Boz meşə torpaqlar — Şimali Amerikanın Atlantik okeanı sahili ərazilərində və Avrasiyanın Avropadan Baykalətrafı rayona qədər ərazilərində yayılmış topraq tipi.
Boz torpaqlar kontinental iqlim şəraitində inkişaf etmişdir.
Meşə döşənəyi kül elementləri ilə zəngin olub, əsasən ağac və ot qalıqlarından ibarətdir. Onun qalınlığı adətən 1–2 sm arasında dəyişir. Humus horizontu isə boz və ya tünd rəngdə olur. Boz meşə torpaqlarında humusun miqdarı 3%-dən 8%-ə qədər yüksələ bilər ki, bu da əsasən meşə və ot töküntülərinin parçalanması ilə əlaqədardır.
Enliyarpaqlı meşələrin töküntüləri yüksək kül elementləri, xüsusilə də kalsium baxımından zəngindir. Əlverişli iqlim şəraitində torpaq quruluşu və mikroorqanizmlər aktiv şəkildə inkişaf edir. Meşə döşənəyinin ümumi miqdarı 150–300 s/ha təşkil edir, töküntünün meşə döşənəyinə nisbəti isə 4:7-dir.
Boz meşə torpaqlarının humus horizontunda su məhlulunun pH səviyyəsi A₂ və B horizontlarına nisbətən daha yüksəkdir. Fulvo turşuların profil boyu yuyulması nəticəsində aşağı qatlarda mühit getdikcə turşulaşır. Lakin C horizontunda turşuluğun azalması əsasən torpaqəmələgətirən süxurların təsiri ilə baş verir.
Humus qatında kalsiumun yüksək miqdarda olması bitki qalıqlarının parçalanması ilə əlaqədardır. Uducu kompleks əsaslarla zəngin olub, doyma səviyyəsi yüksəkdir. Çimli-podzol torpaqlardan fərqli olaraq, bu torpaqların profilində dəmir və digər metallarla zənginləşmə zəif ifadə olunmuşdur.