Maxsudəli Maxsudov 15 aprel 1941-ci ildə İmişli rayonunun Bəcrəvan kəndində dünyaya gəlmişdir. Onun ailəsi, müharibə illərinin çətinliklərinə məruz qalmışdır. Atası Abbas kişi, Maxsudəli hələ üç yaşında ikən vəfat etmişdir. Anası Buta xala isə beş övladını böyütmək üçün kolxozda çalışmışdır. Maxsudəli 1948-ci ildə kənd orta məktəbinin ilk sinfinə daxil olmuş, 1958-ci ildə Azərbaycan Dövlət Politexnik İnstitutunun "Sənaye və mülki tikinti" fakültəsinə qəbul olmuşdur.

Maxsudəli Maxsudov ali təhsilini tamamladıqdan sonra 1965-ci ildə Sumqayıt şəhərində yerləşən 1№-li Tikinti Trestində usta kimi əmək fəaliyyətinə başlamışdır. Burada "Metallurq", "İnşaatçı" və "Kimyaçı" pioner düşərgələrinin tikintisi kimi layihələrdə iştirak etmişdir. Daha sonra iş icraçısı, sahə rəisi vəzifələrində çalışmış, Azərbaycan Boru-prokat zavodunda geniş rekonstruksiya işləri aparmışdır. Onun mühəndislik bacarığı nəticəsində 1975-ci ildə idarənin baş mühəndisi vəzifəsinə, 1980-ci ildə isə 1№-li Tikinti Trestinin baş mühəndisi vəzifəsinə təyin edilmişdir.

Maxsudovun rəhbərliyi altında Sumqayıtda və Azərbaycanın digər bölgələrində geniş tikinti-quraşdırma işləri aparılmışdır. O, Sumqayıt Boru-prokat zavodunda yeni texnoloji xəttin, Superfosfat zavodunda sulfat turşusu sexinin və Sintetik Kauçuk zavodunda EP-300 kompleksinin tikintisinə texniki rəhbərlik etmişdir.

1984-cü ildə Maxsudəli Maxsudov respublikanın ən böyük tikinti trestlərindən birinin müdiri təyin edilmişdir. Trestin kollektivi onun rəhbərliyi ilə böyük həcmdə tikinti işlərini uğurla tamamlamışdır.

1988-ci ildə Ermənistanın Azərbaycana qarşı hücum ilə başlayan Qarabağ münaqişəsi dövründə Maxsudəli Maxsudov Sumqayıtın 1№-li Tikinti Trestinin briqadalarını Xocalının bərpasında fəal iştiraka cəlb etmişdir. O, eyni zamanda Qarabağdan köçkün düşmüş ailələrə maddi və mənəvi dəstək göstərmişdir. Maqsudovun tresti müharibə dövründə Şuşa və Laçından gələn məcburi köçkünlərə sığınacaq vermiş və onlara yardım etmişdir.

Maxsudəli Maxsudov tikinti sahəsində uzun müddətli fəaliyyətinə və respublikanın inkişafına verdiyi töhfələrə görə bir çox mükafat və fəxri adla təltif olunub. Azərbaycan Respublikasında xalq təsərrüfatı obyektlərinin inşasında, yenidən qurulmasında görkəmli xidmətlərinə, sənaye sahəsində qazandıqı uğurlara, sosial-iqtisadi inkişafına verdiyi töhfələrə görə "Tərəqqi" medalı ilə təltif edilmişdir. O, 30 ildir ki, "Azərbaycan Respublikasının Əməkdar Mühəndisi" adını daşıyır. 2019-cu ildə Azərbaycan Respublikası Prezidentinin fərdi təqaüdü ilə təltif edilib. Onun rəhbərliyi altında inşa edilən obyektlər bu gün də ölkənin sosial və iqtisadi inkişafında mühüm rol oynayır.

Maxsudəli Maxsudovun ailəsi onun həyatı və uğurlarında əhəmiyyətli rol oynayıb. Yoldaşı Fəridə xanımla bərabər uzun illər ailə qurmuş və xoşbəxt ailə həyatı yaşamışdır. Onların dörd övladı var: Fərəh, Rahim, Rəna və Emin. Hər biri ailə dəyərləri ilə böyüdülərək cəmiyyətə yararlı insanlar olmuşlar.

Maxsudəli müəllim həm də çoxsaylı nəvə və nəticələrin babasıdır. Onun 10 nəvəsi və 4 nəticəsi var. Nəticələrindən ən balacası Miran Maqsudov ailənin sevimli üzvlərindən biridir. Bu geniş və möhkəm ailə Maxsudəli müəllimin həyatı boyunca qazandığı uğurların və ailə bağlarının nə qədər güclü olduğunu göstərir.