Maraş qətliamı (türk. Maraş katliamı; kürd. Komkujiya Mereşê)[1] — 1978-ci ilin dekabrında Türkiyənin Qəhrəmanmaraş şəhərində, əsasən neofaşist "bozqurdlar" tərəfindən,[2][3][4] yüzdən artıq solçu[5][6] və ələvinin[7][4] qətlə yetirilməsi ilə nəticələnmiş kütləvi zorakılıq hadisəsi.
| Maraş qətliamı | |
|---|---|
| Ümumi məlumatlar | |
| Yeri | |
| Tarix | dekabr 1978 |
Qətliamdan sonra hərbi vəziyyət elan edilmişdir, lakin bu addım zorakılıq dalğasını dayandıra bilməmiş, hadisələr Çorum və Konya kimi digər şəhərlərə də yayılmışdır.[8]
Qəhrəmanmaraşda baş verən hadisələr 19–26 dekabr 1978-ci il tarixlərini əhatə etmişdir. Hadisələr əsasən sağçıların getdiyi bir kinoteatra atılan bombayla başlamışdır. Daha sonra solçuların bombanı atdığına dair şayiələr yayılmışdır. Növbəti gün solçuların tez-tez toplaşdığı bir qəhvəxanaya da bomba atılmışdır.[9]
21 dekabr 1978-ci il axşamı solçu kimi tanınan müəllimlər Hacı Çolaq və Mustafa Yüzbaşıoğlu evlərinə gedən zaman qətlə yetirilmişdir. Onların dəfn mərasimi ertəsi gün keçirilməli idi, lakin namazın qılınacağı məscidin qarşısında silahlı toqquşmalar başlamış və mərasim baş tutmamışdır. Günün sonunda üç nəfər öldürülmüş, mülklər və iş yerləri dağıdılmışdır.[10]
Sonrakı beş gün ərzində, əksəriyyəti qadınlar və uşaqlar olmaqla, yüzdən artıq insan evlərində öldürülmüşdür. Maraşın bəzi hissələri dağıdılmış, şəhərdə komendant saatı tətbiq edilmişdir. Nə ordu, nə də polis baş verən zorakılıqları dayandırmağa cəhd göstərmişdir.[10]
23 dekabrda izdihamlar ələvilərin yaşadığı məhəllələrə hücum etmiş, insanlara qarşı zorakılıq tətbiq etmiş, evləri və mağazaları dağıtmışdır. Türkiyənin İnqilabçı Həmkarlar İttifaqları Konfederasiyasının (DİSK), Türkiyə Müəllimlər Birliyinin (TÖB-Der), Polis Məmurları Dərnəyinin (Pol-Der) və Cümhuriyyət Xalq Partiyasının (CHP) ofisləri də daxil olmaqla bir çox bina dağıdılmışdır.[11]
26 dekabrda şəhərdə vəziyyət nəzarət altına alınmış, hökumət on üç vilayətdə hərbi vəziyyət elan etmişdir. Qurbanların böyük əksəriyyəti şəhərin sünni əhalisinin üstünlük təşkil etdiyi ərazilərində yaşayan, Tuncelidən köçmüş kürd ələvilər olmuşdur.[10]
Məhkəmə prosesləri zamanı şahidlər qurbanlardan tez-tez hücum edənlər tərəfindən müsəlman və türk olduqlarını sübut etmələrinin tələb edildiyini bildirmişlər.[12]
Həlak olanların sayı ilə bağlı rəqəmlər mənbələrə görə bir qədər fərqlənir. "Bianet" Müstəqil Kommunikasiya Şəbəkəsinə görə 111 nəfər öldürülmüşdür,[13] "Zaman" qəzeti ölənlərin sayını 105 nəfər olaraq göstərmişdir.[14]
Şahidlər arasından Seyho Dəmir bildirmişdir ki, hadisələr zamanı Maraş Polis Rəisi Əbdülqədir Ağsu olmuşdur və qətliam Milli Kəşfiyyat Təşkilatı, Milliyyətçi Hərəkat Partiyası (MHP) və islamçıların birgə təşkilatçılığı ilə həyata keçirilmişdir. O, Maraşa gəldikdən sonra dövlət xəstəxanasında yaralıların aşağı mərtəbədən aparılaraq öldürüldüyünü eşitdiyini qeyd etmişdir. Hadisəni araşdıran vəkil Xəlil Güllüoğlunun sənədlərinin heç vaxt ictimaiyyətə açıqlanmadığını və onun da bu işi təqib etdiyinə görə öldürüldüyünü bildirmişdir.[13]
Məryəm Polat evlərin yandırıldığını, bir uşağın qazan içində yandırıldığını, ailəsinin zirzəmidə gizlənərək sağ qaldığını, lakin evlərinin tamamilə külə döndüyünü ifadə etmişdir.[13]
Hərbi məhkəmələrdə açılmış işlər 1991-ci ilə qədər davam etmiş, Antiterror Qanunu qəbul edildikdən sonra yekunlaşmışdır. Ümumilikdə 804 müttəhim mühakimə olunmuş, 29 nəfərə ölüm hökmü, yeddi nəfərə ömürlük həbs, 321 nəfərə isə 1 ildən 24 ilə qədər azadlıqdan məhrumetmə cəzası verilmişdir. 1991-ci ildə qəbul edilmiş qanun nəticəsində bütün müttəhimlər 1992-ci ilə qədər azadlığa buraxılmışdır.[12]
