ↑ O'Sullivan, Charlotte. "The Girl With A Thorn In Her Side". The Independent. London. 30 avqust 2003. 22 noyabr 2015 tarixində arxivləşdirilib. İstifadə tarixi: 2 mart 2010.
- ↑ Kennedy, Stoehrer və Calderin, 2013. səh. 285
- ↑ Brooks, Xan. "Chloë Sevigny: 'I now have total disdain for directors'". The Guardian. London, England. 14 may 2016. ISSN 1756-3224. OCLC 60623878. 23 may 2016 tarixində arxivləşdirilib. İstifadə tarixi: 26 may 2016.
- ↑ Lee, Luaine. "Art doesn't always imitate life. I'm a nice Catholic girl, says Those Who Kill's Chloe Sevigny". News.com.au. News Corp Australia. 24 iyun 2014. 8 avqust 2018 tarixində arxivləşdirilib.
- ↑ Gross, Terry. "Plenty of 'Big Love' For HBO Star Chloë Sevigny". NPR. 2 mart 2010. 13 yanvar 2013 tarixində arxivləşdirilib.
- ↑ "Arrow In the Head Interview: Chloë Sevigny on Zodiac". Arrow in the Head. 1 mart 2007. 11 mart 2007 tarixində orijinalından arxivləşdirilib. İstifadə tarixi: 12 sentyabr 2009.
- ↑ Gavilanes, Grace. "Tia & Tamera Mowry Babysat for the Olsens?! Plus, 8 Other Celeb Babysitters". People. 5 iyun 2017. 29 dekabr 2018 tarixində arxivləşdirilib.
- ↑ Apodaca, Rosa. "Chloë Sevigny: Beyond the labels". Los Angeles Times. 18 mart 2007. 5 sentyabr 2009 tarixində arxivləşdirilib. İstifadə tarixi: 3 sentyabr 2009.
- ↑ Sischy, Ingrid. "Destiny calls Chloe". Interview. New York City: Brant Publications. avqust 1995. 13 noyabr 2008 tarixində arxivləşdirilib. İstifadə tarixi: 19 iyun 2020 – Harmony-Korine.com vasitəsilə.
- ↑ "Zimbio.com". 27 noyabr 2012 tarixində orijinalından arxivləşdirilib.
- ↑ "Chloë Sevigny Reveals She Married Sinisa Mackovic Last Year, Months Before Welcoming Son". 9 mart 2021. 11 mart 2021 tarixində arxivləşdirilib. İstifadə tarixi: 9 mart 2021.
- ↑ "Chloë Sevigny has given birth to her first child". Vogue Australia (ingilis). 7 may 2020. 7 dekabr 2021 tarixində arxivləşdirilib. İstifadə tarixi: 30 noyabr 2025.
- ↑ OfficialChloeS. "🇺🇸#feelthebern 🇺🇸 www.instagram.com/p/BC-gJoCAVSY/" (Tweet). 15 mart 2016. İstifadə tarixi: 16 mart 2016.
- ↑ Segalov, Michael. "Chloë Sevigny: 'Make lists after break-ups. Flings are an antidote too". The Guardian. 21 sentyabr 2019. 21 sentyabr 2019 tarixində arxivləşdirilib. İstifadə tarixi: 22 sentyabr 2019.
Bernie Sanders is punk as fuck, plain and simple. I'm petrified of the US government right now. We need someone radical to take Trump on, and Bernie's record as a senator speaks for itself.
- ↑ Peters, Alex. "Natasha Lyonne: 'I'm interested in dark nights of the soul'". Dazeddigital.com (ingilis). 12 may 2025. İstifadə tarixi: 25 yanvar 2026.
- ↑ Newland, Christina. ""Kill all hippies": the punk nihilism of Dennis Hopper's Out of the Blue". British Film Institute. 23 noyabr 2021. 30 noyabr 2020 tarixində arxivləşdirilib.
- ↑ Healy, Claire Marie. "Why Chloë Sevigny Is on a Mission to Save the Work of Linda Manz". Another Magazine. 24 sentyabr 2019. 30 noyabr 2020 tarixində arxivləşdirilib.
- Kloi Sevini — IMDb səhifəsi