Orucov Ruzi Mübariz oğlu 1990-cı il 27 yanvar tarixində Ağstafa rayonu Qırılı kəndində dünyaya gəlmişdir. İbtidai təhsilinə Qırılı kəndi adına tam orta məktəbdə başlamış daha sonra 2000-ci ildə Ağstafa rayonu Hüseyn Arif adına musiqi məktəbində xanəndəlik üzrə təhsil almışdır. 2003-cü ildə "Vətəndaşlıq Naminə" qəzetinin təşəbbüsü ilə Astara rayonunda keçirilən Muğam Müsabiqəsində iştirak edərək 1-ci yerin qalibi olmuşdur. Növbəti dəfə 2004-cü ildə İsmayıllı rayonunda təşkil olunmuş rayonlar arası müsabiqəyə qatılaraq "Qrand-pri" mükafatına layiq görülmüşdür. 2005 −2007-ci illərdə musiqi təhsilini davam etdirərək xalq artisti Əlibaba Məmmədovdan xanəndəlik üzrə dərs almışdır. Daha sonra 2007-ci ildə Azərbaycan Dövlət Mədəniyyət və İncəsənət Universitetinin "Solo oxu" fakültəsində ali təhsil alaraq 2011-ci ildə həmin universiteti fərqlənmə ilə bitirmişdir. 2012-ci ildə Azad Azərbaycan TVda yayımlanan "Xalq Ulduzu" muğam müsabiqəsinin laureantı, 2020-ci ildə isə Azərbaycan Respublikası Müdafiə Nazirliyi və Heydər Əliyev Fondunun təşəbbüsü ilə ərsəyə gələn "Qarabağın Səsi" layihəsinin iştirakçısı olmuşdur.