Uçida Kuiçi (内田 九一?, 1844, Naqasaki – 17 fevral 1875, Suruqaday[d], Tokio) – Yaponiya portret və peyzaj fotoqrafı. Yaponiyada fotoqrafiyanın qabaqcıllarından biri olmuşdur. İmperator Meycinin ilk rəsmi fotoportretini çəkmişdir.
| Uçida Kuiçi | |
|---|---|
| yap. 内田九一 | |
| Doğum tarixi | 1844[1][2][…] |
| Doğum yeri | |
| Vəfat tarixi | 17 fevral 1875[3] |
| Vəfat yeri | |
| Vəfat səbəbi | ağciyər iltihabı |
| Fəaliyyəti | fotoqraf |
| Fəaliyyət illəri | 1860–1875 |
 Vikianbarda əlaqəli mediafayllar | |
Uçida Kuiçi təxminən 1844-cü ildə doğulmuşdur.[a] Atası vəba xəstəliyindən öldükdən[5] sonra dayısı Yoşio Keysay tərəfindən himayəyə götürülmüşdür. Yoşio hollandların Naqasakidə yerləşən tibb məktəbində təhsil alırdı və fotoqrafiyanı öyrənirdi. Uçida dayısının təsiri ilə holland dilinə və fotoqrafiyaya maraq göstərməyə başlamışdır.[4]
Uçida hollandların tibb məktəbində Pompe van Meerdervoortun şagirdi olmuş və Ueno Hikoma ilə tanış olmuşdur. O, 1863-cü ildə fotoqrafiya ləvazimatlarının idxalı biznesi qurmuş və 1865-ci ildə Kobeyə köçərək Ueno Hikomanın qardaşı Ueno Saçima ilə birlikdə fotostudiya açmışdır. 1865-ci ildə Osakaya köçmüş[4] və Osakadakı ilk fotostudiyanı açmışdır.[b][6] Osaka qəsrində Tokuqava şoqunluğuna xidmət edən samurayların fotoportretlərini çəkməyə başlamışdır. Okubo adlı yerli hakimə kömək edərək samuray statusu əldə etmişdir. 1868-ci ildə Yokohamaya köçərək samurayların fotoportretlərini çəkməyə davam etmişdir. 1869-cu ildə Tokionun Asakusa bölgəsində fotostudiyasının yeni şöbəsini açmışdır.[4]
Uçidan reputasiya getdikcə böyümüş və İmperator Evi Agentliyi tərəfindən Edo qəsrinin fotolarını çəkməklə vəzifələndirilmişdir.[4] 1872-ci ilin mayında İmperator və İmperatriça Meycinin ilk rəsmi fotoportretlərini çəkmiş, 17 oktyabr onların 72 fotosunu təqdim etmişdir.[9][4] Həmin il mərkəzi Yaponiya və Kyuşuya səfər edən imperatoru müşayiət etmək və səfərin fotolarını çəkməklə vəzifələndirilmişdir.[4] İmperator birinci avtoportretdə ənənəvi geyimdə təsvir olunduğu üçün dövlət rəsmiləri bunun Yaponiyanı geridəqalmış ölkə kimi göstərəcəyindən narahat olmuşdurlar.[8] Bu səbəbdən Uçida 8 oktyabr 1873-cü ildə növbəti dəfə İmperator Meycinin rəsmi fotoportretini hazırlamışdır.[9] Bu avtoporetdə imperator Qərb geyimində və saç düzümündə çəkilmişdir.[8]
Uçida portret və peyzaj fotoqrafı kimi tanınmış, dövrünün ən yaxşı yapon fotoqraflarından biri hesab olunmuşdur.[10] Studiyası tez-tez xaricilər tərəfindən ziyarət olunurdu. O, 17 fevral 1875-ci ildə ağciyər iltihabı səbəbilə ölmüşdür. Ölümündən sonra neqativlərinin çoxu Kusakabe Kimbey tərəfindən,[11] studiyası isə Kitaniva Tsukuba tərəfindən satın alınmışdır.[12]
-
İmperator Meycinin avtoportreti (1872) -
"Naqasakinin mənzərəsi" (1872) -
"Nakaşima çayı" (1870) -
"Decima adası" (1870)
- ↑ Uchida Kuichi // RKDartists (nid.).
- ↑ Uchida Kuichi // Photographers’ Identities Catalog.
- ↑ 1 2 RKDartists (nid.).
- ↑ 1 2 3 4 5 6 7 Bennet, 2006. səh. 77
- ↑ Bennet, 1996. səh. 54
- ↑ 1 2 Bennet, 2006. səh. 128
- ↑ Bennet, 2006. səh. 317
- ↑ 1 2 Keene, Donald. Emperor of Japan: Meiji and His World, 1852-1912. Columbia University Press. 2002. səh. 237, 773. ISBN 9780231123402. İstifadə tarixi: 22 noyabr 2024.
- ↑ Bennet, 2006. səh. 16
- ↑ Bennet, 2006. səh. 80
- ↑ Bennet, 2006. səh. 195
- Bennett, Terry. Photography in Japan: 1853–1912 (ingiliscə). Tuttle Publishing. 2006. 76–81. ISBN 0-8048-3633-7. İstifadə tarixi: 22 noyabr 2024.
- Hannavy, John. Encyclopedia of Nineteenth-Century Photography (ingiliscə). Routledge. 2008. səh. 1415. ISBN 0-415-97235-3. İstifadə tarixi: 22 noyabr 2024.
- Bennett, Terry. Early Japanese Images (ingiliscə). Kodansha International. 1996. 54–56. ISBN 9780804820332. İstifadə tarixi: 22 noyabr 2024.