Rosa glanduloso-setosa

Avropada, Qafqazda təbii halda yayılmışdır.

Hündürlüyü 20-25 sm, gövdəsinin qabığı tünd qonur olan kolcuqdur. Tikanları iynəşəkilli, qılçıqlı, vəzicikləri oturaqdır. Orta yarpaqların uzunluğu 4-7 sm-dir. Xırda yarpaqları 7 ədəd, alt cütlükdə inkişaf etməmişdir, digərləri bir-birindən uzaqdır. Uzunluğu 0,7-1,8 sm, eni 0,4-1,2 sm, enli-yumurtavari, sarımtıl-yaşıl, üstü çılpaq və hamar, alt tərəfi tükcüklü, oturaqdır. Yalançı zoğları ensizdir, əsas oxu tükcüklü vəziciklərlə örtülmüşdür. İyun-iyul aylarında çiçəkləyir. Çiçəkləri tək, bəzən 2-dir. Çiçək saplağının uzunluğu 1,5 sm, vəziciklidir. Çiçək altlığı yaxşı inkişaf edərək çiçək saplağını örtür. Kasayarpaqları bütöv, uzunluğu 2,5-3 sm, alt tərəfdən tükcüklü, üstdən çox vəzicikli, alt tərəfində qılçıqlıdır, çiçəklədikdən və meyvə yetişdikdən sonra yuxarıya istiqamətlənmişdir. Ləçəkləri tünd çəhrayıdır. Sütuncuqların başı oturaq, keçəli tükcüklüdür. Meyvələri (hipantiləri) şarşəkillidir, yetişdikdə tünd qırmızı rəngdə olur.

Dəniz səviyyəsindən 1550 m hündürlükdə, dağların qərb yamacında bitir. İstyə, soyuğa, davamlıdır.

Lerik rayonunun Orant və Nisli kəndində, həmçinin Lənkəran çay ətrafında yayılmışdır.

Ləçəklərindən alınan yağdan tibbdə istifadə edilir.