Bu məqalədəki məlumatların yoxlanıla bilməsi üçün əlavə mənbələrə ehtiyac var. |
Aslanova Nigar Məhər qızı (11 dekabr 1970, Bakı) — Azərbaycan riyaziyyatçısı-alimi, Riyaziyyat üzrə elmlər doktoru, professor, Azərbaycan Memarlıq və İnşaat Universitetinin Ali riyaziyyat fakültəsinin dosenti və AMEA RMİ-nin əvəzçiliklə Diferensial tənliklər şöbəsinin baş elmi işçisi, dosentdir.[1]
| Nigar Aslanova | |
|---|---|
| Aslanova Nigar Məhər qızı | |
| Doğum tarixi | |
| Doğum yeri | Bakı, Azərbaycan |
| Elm sahəsi | Riyaziyyat |
| Elmi dərəcələri | Riyaziyyat üzrə elmlər doktoru, professor |
| Elmi adı | Dosent |
| İş yerləri | Azərbaycan Memarlıq və İnşaat Universiteti, AMEA Riyaziyyat Mexanika intsitutu |
Nigar Aslanova 11 dekabr 1970-ci ildə Bakı şəhərində anadan olmuşdur. 1977–1987-ci illərdə Bakı şəhərində yerləşən 225 nömrəli orta məktəbdə təhsil almışdır. 1987–1992-ci illərdə Bakı Dövlət Universitetinin Mexanika-riyaziyyat fakültəsində ali təhsil almışdır. 1993–1995-ci illərdə Azərbaycan Milli Elmlər Akademiyasının Riyaziyyat və Mexanika İnstitutunun əyani aspiranturasında təhsilini davam etdirmişdir.[1]
1996-cı ildə professor Məmməd Bayramoğlunun elmi rəhbərliyi ilə “Sinqulyar diferensial-operator tənliklərinin məxsusi ədədlərinin sayının asimptotikasının və requlyarlaşmış izinin tədqiqi (01.01.01)” mövzusunda namizədlik dissertasiyasını müdafiə etmişdir. 2013-cü ildə AMEA Riyaziyyat və Mexanika İnstitutu nəzdində fəaliyyət göstərən dissertasiya şurasında “Diferensial-operator tənliklərin spektrinin və izlərinin tədqiqi (1202.01)” mövzusunda doktorluq dissertasiyasını müdafiə edərək riyaziyyat üzrə elmlər doktoru elmi dərəcəsini almışdır.[1]
Nigar Aslanova AMEA Riyaziyyat və Mexanika İnstitutunun Diferensial tənliklər şöbəsində elmi işçi, böyük elmi işçi, aparıcı elmi işçi və baş elmi işçi vəzifələrində çalışmışdır. Hazırda Azərbaycan Memarlıq və İnşaat Universitetinin Ali riyaziyyat kafedrasının dosenti və AMEA Riyaziyyat və Mexanika İnstitutunda əvəzçiliklə baş elmi işçi kimi fəaliyyət göstərir. O, diferensial-operator tənliklərinin spektral analizi sahəsində aparılan tədqiqatların müəllifi olmaqla 40-dan artıq elmi iş nəşr etdirmişdir.[1]
2025-ci ildə Nigar Aslanova Kanadanın Toronto şəhərində yerləşən nüfuzlu Filds Riyaziyyat Elmi-Tədqiqat İnstitutuna “qonaq alim” statusu ilə elmi ezamiyyətə dəvət olunmuşdur. Bu dəvət Azərbaycan universitetləri tarixində ilk rəsmi hadisə kimi qiymətləndirilmişdir. Onu Toronto Universitetinin Riyaziyyat kafedrasının professoru Maykl Siqal dəvət etmiş və tərəflər operator əmsallı diferensial tənliklərin spektral analizi mövzusunda birgə tədqiqat istiqamətlərini müəyyənləşdirmişlər.[2]
Ezamiyyət müddətində Nigar Aslanovaya institutun elmi kitabxanasından istifadə, beynəlxalq seminar və müzakirələrdə iştirak, elmi məruzələrlə çıxış etmək imkanı yaradılmışdır. O, həmçinin “Filds İnstitutunun Elmi işçisi” müsabiqəsində qalib gələrək 2026-cı ildə həmin institutda qrant əsasında bir aylıq elmi fəaliyyət hüququ qazanmışdır.[2]
Nigar Aslanovanın elmi fəaliyyəti Azərbaycan riyaziyyat elminin beynəlxalq səviyyədə tanınmasına, diferensial-operator tənliklərinin spektral nəzəriyyəsi sahəsində fundamental tədqiqatların inkişafına mühüm töhfə vermişdir.[1]
- ↑ 1 2 3 4 5 "Azərbaycan riyaziyyatçıları: Nigar Aslanova". imm.az. İstifadə tarixi: 21 dekabr 2025.
- ↑ 1 2 "AzMİU-nun professoru Nigar Aslanova riyaziyyatın Məkkəsi sayılan Filds İnstitutunda elmi ezamiyyətdə olub". azertag.az. İstifadə tarixi: 21 dekabr 2025.