Maturin Romeqas

Maturin Romeqas (fr. Mathurin d’Aux de Lescout, ləqəbi Romeqas; 1530-cu illər – 1581, Roma) — fransız mənşəli məşhur Malta cəngavəridir, ailəsinə məxsus mülklərdən birinə Romeqas ləqəbi verilmişdir.

1547-ci ildə Malta ordeninə daxil olmuşdur. Qalera (gəmi növü) komandiri olduqdan sonra o, Aralıq dənizində piratlarla davamlı mübarizə aparmış, onların bir çox gəmisini ələ keçirmiş, xristian əsirlərini azad etmiş, əsas pirat başçılarından bəzilərini əsir götürmüş və ən əsası Maltanın mühasirəsi zamanı həddən artıq mübarizlik əzmi nümayiş etdirmişdir. O, ordenin donanmasına rəhbərlik etmiş və eyni zamanda da Tuluza və İrlandiyanın Böyük Prioru olmuşdur. Ordenin Böyük Magistri Jan Levek de la Kasyer (Jean l'Evêque de la Casière) ilə mübarizəyə girmiş, daha sonra şikayətlərini Papaya bildirmək üçün onunla birlikdə Romaya səfər etmiş, lakin 1581-ci ildə orada ölmüşdür.