Mədxalizm və ya Mədinə camaatı — məşhur sələfi üləması əsərlərindən ilhamlanan sələfi hərəkatı daxilində bir cərəyan. Politoloq Ömər Aşur və bəzi Qərb KİV-ləri "mədxalizmi" dini bir təriqət olaraq təyin edirlər.

Mədxalizm ideologiyasının təməl daşı, öz təbəələrini əsassız zorakılığa məruz qoysa belə, hökumətə şübhəsiz sədaqətdir. Yaxın Şərqdəki diktatura rejimlərinə tez-tez qarşı çıxan digər İslam qruplarından fərqli olaraq, Mədxalitlər bu cür rejimləri açıq şəkildə dəstəkləyirlər.

Bəzi tədqiqatçılar hərəkatın doğulmasını Müsəlman Qardaşlarına və Seyid Qutb (Qutbitlər) tərəfdarlarına qarşı reaksiya ilə əlaqələndirirlər. 1990-cı illərdə Səudiyyə Ərəbistanı və Misir hökumətləri islamçı hərəkatın daha radikal ünsürlərinə qarşı sələfi mədxaliləri dəstəkləyirlər.

Analitiklərin fikrincə, Hollandiyadakı bütün sələfilərin təxminən yarısını mədxalilər təşkil edir. Politoloq Talqat Mamıraymovun fikrincə, Qazaxıstanda ibadət edən müsəlmanların təxminən 5–10%-i sələfilərdir, onların arasında sələfi mədxaliləri üstünlük təşkil edir və onlar öz ardıcıllarını dövlət hakimiyyətinə tamamilə tabe olmağa çağırırlar.