Ənvər Həzərxanov Tapdıq oğlu
(d. 29 may 1974, Sumqayıt, Azərbaycan) — texnika elmləri doktoru, professor, mühəndis, pedaqoq, ictimai xadim. Milli Müdafiə Universitetinin Heydər Əliyev adına Hərbi İnstitutunun “Texniki fənlər” kafedrasının müdiri, Türk Dünyası Araşdırmaları Beynəlxalq Elmlər Akademiyasının və Avropa Təbiət Elmləri Akademiyasının həqiqi üzvü.
Həyatı
Ənvər Həzərxanov 29 may 1974-cü ildə Sumqayıt şəhərində anadan olmuşdur. 1981–1991-ci illərdə Sumqayıt şəhəri 20 saylı orta məktəbdə təhsil almışdır.
1991-ci ildə Azərbaycan Texniki Universitetinə qəbul olmuş və 1996-cı ildə “Texnoloji proseslərin və istehsalatın avtomatlaşdırılması” ixtisası üzrə fərqlənmə diplomu ilə universiteti bitirmişdir.
Ailəlidir, iki övladı var.
Elmi və pedaqoji fəaliyyəti
1998-ci ildə əmək fəaliyyətinə Milli Aviasiya Akademiyasının Elmi-tədqiqat Aviasiya İnstitutunun “Aviasiya elektronikası” şöbəsində mühəndis-elektronçu kimi başlamışdır. 1999-cu ildən Tədris-metodiki şöbədə metodist kimi işləmişdir. 1999/2000–2019/2020-ci illərdə Milli Aviasiya Akademiyasının Avionika kafedrasında elmi-pedaqoji fəaliyyət göstərmişdir.
Bu müddət ərzində 100-dən çox elmi əsərin, o cümlədən 2 monoqrafiyanın, 2 dərs vəsaitinin, 1 əyani vəsaitin, 3 metodik göstərişin və 10-dan artıq patent və ixtiranın müəllifi olmuşdur.
2001–2020-ci illərdə Milli Aviasiya Akademiyasının rektoru akademik Arif Paşayevin köməkçisi vəzifəsində çalışmış, 2016–2020-ci illərdə isə Rejim və tərbiyə işləri üzrə prorektor olmuşdur.
2005-ci il iyunun 28-də MAA nəzdindəki N06.001 Dissertasiya Şurasında “Qeyri-stasionar obyektlərin naviqasiya idarəetmə sistemləri üçün vibrasiyalı pyezoelektrik giroskop” mövzusunda namizədlik dissertasiyasını müdafiə edərək texnika elmləri namizədi alimlik dərəcəsini almışdır.
2013-cü il aprelin 12-də “Kiçik ölçülü pilotsuz uçuş aparatlarının idarə edilməsi xüsusiyyətləri” mövzusunda doktorluq dissertasiyasını müdafiə edərək texnika elmləri doktoru elmi dərəcəsini qazanmışdır.
Azərbaycan Respublikasının Prezidenti yanında Ali Attestasiya Komissiyasının qərarları ilə:
- 2012-ci ildə dosent,
- 2017-ci ildə isə professor elmi adlarına layiq görülmüşdür.
Elmi-təşkilati və ictimai fəaliyyəti
- MAA Elmi Şurasının və D06.001 Dissertasiya Şurasının üzvü
- “Mülki Aviasiya” nəşriyyatının redaksiya heyətinin üzvü
- Yeni Azərbaycan Partiyasının “Azərbaycan Hava Yolları” QSC üzrə MAA-nın ilk partiya təşkilatının sədri,
- “Elmi Təminatlı İnnovasiya Assosiasiyası” İB-nin vitse-prezidenti olmuşdur.
2022-ci ildən etibarən Milli Müdafiə Universitetinin Heydər Əliyev adına Hərbi İnstitutunda “Aerokosmik mühəndisliyi” kafedrasında əvəzçi professor, 2022-ci ilin sentyabr ayından isə “Texniki fənlər” kafedrasının müdiri vəzifəsində çalışır.
2023-cü il oktyabrın 6-da Azərbaycan Texniki Universiteti nəzdində fəaliyyət göstərən Dissertasiya Şurasına (3325.01 – “Telekommunikasiya texnologiyası” ixtisası üzrə) üzv seçilmişdir. Hal-hazırda Milli Müdafiə Universitetinin Hərbi Elmi Tədqiqat İnstitutunun nəzdindəki 7301.01 – “Hərbi nəzəri elmlər” və 7302.01 – “Hərbi xüsusi elmlər” ixtisasları üzrə ixtisaslaşdırılmış elmi seminarın üzvüdür.
Təltif və mükafatlar
- “Azərbaycan Respublikası Mülki Aviasiyasının 75 illiyi (1938–2013)” yubiley medalı,
- 31 may 2018-ci il tarixli Prezident Sərəncamı ilə “Tərəqqi” medalı,[1]
- 2019-cu ildə “İlin Mühəndisi – 2018” fəxri adı (Azərbaycan Mühəndislik Akademiyası tərəfindən),
- “Xatirə” medalı.
2024-cü il yanvarın 26-da elmin və təhsilin inkişafındakı xidmətlərinə görə Türkiyənin Ankara şəhərində yerləşən Türk Dünyası Araşdırmaları Beynəlxalq Elmlər Akademiyasının həqiqi (akademik) üzvü seçilmiş və “Qızıl Ulduz” medalı ilə təltif olunmuşdur.
17 may 2024-cü ildə isə həmin akademiyanın təqdimatı ilə Almaniyanın Hannover şəhərində yerləşən Avropa Təbiət Elmləri Akademiyasının həqiqi üzvü seçilmiş və Gottfried Wilhelm Leibniz medalına layiq görülmüşdür.
Digər fəaliyyətlər
- Koşiki karate-do idman növü üzrə 5-ci dan qara kəmər sahibidir.[2]
- Azərbaycan Koşiki Karate-do Federasiyasının vitse-prezidentidir.
- 2024-cü ilin aprel ayından Heydər Əliyev adına Hərbi İnstitutun “Elmi Əsərlər” jurnalının baş redaktorudur.[3]
- "Azerbaijan Sport Talents Academy” MMC-nin icraçı direktorunun müavinidir.
- ”Mingəçevir” Futbol Klubunun İdarə Heyətinin üzvüdür.
- ↑ Crocusoft. "E-QANUN". e-qanun.az (ingilis). İstifadə tarixi: 2025-05-14.
- ↑ "Rəhbərlik | Azərbaycan Respublikasi Ciu-Citsu Federasiyasi" (az.). 2024-10-24. İstifadə tarixi: 2025-05-14.
- ↑ "Azərbaycan Respublikası Müdafiə Nazirliyi". AZƏRBAYCAN RESPUBLİKASI MÜDAFİƏ NAZİRLİYİ (az.). İstifadə tarixi: 2025-05-14.