27-ci Osmanlı sultanı olan Sultan I Əbdülhəmid 1776–1777-ci illərdə İstanbulun səmtində böyük bir imarət inşa etdirmişdir. Məktəb, xeyriyyə binası, çeşmə və türbədən ibarət olan bu imarətin bütün strukturu ikinci məşrutiyyət illərində dağıdılmış, yalnız türbəyə toxunulmamışdır. Sultan Əbdülhəmid 1789-cu ildə vəfat etdiyi zaman məhz bu türbəyə dəfn olunmuşdur. Sultan Əbdülhəmid burada öz adına bir məscid inşa etdirmək istəsə də, yaxınlıqdakı Yeni məscidin kölgəsində qalmasından çəkinmişdir.

Türbənin memarı dövrün saray memarı olan Mehmed Tahir ağadır. Kvadrat planlı olan türbənin daxili ümumilikdə 26 pəncərə ilə işıqlandırılır. Aşağı mərtəbədəki pəncərələr kvadrat, yuxarıdakılar isə dairəvidir. Tamamilə mərmərdən inşa olunan türbənin həyət qapısı üzərində Ənkəbut surəsinin 57-ci ayəsi, türbənin öz giriş qapısı üzərində isə xəttat Mehmed Əmin Əfəndi tərəfindən Fəcr surəsinin 27,28,29 və 30-cu ayələri işlənmişdir. Barokko üslubunda inşa olunmuş türbədə Osmanlı mənsublarının məzarları ilə yanaşı Qədəm-i Şərif də ziyarət olunur. Türbə 2009-cu ildə restavrasiya edilmiş və ziyarətə açılmışdır.

Türbənin daxilində I Əbdülhəmid və oğlu IV Mustafa ilə yanaşı aşağıdakı şəxslər dəfn edilmişdir:

• Sultan Əbdülhəmidin oğlu Şahzadə Əhməd (d. 8 dekabr 1776 — ö. 18 dekabr 1778)
• Sultan Əbdülhəmidin oğlu Şahzadə Süleyman (d. 13 mart 1779 — ö. 19 yanvar 1786)
• Sultan Əbdülhəmidin oğlu Şahzadə Mehmed (d. 20 sentyabr 1782 — ö. 23 oktyabr 1784)
• Sultan Əbdülhəmidin oğlu Şahzadə Murad (d. 22 oktyabr 1783 — ö. 21 yanvar 1786)
• Şahzadə Əbdülməcid
• Şahzadə Bəyazid
• Sultan Əbdülməcidin oğlu Şahzadə Mehmed Rüşdü (d. 31 mart 1852 - ö. 5 dekabr 1852)
• Sultan Əbdülhəmidin qızı Aynişah Sultan (d. 9 iyul 1780 — ö. 28 iyul 1780)
• Sultan Əbdülhəmidin qızı Rabiyə Sultan (d. 20 mart 1780 — ö. 28 iyun 1780)
• Sultan Əbdülhəmidin qızı Məlikşah Sultan (d. 28 yanvar 1781 — ö. 24 dekabr 1781)
• Mevhibə Sultan
• Sultan Əbdülhəmidin qızı Fatma Sultan (d. 12 dekabr 1782 — ö. 11 yanvar 1786)
• Sultan Əbdülhəmidin qızı Aləmşah Sultan (d. 11 oktyabr 1784 — ö. 10 mart 1786)
• Sultan Əbdülhəmidin qızı Əminə Sultan (d. 4 fevral 1788 — ö. 9 mart 1791)
• Sultan Əbdülhəmidin qızı Saliha Sultan (d. 27 noyabr 1786 — ö. 10 aprel 1788)
• Rabiyə Sultan
• Sultan Mustafanın qızı Əminə Sultan (d. 6 may 1808 — ö. 9 noyabr 1808)
• Sultan Əbdülhəmidin xanımı Ruhşah Sultan (ö. 1808)
• Sultan Əbdülhəmidin xanımı Xədicə Sultan (ö. 1807)
• Sultan Əbdülhəmidin xanımı Binnaz Sultan (ö. iyun 1823)
• Sultan Əbdülhəmidin xanımı Mötəbər Sultan (ö. 16 may 1837)
• Sultan Mustafanın xanımı Şevkinur Sultan (ö. 1812)
• Sultan Mustafanın xanımı Səyyarə Sultan (ö. 1817)

• 2018-06-20 at the Wayback Machine
• 2018-06-19 at the Wayback Machine