Kozlovski itburnusu

Rusiyada (Dağıstan) təbii halda yayılmışdır.

Azərbaycanda dar bir arealda yayılmışdır. Lənkəran rayonu (Qazo, Durzaband dağı) ərazisində rast gəlinir. Azərbaycanın nadir bitkisidir. Aşağı qurşaqda meşəliklərdə, kolluqlarda, əsasən yamacın cənub qərb hissəsində yayılmışdır.

Təbiətdə hündürlüyü 1,5 m-ə qədər olan koldur. Qopartikanları oraqvarı və ya qarmaqvarı əyilmiş formadadır. Yarpaqları çılpaq, bəzən alt tərəfdən və kənarı boyu xırda oturaq vəzciklərlə örtülüdür; 5, bəzi hallarda 7 ədəd ensiz yumurtavarı, 25–30 mm uzunluqda və 12–15 mm enində, üstdən çılpaq, altdan sıx, xırda ensiz vəziciklər və seyrək tüklərlə örtülü yarpaqçıqlardan ibarətdir. Çiçəkləri tək-tək, bəzi hallarda cüt-cüt yerləşməklə çılpaq və hamar çiçək saplağına malikdir. Kasayarpaqcıqları çılpaqdır, hamar və ya yalnız üstdən seyrək xırda tüklərə və az inkişaf etmiş lələkvarı əlavələrə malikdir. Ləçəkləri açıq çəhrayı, kasayarpaqcıqlarına bərabər və ya onlardan bir qədər uzundur. Meyvəsi iri, 3 sm-ə qədər uzunluqda olmaqla, enli ovalşəkillidir. Yetişdikdə tünd göy rəng alır. İyun və iyul aylarında çiçək açır.

Təbiətdə generativ və vegetativ yolla çoxalır. Təbii ehtiyatının dəyişilməsi səbəbləri başlıca olaraq insan fəaliyyətidir. Xüsusi qəbul edilmiş qoruma tədbiri yoxdur.