Rəng – rəngsiz, ağ; Mineralın cizgisinin rəngi – ağ; Parıltı – şüşə; Şəffaflıq – şəffaf, yarımşəffaf; Sıxlıq – 2,26; Sərtlik – 5,-5,5; Ayrılma – qeyri-mükəmməl; Morfologiya – kristallar: ayrı-ayrı qabarıq tilli kristallar; İkiləşmə: {110} və {100} üzrə, mil şəkilli, polisintetik; Mineral aqreqatları: dənəvər.

Vayrakit kiçik temperatur intervalında (315-400°C) dayanıqlıdır və kalsium seolitləri içərisində ən yüksəktemperaturlu mineraldır. Fəal vulkanizm rayonlarında rast gəlir və müxtəlif hidrotermal dəyişilmiş effuziv süxurlar üzrə inkişaf edir. Plagioklazlar üzrə psevdomorfozalar kimi qələvi hidrotermlərin dəyişdirdiyi tufogen qumdaşlarında, brekçiyalarda və başqa süxurlarda qeyd edilir. Termal bulaqların təzahür etdiyi yerlərdə hidrotermal emanasiyaların məhsulu kimi tapılmışdır. Mineralın zəif metamorfikləşmiş tuflar və tufbrekçiyalar içərisində tapıntıları məlumdur. Birlikdə rast gəldiyi minerallar: natrolit, lomontit, mezolit, skoletsit, analsim, şabazit və b. Mineralın tapıldığı yerlər: Vayraki termal bulağı rayonu (Yeni Zelandiya); Yaponiya və b. Azərbaycanda Dağlıq Talışda aşkar edilmişdir.

• Azərbaycan mineralları. Bakı: Nafta-Press, 2004.