Qızıl payız-71 musiqi festivalı 2 oktyabr 1971-ci ildə başlandı. Həvəskar bəstəkarlar İ. Kərimov, R. Bünyadzadə, F. Qədimov laureat medalları aldılar. Festivalda ilk dəfə bəstəkar kimi çıxış etmiş müğənni R. İsrafilbəyova ifa etdiyi "Sənsiz" mahnısı üçün laureat adı aldı. Münsiflər heyəti peşəkar bəstəkarlar içərisindən "Sevimli küçəm" mahnısının müəllifi, "Qızıl payız" festivalında ilk dəfə çıxış edən N. Bağırova üstünlük verdilər. Balaxanı qəsəbəsindəki mədəniyyət evinin "Təravət" ansamblını, Buzovna Neft və Qaz Çıxarma İdarəsinin neftçisi C. Cəfərquliyev, Ağdam orta məktəbinin müəllimi S. İbrahimov, "Məşəl" ansamblının solisti Ruhəngiz Musəvi, respublika xarici turizm idarəsinin işçisi G. Ələkbərova laureat adı qazandılar. Estrada mahnıları ifaçılarının yarışmasında Riqanın Popov adına radiozavodunun «Menuet» estrada ansamblını münsiflər heyəti qaliblər sırasına daxil etdilər. Həmin ansamblın solisti İ. Sirtsenis də festivalın laureatı oldu. N. Nərimanov adına Azərbaycan Tibb Universitetinin "Eskulap" orkestri isə ikinci dəfə "Qızıl payız" laureatı adına layiq görüldü. Bakı limanının, respublika Rabitə Nazirliyinin, S. M. Kirov adına Azərbaycan Dövlət Universitetinin («Şimşək») estrada kollektivləri də laureat adını aldılar. Vokalçılar müsabiqəsində V. Abdullayev, Q. Barinova, Q. Sarkisova, E. Muradov, qalib çıxdılar. Festivalın proqramı caz kollektivləri tərəfindən tamamlandı. T. Ələkbərovun, Vaqif Mustafazadənin və E. Qriqoryevin idarə etdikləri ansambllar müvəffəqiyyət qazanmışlar. Universitetin «Şimşək» ansamblının üzvü İ. Qoryaçev ən yaxşı fleytaçalan, Yeni Bakı neftayırma zavodunun «Brevis» estrada kollektivinin nümayəndəsi L. Andriasov ən yaxşı orqançalan sayıldı.

Estrada musiqisi turunda İliç adına mədəniyyət sarayının «Ritm» vokal-instrumental ansamblı R. Rüstəmzadənin «Pəri» mahnısını ifa etdilər. Daha sonra ansamblın solisti Q. Barinova Kolkerin «Etiraf», Gerşvinin «Laylay» mahnılarını oxudu. Ansambl proqramın sonunda «Rekviyem» musiqi kompozisiyasını səsləndirdi. M. Əzizbəyov adına Azərbaycan Neft və Kimya İnstitutunun «Üç alov» estrada ansamblının müşayiəti ilə solist Elmar Muradov Oqtay Kazımovun «Qocalır anam» mahnısını Emin Sabitoğlunun «Bayatılar»ını oxudu. Ansambl öz çıxışını «Mən elə şadam ki» musiqi kompozisiyası ilə başa çatdırdı.

Birinci turun konsertində N. Nərimanov adına Azərbaycan Tibb Universitetinin «Eskulap» estrada ansamblının solisti Cavanşir Zeynallı Şekotovun «Heç kim, heç nə unudulmamışdır» , Gerşvinin «Samtayms» mahnılarını oxudu. B. Səmədov isə C. Zeynallının «Yenə sənin gözlərində» mahnısını ifa etdi. Konsertdə iştirak edən kollektivlərdən biri də Riqadan gəlmiş «Menuet» vokal instrumental ansamblı idi. Əvvəlcə ansambl İmant Kalninşin «Kukuşka səsi» musiqi kompozisiyasını səsləndirdi. Solist İlona Balnya Litva bəstəkarlarının bir neçə mahnısını oxudu. İlqant Sirtsenıs isə İldıs Lapşının «Sənin gözlərinin atəşi», R. Qibbin «Heç bir şey demə» mahnılarını ifa etdi. Ansamblın səsləndirdiyi mahnılardan biri də Azərbaycan bəstəkarı Tofiq Babayevin «Xədicə» mahnısı oldu.

S. M. Kirov adına Azərbaycan Dövlət Universitetinin «Eksperiment» vokal-instrumental ansamblı «Həmişə hazır ol» musiqi kompozisiyasını ifa etdi. Solist Eldar Axundov xarici ölkə bəstəkarlarının bir neçə mahnısını oxudu.

Festivalın ikinci turunda Azərbaycan bəstəkarlarının xalq çalğı alətləri ansamblları üçün yazdığı mahnılar, xalq musiqisi, muğam və təsniflər səsləndirildi. Müsabiqədə şəhərin özfəaliyyət kollektivləri ilə yanaşı respublikasının rayonlarından gəlmiş həvəskar müğənnilər də çıxış etdilər.

D. Bünyadzadə adına Azərbaycan Dövlət Xalq Təsərrüfatı İnstitutunun simfonik-caz orkestri III Bakı caz musiqisi festivalında yeganə kollektiv idi ki, solist ilə birlikdə çıxış edirdi. Albert Avadayevin rəhbərlik ilə gənc musiqiçilər Erol Qarmerin «Duman», Kerin «Göy qurşağı önündə» Dyuq Ellinqtounun «Sətin kukla» əsərini ifa etdilər. Kollektivin solisti Mənsur Qasımovun oxuduğu mahnılar dinləyicilər tərəfindən müsbət qarşılanmışdı.

Azərbaycan radiosu və televiziyası caz kvarteti – saksafonçu Tofiq Şabanov, kontrabasçı Pərviz Həsənov, zərb alətlərində çalan Hüseyn Əliyev, kvartetin bədii rəhbəri, pianoçu Faiq Sücəddinov öz proqramlarına bəstəkarlardan O. Kazımovun «Rəqs ritmləri»ni və D. Qerşvinin bir neçə əsərini daxil etmişdilər. Bundan başqa F. Sücəddinov özünün «İçərişəhər» əsərini də fortepianoda çaldı. Vaqif Mustafazadənin rəhbərlik etdiyi «Qafqaz» caz triosu bəstəkar Rauf Hacıyevin «Çiçək kimi», habelə Frenk Rosalinin «Bədbin Daniyel» əsərlərini və Vaqif Mustafazadənin «Festival» və «76» melodiyalarını səsləndirdilər. Vaqif Mustafazadə burada piano parçaları da ifa edirdi. Konsertdə Moskvadan gəlmiş «KM» kvarteti də çıxış etdi. Onun üzvləri Üzeyir Hacıbəyov adına Azərbaycan Dövlət Konservatoriyasını bitirdikdən sonra Moskvaya getmiş və orada bu kvarteti yaratmış tenor-saksafonçu Vladimir Sermakaşev, fortepianoçu Vladimir Koçarov, zərb alətlərində çalan Valeri Baqiryan və kontrabasçı Yuri Tuşinski öz proqramlarında V. Sermakaşevin «Köhnə blyuz», «Sənin təbəssüm günü», habelə sovet və xarici ölkə bəstəkarlarının əsərlərini daxil etmişdilər.