Marqaret E. Tompson (d. 2 fevral, 1911 – ö. 29 fevral, 1992) yunan sikkələri üzrə ixtisaslaşmış amerikalı numizmat idi. 1949-1979-cu illərdə Amerika Numizmatika Cəmiyyətinin kuratoru olmuşdur. O, 1961-ci ildə Amerika Numizmatika Cəmiyyətinin Arçer M. Hantinqton medalına, 1967-ci ildə isə Böyük Britaniyanın Kral Numizmatika Cəmiyyətinin medalına layiq görülmüşdür.[1][2]
| Marqaret E. Tompson | |
|---|---|
| Doğum tarixi | 22 fevral 1911 |
| Doğum yeri | |
| Vəfat tarixi | 29 fevral 1992 (81 yaşında) |
| Fəaliyyəti | numizmat, arxeoloq |
Marqaret E. Tompson 1911-ci ildə, Trenton (Nyu Cersi) şəhərində anadan olmuşdur.[1] 1931-ci ildə Redklif Kollecini bakalavr dərəcəsi ilə bitirmişdir. Təhsilini başa vurduqdan sonra beş il müddətində orta məktəbdə ingilis dili müəllimi kimi çalışmışdır. 1937-ci ildə o, Afina Aqorasında qazıntıların direktoru olan T. Lesli Şeyr üçün katibə vəzifəsinə işə qəbul edilmişdir.[2][3]
1937-1940 və 1947-1949-cu illərdə Afinada çalışmış, əsas vəzifəsi qazıntılar zamanı tapılmış qədim sikkələrin təmizlənməsi, təşkil edilməsi və sənədləşdirilməsi olmuşdur. Tompson Afina Aqorasında apardığı tədqiqatların xülasəsini qısa məqalələrdə yayımlamışdır. 1949-cu ildə onun işlərini oxuyan Sidney P. Noy (baş kurator) onu Amerika Numizmatika Cəmiyyətində (ANC) Yunan sikkələri üzrə assistent kurator vəzifəsinə işə qəbul etmişdir. Daha sonra Yunan sikkələri üzrə baş kurator olmuş və 1976-cı ilə qədər bu vəzifədə çalışmışdır. 1976-1979-cu illərdə o, ANC-in baş kuratoru olmuş və 1979-cu ildə təqaüdə çıxmışdır.[1]
1954-cü ildə, ANC-in kuratoru kimi fəaliyyət göstərərkən, Tompson Roma dövründən Venesiya dövrünə qədər olan 30.000-dən çox sikkənin kataloqunu nəşr etdirmişdir. 1961-ci ildə o, Afina şəhərinin yeni gümüş sikkə sistemi haqqında yazdığı kitabına görə Arçer M. Hantinqton medalına layiq görülmüşdür.[1]
1967-ci ildə Londonun Kral Numizmatika Cəmiyyəti ona qızıl medal təqdim etmişdir. O, həmçinin 1964-1968-ci illərdə Amerika Arxeologiya İnstitutunun prezidenti, 1973-1979-cu illərdə isə Beynəlxalq Numizmatika Komissiyasının vitse-prezidenti olmuşdur. 1973-cü ildə o, Otto Morkholm ilə birlikdə "Yunan sikkə xəzinələrinin inventarı" adlı kitabın müəlliflərindən biri olmuşdur.[1][2]
Tompson Amerika Numizmatika Cəmiyyətində yay seminarları, Kolumbiya Universitetində magistr dərsləri keçmiş və Kaliforniya Universitetində (Berkli) Regents professoru (xüsusi elmi nailiyyətlərə malik olan professorlara təqdim olunan ad) olmuşdur.[3]
Təqaüdə çıxdıqdan sonra ona ANC-in baş kuratoru emeritus fəxri titulu verilmişdir. 1989-cu ildə ANC onun şərəfinə "Marqaret Tompson yunan sikkələri kuratorluğu" adlı bir fond yaratmışdır. O, 1992-ci ildə vəfat etmişdir.[1]
- Thompson, Margaret. The New Style Silver Coinage of Athens. Numismatic Studies. American Numismatic Society. 1961.[2]
- Thompson, Margaret; və b. An Inventory of Greek Coin Hoards. American Numismatic Society. 1973.[3]
- Thompson, Margaret. Alexander's Drachm Mints II: Lampsacus and Abydus. Numismatic Studies. American Numismatic Society. 1991. 77. ISBN 978-0897222419.[1]
- ↑ 1 2 3 4 5 6 7 "Thompson, Margaret E., 1911–1992". American Numismatic Society. 12 June 2018 tarixində arxivləşdirilib. İstifadə tarixi: 10 June 2018.
- ↑ 1 2 3 4 5 6 Metcalf, William. "Margaret Thompson". Breaking Ground: Women in Old World Archaeology. 12 June 2018 tarixində arxivləşdirilib. İstifadə tarixi: 10 June 2018.
- ↑ 1 2 3 4 "Margaret Thompson— 1984 Gold Medal Award for Distinguished Archaeological Achievement". Archaeological Institute of America. İstifadə tarixi: 10 June 2018.
- ↑ "APS Member History". search.amphilsoc.org. 2020-06-02 tarixində arxivləşdirilib. İstifadə tarixi: 2022-08-22.