Dəstələrə bölünərək oynanılan bütün oyunlar halay ilə başlanır. Əvvəlcə dəstəbaşılar seçilir. Dəstəbaşı iki cür təyin olunur: ya onları oyunçular özləri seçirlər, ya da ümumi razılıq ilə (oyunda və uşaqlar arasında müəyyən keyfiyyətləri ilə fərqlənənləri), çox hallarda isə (əgər oyunçular bir-birini tanımırlarsa) püşk yolu ilə seçirlər.

Dəstəbaşılar təyin olunduqdan sonra dəstələrə bölünmək üçün halaya gedirlər. Oyunçular qol-qola girib, sonra bir yana çəkilirlər. Onlar xəlvəti öz aralarında kimi necə adlandırmaq (məsələn, kimin "armud", kimin "alma") barədə şərtləşib dəstəbaşıların durduğu yerə gəlir və deyirlər:

— Halay gəlmişik.

Dəstəbaşının biri digərinə :

— Gəl! (yəni qəbul et) — deyir.

O biri cavabını verir.

— Gəldim!

Halay gələnlər:

— Kimə "armud", kimə "alma"?

— Mənə armud!

"Armud" adlandırılan oyunçu keçir onun dəstəsinə, "alma" adlandırılan oyunçu isə digər dəstəbaşının arxasında dayanır. Beləliklə oyunçular dəstələrə ayrılır.

• Novruz bayramı ensklopediyası. Bakı-2008 (Şərq-Qərb). səh.91.