Siniti Fucimura (yapon. 藤村 新) — yapon arxeoloqu kimi tanınan, lakin sonradan fırıldaqçılığı ifşa edilən şəxs. O, uzun illər Yaponiyanın Paleolit dövrünə aid tarixi tapıntıları ilə məşhurlaşmış və "İlahi Əllər" ləqəbini qazanmışdı.[1]
| Siniti Fucimura | |
|---|---|
| yapon. 藤村 新 | |
| Doğum tarixi | 4 may 1950 (75 yaş) |
| Doğum yeri | |
| Milliyyəti | yapon |
| Elm sahəsi | arxeologiya |
| Tanınır | İlahi Əllər |
4 may 1950-ci ildə Miyaqi prefekturasında dünyaya gəlib. Gənc yaşlarında Yapon tarixi ilə maraqlanmağa başlayıb və arxeologiyanı müstəqil şəkildə öyrənib. 1975-ci ildə "Sekki Bunka Kenkyukai" adlı qeyri-hökumət təşkilatını yaradıb və arxeoloji qazıntılara başlayıb. Qısa müddət ərzində o, dünyanın müxtəlif yerlərindən olan tədqiqatçıların diqqətini çəkən möhtəşəm tapıntılar etməyə başlayıb. 50 yaşına çatanda isə artıq Yaponiyanın aparıcı arxeoloqlarından biri kimi tanınıb.[2]
2000-ci ildə "Mainichi Shimbun" qəzeti gizli kameralar vasitəsilə onun arxeoloji qazıntılar zamanı saxta artefaktları torpağa basdırıb sonra tapdığı görüntüləri yayımladı.[3] Bu ifşa nəticəsində məlum oldu ki, Fucimura müxtəlif dövrlərə aid artefaktları başqa yerlərdən toplayıb öz qazıntı yerlərində basdırırmış. O, Kamitakamori və digər 42 qazıntı sahəsində bu cür fırıldaqçılıq edib və Yaponiyanın Paleolit dövrü haqqında elmi araşdırmalara böyük zərbə vurub.
Skandalın təsiri böyük oldu. Yapon Arxeoloji Assosiasiyası Fucimuranı üzvlükdən çıxardı[2][4] və onun işlərinin yenidən qiymətləndirilməsi üçün üç il ərzində araşdırmalar apardı. Nəticədə, bir çox muzeylər onun təqdim etdiyi eksponatları sərgilərindən çıxardılar və məktəb dərslikləri yenidən yazıldı.
Fucimura ictimaiyyət qarşısında göz yaşları içində üzr istədi və fırıldağını "Şeytanın təsiri" adlandırdı. Lakin bu hadisə Yaponiyanın akademik mühitində məlumat paylaşımının və tənqidi yanaşmanın çatışmazlıqlarını da üzə çıxardı, çünki onun saxta kəşfləri illərlə elmi ictimaiyyət tərəfindən qəbul olunmuşdu.[1]
- ↑ 1 2 "The Scientific Hoax That Rocked Japan". 01.04.2025 tarixində arxivləşdirilib.
- ↑ 1 2 "The Stone Age Discoveries of Shinichi Fujimura". 01.04.2025 tarixində arxivləşdirilib.
- ↑ "Archaeologist Faked Important Discovery". 01.04.2025 tarixində arxivləşdirilib.
- ↑ "Shinichi Fujimura". İstifadə tarixi: 01.04.2025.