Sulaq

Sulaq — yer örtüyü daimi olaraq, illər və ya onilliklər ərzində və ya yalnız mövsümi olaraq su altında qalan və ya su ilə doymuş ekosistemdir. Daşqınlar əsasən torpaqlarda oksigensiz (anoksik) proseslərin baş verməsi ilə nəticələnir ^[1]. Sulaqlar su hövzələri ilə quru torpaqlar arasında keçid zonasını təşkil edir. Buradakı bitkilər köklərinin oksigendən kasad sulu torpaqlara uyğunlaşmasına görə digər quru və ya su ekosistemlərindən fərqlənir^[2]. Bu ekosistemlər geniş çeşiddə su və yarı-su bitki və heyvanları üçün habitatlar təşkil edir və ekosistemlərin arasında müxtəlifliyin ən yüksək olduğu ərazilərdən sayılır. Bitkilər sulaqlarda nitratlar və fosfor kimi qida maddələrinin ifrat dərəcədə toplanmasının qarşısını aldığına görə burada su keyfiyyəti də yüksək olur^[3].