Oqulsapar Muradova(1948 – 14 sentyabr 2006[1]) — Azadlıq radiosunun müxbiri.
| Oqulsapar Muradova | |
|---|---|
| Ogulsapar Muradova | |
| Doğum tarixi | 1948 |
| Vəfat tarixi | 14 sentyabr 2006[1] |
| Vətəndaşlığı |
 SSRİ Türkmənistan |
| Fəaliyyəti | jurnalist |
Oqulsapar Muradova 1948-ci ildə Türkmənistan SSR-nin Aşqabad şəhərində anadan olub.[2] 2004-cü ildən "Azadlıq" və "Azad Avropa" radiolarının müxbiri kimi fəaliyyət göstərib. O, Türkmənistan Milli Təhlükəsizlik Nazirliyinin əməkdaşları tərəfindən hökumət əleyhinə sui-qəsddə iştirakda və silah saxlamaqda ittiham olunaraq həbs edilib. O, həbsxanada vəfat edib. Sərhədsiz Reportyorlar beynəlxalq hüquq müdafiə təşkilatının fəallarının fikrincə, ölüm səbəbi döyülmə olub.[3]
Muradova Türkmənistan Milli Təhlükəsizlik Nazirliyinin əməkdaşları tərəfindən 2006-cı il iyunun 18-də Aşqabadda heç bir ittiham irəli sürülmədən həbs edilib. Deutsche Welle-nin məlumatına görə, Muradovanın həbsinə səbəb onun fransız jurnalistlərə Türkmənistanla bağlı müstəqil reportaj üçün icazəsiz gizli kamera çəkilişləri aparmağa kömək etməsi olub.[4]
Hüquq müdafiəçilərinin məlumatına görə, Muradova həbs olunduqdan sonra ona qarşı psixotrop maddələrdən istifadə edilmiş və bu yolla onun keçmiş Türkmənistan prezidenti Saparmurat Niyazova qarşı yönəlmiş sui-qəsddə iştirak etdiyini etiraf etməyə məcbur edildiyi bildirilmişdir. Məhkəmədə ona silah saxlamaq ittihamı irəli sürülmüş, lakin Muradova özünü təqsirli bilməmiş və 6 il müddətinə azadlıqdan məhrum edilmişdir.[4]
İyun ayının ortalarında saxlanıldıqdan sonra Muradova vəkillə təmin olunmadan və ailəsi ilə yazışma hüququ olmadan həbsxanada saxlanılmışdır.[2]
2006-cı il iyulun 13-də ABŞ-ın Yayım üzrə İdarə Heyəti (Broadcasting Board of Governors) Ogulsapar Muradovanın dərhal azad olunmasını tələb edən qətnamə qəbul etmişdir.[2]
2006-cı il iyulun 17-də Azad Avropa/Azadlıq Radiosu (Radio Free Europe/Radio Liberty) Türkmənistanın xarici işlər nazirinə məktub ünvanlayaraq Muradovanın azad olunmasına çağırış etmişdir. Məktubda RFE/RL-in prezident vəzifəsini müvəqqəti icra edən Ceffri N. Trimbıl Türkmənistanın xarici işlər naziri Rəşid Meredovdan xahiş edirdi ki, hökumətinə Azad Avropa/Azadlıq Radiosunun mövqeyini çatdırsın: xanım Muradova qanunsuz olaraq saxlanılıb və dərhal azad edilməlidir.[2]
2006-cı il sentyabrın 14-də Muradova həbsxanada vəfat etmişdir. Rəsmi nəticəyə görə o, ürək tutmasından dünyasını dəyişib. Deutsche Welle, Muradovanın ailəsinə istinad edərək bildirir ki, onun bədənində döyülmə izləri olub, eyni iş üzrə saxlanılan şəxslər isə onun ilkin istintaq zamanı amansız rəftara məruz qaldığını təsdiq ediblər. Hüquq müdafiəçilərinin fikrincə, Muradova zorla öldürülmüşdür. Beynəlxalq hüquq müdafiə təşkilatları Muradovanın ölümünün şəraitinin araşdırılmasını tələb ediblər, lakin heç bir araşdırma aparılmamışdır.[4]
- ↑ 1 2 https://www.unesco.org/en/safety-journalists/observatory/d2d729f9-9962-47f4-b381-7907e626a190.
- ↑ 1 2 3 4 "Еженедельный обзор по правам человека и демократии" (rus). Государственный департамент США. 2006-07-27. 2016-03-04 tarixində arxivləşdirilib. İstifadə tarixi: 2016-03-04.
- ↑ "Мурадова умерла от побоев, а суд над ней продолжался несколько минут". Новые Известия (rus). 2006-09-15. İstifadə tarixi: 2020-03-14.
- ↑ 1 2 3 Айша Бердыева. "Туркменистан: Два года со дня смерти Огульсапар Мурадовой" (rus). Deutsche Welle. 2008-09-14. 2018-04-10 tarixində arxivləşdirilib. İstifadə tarixi: 2018-04-10.