Hadisələrdən sonra daxili işlər naziri təyin edilən Həsən Fəhmi Günəş qətliamın planlaşdırılmış olduğu qənaətində olmuşdur. Ankarada fəaliyyət göstərən "1968-lilər Dərnəyi"nin sədri Ruşen Sümbüloğlu təxribatın əks-partizan tərəfindən təşkil edildiyini iddia etmişdir. "Pir Sultan Abdal Mədəniyyət Dərnəyi"nin sədri Fövzi Gümüş ABŞ-nin Mərkəzi Kəşfiyyat İdarəsinin və "dərin dövlət"in hadisələrdə rol oynadığını irəli sürmüşdür.[9]
Ələvi Bəktaşi Federasiyasının prezidenti Turan Əsər qətliamın 29-cu ildönümündə çıxış etmiş və bildirmişdir ki, hadisələrdən əvvəl "əks-partizan və irqçi paramilitar imperialist muzdlular eyni ölkənin vətəndaşları arasında nifrət toxumları səpməyə çalışmışdır".[13]
Məxfi bir sənəd MİT-in hadisələri planlaşdırdığını ortaya qoymuşdur.[9] Hadisələrlə bağlı mühakimə olunan Ökkeş Şendiller sonradan millət vəkili seçilmiş və Böyük Birlik Partiyasının (BBP) qurucularından biri olmuşdur.[15]
30 aprel 2011-ci il tarixində "İnqilabçı Müharibə" təşkilatının üzvü olduğu iddia edilən[16] Həmid Qapan Qəhrəmanmaraşda hərbi vəziyyətə cavabdeh olan general Yusif Haznedaroğlunu işgəncələrə görə məsul tutmuşdur.[17][18]
- ↑ "Em Komkujiya Mereşê ji bîr nakin". hdp.org.tr (kürd). 2016. İstifadə tarixi: 19 iyun 2021.
- ↑ Rabasa, Angel; Larrabee, F. Stephen. The Rise of Political Islam in Turkey. Santa Monica: RAND Corporation. 2008. ISBN 9780833044570.
In the 1978 Kahramanmaraş incident, rightwing "Grey Wolves" killed about 100 left-wing activists.
- ↑ Orhan Kemal Cengiz. "Why was the commemoration for the Maraş massacre banned?". Today's Zaman. 25 dekabr 2012. 7 oktyabr 2015 tarixində orijinalından arxivləşdirilib.
This was the beginning of the massacre; later on, angry mobs led by grey wolves scattered into the city, killing and raping hundreds of Alevis.
- ↑ 1 2 McDowall, David. A Modern History of the Kurds. Bloomsbury. 2004. 415. ISBN 9781850434160.
- ↑ Erdem, Ali Kemal. "Hakim Ertekin 42 yıl önceki "vahşeti" kitaplaştırdı: "Maraş Katliamı'nda 15-20 bin kişinin hayatı, eski kaçakçı 'Komünist Osman'ın verdiği silah sayesinde kurtuldu"". Independent Türkçe (türk). 4 dekabr 2020. İstifadə tarixi: 20 mart 2023.
- ↑ "44 yıldır kapanmayan yara: Maraş Katliamı". Rudaw. 19 dekabr 2022. İstifadə tarixi: 20 mart 2023.
- ↑ Orhan, Mehmet. Political Violence and Kurds in Turkey: Fragmentations, Mobilizations, Participations & Repertoires. Routledge. 2015. 86. ISBN 9781317420446.
- ↑ McDowall, David. A Modern History of the Kurds (4). A Modern History of the Kurds. 2021. 414. ISBN 9780755600786.
- ↑ 1 2 3 The daily Zaman of 25 December 2008 Türkiye'yi sıkıyönetime götüren viraj: Maraş olayları Arxivləşdirilib 2012-03-14 at the Wayback Machine The curve taking Turkey to martial law: the incidents of Maraş; accessed on 1 May 2011
- ↑ 1 2 3 Sinclair-Webb, Emma. White, Paul Joseph; Jongerden, Joost (redaktorlar ). Turkey's Alevi Enigma: A Comprehensive Overview. Brill Publishers. 2003. 222–223. ISBN 9789004125384.
- ↑ Maraş Massacre 24 December 1978 Arxivləşdirilib 16 fevral 2014 at the Wayback Machine, website of the Pir Sultan Abdal Kültür Derneği (Cultural Association Pir Sultan Abdal), accessed on 1 May 2011
- ↑ 1 2 "37 Years After Maraş Massacre". Bianet. İstifadə tarixi: 16 oktyabr 2019.
- ↑ 1 2 3 4 Remembering the Maras Massacre in 1978 26 December 2007; accessed on 1 May 2011
- ↑ 'Maraş olayları tezgâh, yüzleşmek istiyorum' Arxivləşdirilib 2012-01-08 at the Wayback Machine "The Maraş incidents are a trap, I want to be confronted, Zaman of 20 April 2008, accessed on 1 May 2011
- ↑ Taken from Ökkeş Şemdinler on Free Radio; accessed on 1 May 2011
- ↑ An offspring of THKP/C (see tree of leftist organizations Arxivləşdirilib 2016-03-15 at the Wayback Machine); accessed on 1 May 2011
- ↑ 'İki arkadaşım işkencede öldü' Two friends died under torture, daily Radikal of 30 April 2011, accessed on 1 May 2001
- ↑ German translation of the article in Turkish to be found at new accusations against the general; Democratic Turkey Forum, report for April 2011, accessed on 1 May 2011