Azərbaycan müstəqilliyini əldə etdikdən sonra keçirilən seçkilərdə seçki mahnılarından çox istifadə olunmayıb. Adətən siyasi partiyaların marşları və himniləri daha çox səsləndirilsə də, bəzən seçki mahnılarına da üz tutulub. Azərbaycanda 2002-ci ildən sonra proporsional seçki sisteminin ləğvi də siyasi partiyaların təşviqat zamanı seçki mahnılarından istifadəsinə yol açmayıb.

Yeni Azərbaycan Partiyası bir müddət himn əvəzinə sözləri Zəlimxan Yaquba, musiqisi Nailə Mirməmmədliyə aid olan "Yeni Azərbaycanım" mahnısını istifadə etmişdir. VII Qurultaydan sonra, 7 noyabr 2023-cü il tarixində Yeni Azərbaycan Partiyasının yeni himni təqdim olunmuşdur. Bu himnin sözləri Baba Vəziroğluna, musiqisi isə Faiq Sücəddinova aiddir.

YAP seçkilərdə və mitinqlərdə Müslüm Maqomayevin "Azərbaycan" mahnısından və Tünzalə Ağayevanın "Mən fəxr edirəm ki, Azərbaycanlıyam!" mahnısından geniş istifadə etmişdir.

Mələkxanım Eyubova Yeni Azərbaycan Partiyası ilə bağlı "Vurulmuşam" albomunda mahnı ifa etmişdir. Bu mahnıdan da partiya istifadə etmişdir.

Heydər Əliyev

1998-ci ilin may ayının 10-da sözləri Baba Vəziroğluna, musiqisi isə Kəmaləddin Heydərova aid olan "Xalq Heydər söyləyəcək" mahnısı Heydər Əliyevin 75 illik yubileyi səbəbi ilə yayımlanmışdır. Bu mahnı 1998-ci il prezident seçkilərində təşviqat zamanı istifadə olunmuşdur.

İlham Əliyev

2003-cü il prezident seçkilərində İlham Əliyev üçün "Sabaha İlhamla" adında seçki mahnısından istifadə olunmuşdur. Musiqisi Eldar Mansurova, sözləri İkram Əliyevə aid olan mahnının ifaçıları Aygün Bəylər, Tünzalə Ağayeva, Zülfiyyə Xanbabayeva, Almaz Ələsgərova, Mübariz Tağıyev, və Rüfət Mehdiyev olmuşdur.

Azərbaycan Xalq Cəbhəsi Partiyasının sələfi olan Azərbaycan Xalq Cəbhəsi Meydan hərəkatı zamanı və sonrakı seçkilərdə də Üzeyir Hacıbəyovun "Koroğlu" uverturasından istifadə etmişdir.

Daha sonralar AXCP "Elçibəy havası" və ya "Bəy rəqsi" adlanan musiqidən geniş istifadə etməyə başladı. Bəzi şəxslər tərəfindən bu musiqi ermənilərə aid edilsə də sənətşünaslıq üzrə fəlsəfə doktoru Rauf Bəhmənli bu musiqinin yallı olduğunu, adının "Urfalı" olduğunu, Türkiyənin Şanlıurfa vilayətinə aid olduğunu, hazırda "Yarcan" adında tanındığını söyləmişdir. O, yallının iki hissəli olduğunu, ölkəmizdə 1950-ci illərdə istifadə olunmağa başlandığını, 1957-ci ildə isə Ermənistan Sovet Sosialist Respublikası və Naxçıvan Muxtar Sovet Sosialist Respublikası ərazisində bu yallının birinci hissəsinin marş kimi "Qırmızı komsomol" adında istifafə olunduğunu söyləmişdir. Bu marş bugünə Reyhanlı kəndində doğulmuş Ələddin Həsən oğlu Tağıyevin ifasında gəldiyini qeyd etmişdir.

Müsavat Partiyası 1994-cü ildən bəri sözləri Ramiz Rövşənə, musiqisi isə Cavanşir Quliyevə aid olan himni istifadə edir. Bu himni Aygün Kazımova və Nəsir Əhmədli oxumuşdur.

Müsavat Partiyası 2000-ci il parlament seçkilərində təbliğat-təşviqat zamanı xüsusi melodiyadan istifadə etmişdir.

Azərbaycan Demokrat Partiyası 1990-cı illərin əvvəlində musiqisi Cavanşir Quliyevə aid olan himni istifadə etmişdir, lakin daha sonra Quliyev himni geri çağıraraq ləğv etmişdir.

2003-cü il prezident seçkilərində prezidentliyə namizəd Azərbaycan Milli İstiqlal Partiyası lideri Etibar Məmmədov üçün "Etibarlı Gələcək" mahnı-marşı yazılmış və təbliğat-təşviqat üçün bu mahnıdan istifadə olunmuşdur.

Vətəndaş Həmrəyliyi Partiyası sözləri Elçin Mirzəbəyliyə aid olan, musiqisi isə Heyratı olan Azadlıq Marşından istifadə edir.

Respublikaçı Alternativ Partiyası 2017-ci ildə sözləri Xalid Bağırova, musiqisi Nəriman İsayevə aid olan "Respublikaçı" marşını yayımlamışdır.

2020-ci il parlament seçkilərində Respublikaçı Alternativ Partiyasının Məclisinin sabiq başqanı, rəsmi olmayan "Hərəkat" Seçki Blokunun 17 saylı Yasamal Üçüncü seçki dairəsi üzrə deputatlığa bitərəf namizədi Azər Qasımlı "Siz deyən olsun!" Marşından təbliğat-təşviqat boyunca seçki mahnısından istifadə etmişdir.