Miras (bədii-sənədli film)

Filmdə Bakıda «Nobel Brothers» şirkətinin nailiyyətləri, dünyada ilk neft tankerinin, neft məhsullarının saxlanması üçün metal çənlərin tikintisi, Avropada ilk neft kəmərinin Bakıda işə salınması və digər bu kimi yeniliklərdən bəhs edilir. "Miras" - da neft sənayesinin inkişafı ilə “qara qızıl”ın geostrateji xammal kimi əhəmiyyətinin artması, eləcə də Azərbaycanın regionda geosiyasi önəm qazanması və bir neçə qitənin nəhəng şirkətlərinin Bakı nefti uğrunda gərgin mübarizə aparmalarından danışılır. Ekran əsərində Nobel qardaşları tərəfindən "qara qızıl"a dair yaradılan irsin bu gün Azərbaycanda inkişaf etməsi və ölkənin dünyanın etibarlı enerji təminatında rolu nümayiş olunur.

Ekran əsərində Nobel Fondunun 15-17%-nin Bakıdakı “Nobel Qardaşları” şirkətinin neft gəlirləri hesabına formalaşdığı qeyd edilərək, Bakı neftinin tarixi ilə Nobel Fondu arasında birbaşa əlaqənin olduğu nümayiş olunur.^[2]

Miras filmində Nobellər ailəsinin üzvləri Piter Nobel ( Robert Nobelin nəticəsi), Tomas Tiden (Lüdviq Nobelin nəticəsi, professor) və tanınmış ekspertlər Villiam Brays ( ABŞ Neft tarixçisi) və Brita Asbrinkdan (İsveç yazıçısı, jurnalist) özəl müsahibələr alınaraq geniş istifadə olunub.^[3]

Film Azərbaycanın audiovizual məhsulların istehsalı ilə məşğul olan aparıcı və innovativ media şirkəti Baku Media Center^[4] tərəfindən istehsal olunub. Qeyd etmək lazımdır ki, yarandığı ilk gündən Bakı Media Mərkəzi üçün Azərbaycan tarixini yaşatmaq, həqiqətləri olduğu kimi çatdırmaq böyük önəm daşıyır. Mərkəz bu müddət ərzində ölkəmizin ən müxtəlif tarixi dövrlərini özündə əks etdirən və ictimaiyyət tərəfindən geniş marağa səbəb olan filmlər istehsal edib. Mərkəzin işləri arasında "Şuşa, sən azadsan!" "Hədəf Bakıdır. Hitler neft uğrunda döyüşü necə uduzdu”, "Əbədi ezamiyyət”, "Bir günəş altında”, "Son iclas”, "Tağıyev: Neft", "Tağıyev: Çar" və digər bədii və sənədli filmlər yer alır.

Film üzərində bir ilə yaxın iş aparılıb. Çəkilişlər Bakı və onun ətraf kəndləri, Şəki, İsmayıllı şəhərləri və Belarus Respublikası da daxil olmaqla 30 məkanda həyata keçirilib.

“Miras” bədii-sənədli filmi Kanadada keçirilən 9-cu Kalqari Avropa Film Festivalında (Calgary European Film Festival) ölkəmizi təmsil etmişdir.^[5][1]

Miras filminin baş prodüseri Arzu Əliyeva, prodüseri Orman Əliyev, ssenari müəllifi və quruluşçu rejissoru Zaur Qasımlı, quruluşcu operatoru Vladimir Artemyev, quruluşcu rəssamı isə Şahin Həsənlidir. Filmin hazırlanmasında yerli mütəxəssislərlə yanaşı, Rusiya, Belarus və Gürcüstandan dəvət olunmuş kinomotoqrafçılar iştirak edib.^[6]

Ekran əsərində 100-dən artıq pəşəkar aktyor çəkilib. Kütləvi səhnələrin çəkilişlərində isə 1500-ə yaxın insan iştirak edib. Ümumilikdə film üzərində iki minə yaxın adamın zəhməti var^[6]