Əbdürrəhman Yalçınqaya 1950-ci ildə mart ayının 10-da Türkiyənin Şanlıurfa şəhərinin kəndində anadan olub. Ankara İldırım Bəyazid adına liseyi bitirdikdən sonra eyniadlı universitetin Hüquq fakültəsinə daxil olan Əbdürrəhman universiteti 1973-cü ildə bitirdikdən sonra Tuzla şəhərində qısa müddət ərzində hərbi xidmətini başa vurmuşdur.

Ankarada namizəd hakim kimi fəaliyyətə başlayan Yalçınqaya əvvəlcə Acıpayam və Bulanık vilayətlərində hakimlik etmişdir. Daha sonra Gürün Ağır Cinayətlər üzrə Məhkəmənin sədri, Gürün Ədliyyə Prokurorluğu Ədalət komissiyasının sədri, Silifkə hakimi və digər məsul vəzifələri icra etmişdir. 1998-ci ilin aprel ayının 14-də prokurorluğa qəbul edilən Əbdürrəhman Yalçınqaya Prokurorluğun VII Cəza dairəsinin nümayəndəsi ikən Prokurorluq Rəyasət Heyəti tərəfindən göstərilən namizədlər arasından 2004-cü ilin iyun ayının 21-də dövrün prezidenti tərəfindən baş prokurorluğa qəbul edilir. O, hazırda bu vəzifəsini icra edir. Əbdürrəhman Yalçınqaya ingilis dilini mükəmməl bilir. Evlidir, iki övladı var.

Əbdürrəhman Yalçınqaya AKP-nin bağladılması işindən əvvəl DTP-nin də bağladılması üçün məhkəməyə müraciət edib. Dinay qəbiləsindən olan Yalçınqayanın bir qardaşı baxımsızlıq ucbatından vəfat edib. Əbdürrəhman Yalçınqayanın Dəclə universitetinin Deontologiya fakültəsində pedaqoq kimi fəaliyyət göstərən digər qardaşı Dr. Hüseyn Tuncer Yalçınqaya 1999-cu ildə iş otağında ölü tapılıb. Onun sosialist təşkilat ilə əlaqəli olduğu və ultrasağ təşkilatlardan biri tərəfindən qətlə yetirildiyi ehtimal edilir. Əbdürrəhman Yalçınqaya məşhur adam deyildi. Ancaq ölkənin hakim Ədalət və İnkişaf partiyasının fəaliyyətinə xitam verilməsi barədə məhkəmədə iddia qaldırdıqdan sonra bir anda məşhurlaşdı. Mənbələrin qeyd etdiyinə əsasən Yalçınqaya Türkiyədə məhz bu hadisədən sonra ən çox təbrik edilən, ən çox qarğışa məruz qalan, ən çox tənqid və təhqir edilən insandır. Keçmişi haqqında indiyədək gündəmə gəlməyən prokuratura ittihamçısının şəxsi həyatı məhz "bağlatma" hadisəsindən sonra qəzet səhifələrində, internet saytlarında geniş müzakirə olunmağa başladı. Ə. Yalçınqayanın avtobioqrafiyası ilə maraqlanan jurnalistlər bir sıra maraqlı faktlar əldə ediblər. Dövlət ittihamçısının doğulduğu kəndin sakinləri onun yaxşı bir ailənin nümayəndəsi olduğunu qeyd ediblər. Belə ki, Ə. Yalçınqayanın kiçik qardaşı Baqir bəy həmyerliləri tərəfindən böyük hörmət-izzət görən bir şəxs olub. Suruç kənd sakinləri Baqir bəyin ibadətlərini heç vaxt axsatmayan, əlindən gəldiyi qədər hər kəsə kömək etməyə çalışan, kəndliləri arasında böyük hörmət yiyəsi olan, çox oruc tutan saleh bir şəxs olduğunu bildiriblər. Baqir Yalçınqaya ölümündən bir neçə ay əvvəl ağır xəstəliklə yorğan-döşəyə düşür. Ancaq kənd sakinləri Ankarada yaşayan Əbdürrəhman Yalçınqayaya dəfələrlə xəbər göndərmələrinə baxmayaraq, Yalçınqaya qardaşını ziyarət etməyə gəlmir. Yalçınqayanı həmyerlilərinin gözündn düşməsinə səbəb olan da elə bu hadisə olub. Kənd sakinlərinin qeyd etdiyinə görə, Əbdürrəhman kiçik qardaşı Baqirlə maraqlanmır, onun xəstə olması haqqında xəbərlər ona çatdırıldıqda "Ciddi bir şey yoxdur, keçib gedəcək" deyir. Ancaq bir müddət sonra qardaşı vəfat edir. Maraqlıdır ki, Yalçınqayanın vəfasızlığı bununla da bitmir. Mənbələrin bildirdiyinə görə, kiçik qardaş Baqir bəy vəfat edəndə belə Əbdürrəhman onun cənazəsinə gəlməyib. Nə qədər xəbər göndərirlərsə, yenə də bir xeyri olmur. Kənd sakininin bildirdiyinə görə, Baqir bəy vəfat anında belə qardaşına bəddua etməyib. "Allah ona hidayət versin!" — deyə haqqın dərgahına qovuşub. Bağlatma işi ilə Türkiyədə bir anda məşhurlaşan Ə. Yalçınqaya barəsində maraqlı faktlar bununla bitmir. Belə ki, Rəcəb Tayyib Ərdoğanın sədri olduğu ƏİP-ı bağlatmaq istəyən Əbdürrəhman Yalçınqayanın anası da başı örtülü xanım olub. Digər tərəfdən, hazırda dövlət ittihamçısının katibəsi olan xanım da baş örtüsü geyinir. Türkiyə mətbuatında yer alan məlumatlarda katibənin işə baş örtüyü ilə gəldiyi, ancaq dövlət müəssisəsinə daxil olduğu zaman onu açdığı bildirilir.