Rut V. Hill (24 oktyabr,1898 – 15 yanvar, 1995) – tarixi banknotların toplanması üzrə ixtisaslaşmış amerikalı numizmat. Kolleksiyaçılar tərəfindən "Şimali Amerikada kağız pul toplanması işində böyük xanım" kimi tanınan Hill, geniş numizmatik kolleksiyasına və kişi üstünlük təşkil edən bu sahədə qadın kimi öncül fəaliyyətinə görə yüksək dəyərləndirilmişdir.[1][2] O, banknot kolleksiyaçısı və kağız valyutası üzrə aparıcı tədqiqatçılardan biri olmuş, 1950-ci illərdən ölümünə qədər numizmatika cəmiyyətinin fəal üzvü kimi çalışmışdır. Onun kolleksiyası nadir və ən geniş kolleksiyalardan biri hesab edilirdi.[3]
| Rut V.Hill | |
|---|---|
| Doğum tarixi | 24 oktyabr 1898 |
| Doğum yeri | |
| Vəfat tarixi | 15 yanvar 1995 (96 yaşında) |
| Vəfat yeri | |
| Fəaliyyəti | numizmat |
Rut Hill Texasda doğulmuş və həyatının müxtəlif dövrlərində Corciya və Floridada yaşamış, daha sonra əri Adolf B. Hill ilə birlikdə Sent-Luisdə məskunlaşmışdır.[4] Onun əri xüsusi mürəkkəb istehsal edən bir şirkətin nümayəndəsi kimi banklarla işləyirdi. Məhz ərinin Mexiko bankı ilə olan işgüzar əlaqələri Rut Hillin kağız pulların tədqiqi və kolleksiyaçılığına maraq göstərməsinə səbəb olmuşdur.[4]
1950-ci illərdə ərinin vəfatından sonra, Hill banknotlara olan marağını genişləndirmiş, sikkə sərgilərinə qatılmağa və inkişaf etməkdə olan Amerika numizmatika icması ilə əlaqələr qurmağa başlamışdır.[5] Həmin dövrdə numizmatika sahəsində çox az qadın fəaliyyət göstərirdi və Hill ilk iştirak etdiyi numizmatika sərgilərində özünü yad hiss etdiyini qeyd etmişdir.[6]
Lakin tez bir zamanda onun kolleksiyası ən nadir banknotları əhatə edərək genişlənmişdir.[7] Hill, numizmatika icmasının yeni üzvlərinə kömək etməsi və banknot tədqiqatlarında əhəmiyyətli rol oynaması ilə tanınırdı. O, orta məktəb şagirdləri arasında kolleksiyaçılığı təşviq etmək üçün kolleksiyalarından da istifadə edirdi.[3]
1966-cı ildə Hill, Beynəlxalq Banknot Cəmiyyətini (BBC) maliyyə çöküşündən xilas etmişdir. Bu təşkilatla olan yaxın əlaqələri nəticəsində BBC-nin idarə heyətinə üzv seçilmiş və 1979-1981-ci illərdə prezident olmuşdur.[5] Bundan əlavə, o, Kağız pul kolleksiyaçıları cəmiyyəti və Amerika numizmatika cəmiyyətində də fəal rol oynamışdır.[8]
Rut Hill yanvar 1995-ci ildə Sent-Luisdə 96 yaşında vəfat etmişdir.[9] Onun Amerika və beynəlxalq banknotlardan ibarət kolleksiyası qismən hərraca çıxarılmış, qalan hissəsi isə gələcək nəsil kolleksiyaçılar üçün qorunmuşdur.[7] 2010-cu ildə Beynəlxalq Banknot Cəmiyyəti (BBC) tərəfindən ömürlük fəxri direktor adına layiq görülmüş və BBC Şöhrət zalına daxil edilmişdir.[7]
Rut Hillin geniş kolleksiyasına nadir və dəyərli banknotlar daxil idi, o cümlədən:
- 1951-ci ilə aid 10,000 yuanlıq Çin banknotu, 199,750 dollara satılmışdır və "sadəcə olaraq Çin Xalq Respublikasının birinci seriyasının ən nadir banknotu" kimi təsvir edilmişdir.[1]
- 1925-ci il Zənzibar 10 rupi banknotu, 64,625 dollara satılmışdır.[1]
- 1914-cü ildə Avstraliya işğal qüvvələri tərəfindən çap edilmiş Alman Yeni Qvineyası 10 mark banknotu, 49,937.50 dollara satılmışdır.[10]
- 1933-cü il Siçuan Əyalət İşçi və Kəndli Bankına aid parça üzərində çap olunmuş 1 yuanlıq banknot, 18,800 dollara satılmışdır.[10]
- ↑ 1 2 3 "Chinese 10,000-yuan note from Ruth Hill Collection brings $199,750". Coin World. İstifadə tarixi: 2017-04-19.
- ↑ "Ruth Hill collection to be featured". Numismatic News (ingilis). 2014-04-08. İstifadə tarixi: 2017-04-19.
- ↑ 1 2 "Ruth W. Hill Collection Of World Notes Debuts At Heritage Auctions Central States Event". Heritage Auctions. Heritage Auctions. İstifadə tarixi: 10 June 2017.
- ↑ 1 2 E-Sylum. "The E-Sylum (2/16/2014)". Newman Numismatic Portal. İstifadə tarixi: 10 June 2017.
- ↑ 1 2 "Ruth Hill (2010)". The International Bank Note Society. International Banknote society. İstifadə tarixi: 7 June 2017.
- ↑ Company, Collectibles Technology. "Newman Numismatic Portal at Washington University in St. Louis | Comprehensive Research & Reference for U.S. Coinage". nnp.wustl.edu. İstifadə tarixi: 2017-05-03.
- ↑ 1 2 3 "RECALLING THE 'GRAND OLD LADY' OF BANK NOTES: RUTH WALDEN HILL". Coin World. Coinworld. İstifadə tarixi: 10 June 2017.
- ↑ "Ruth W. Hill Collection Of World Notes Debuts At Heritage Auctions Central States Event". www.ha.com (ingilis). İstifadə tarixi: 2017-04-19.
- ↑ "Ruth W Hill SSDI". Family Search. İstifadə tarixi: 19 June 2017.
- ↑ 1 2 "Rarity and quality highlight Hill sale". www.numismaster.com. İstifadə tarixi: 2017-04-19.