Hanna Katrin Fridriksson (isl. Hanna Katrín Friðriksson; 4 avqust 1964, Paris) — İslandiya siyasətçisi və dövlət xadimi, "İntibah" Partiyasının üzvü, 21 dekabr 2024-cü ildən İslandiyanın Sənaye Naziri, 2016-cı ildən altinqin üzvü, keçmiş həndbolçu, milli komandanın oyunçusu. İdman karyerasını 1995-ci ildə başa vurmuşdur.
| Hanna Katrin Fridriksson | |
|---|---|
 | |
| Şəxsi məlumatlar | |
| Doğum tarixi | 4 avqust 1964 (60 yaş) |
| Doğum yeri | |
| Fəaliyyəti | siyasətçi, jurnalist |
 Vikianbarda əlaqəli mediafayllar | |
Hanna Katrin Fridriksson 4 avqust 1964-cü ildə Fransanın paytaxtı Parisdə anadan olmuşdur. Dövlət xəzinədarı Torben Fridriksson (isl. Torben Friðriksson; 21 aprel 1934 - 4 fevral 2012) və müəllimə Marqret Byörq Torsteynsdouttirin (isl. Margrét Björg Þorsteinsdóttir; 17 oktyabr 1930 - 6 iyul 2016) ailəsində böyümüşdür.
1985-ci ildə Reykyavikdə orta məktəbi bitirmişdir.
"Reykyavik" həndbol klubunun oyunçusu olmuşdur. Daha sonra 1984-cü ilə qədər klubun əsas komandasının heyətində çıxış etmişdir. Komanda dağıldıqdan sonra paytaxt klubu "Valyur"a (valur - "şahin") keçmiş və 1984-1994-cü illərdə bu komandanın şərəfini qorumuşdur. 1994-1995-ci illərdə paytaxtın "Fram" klubunda, 1980-1990-cı illərdə milli komandanın heyətində çıxış etmişdir. 1995-ci ildə həndbolçu karyerasını başa vurmuşdur.
Fəlsəfə və iqtisadiyyat üzrə bakalavr təhsili aldığı İslandiya Universitetini 1999-cu ildə bitirmişdir. Daha sonra 2001-ci ildə Deyvis Kaliforniya Universitetində Biznesin İdarə Edilməsi (MBA) ixtisası üzrə magistr dərəcəsi almışdır.
1990-1999-cu illərdə Morgunblaziz qəzetində jurnalist kimi çalışmışdır.
2001-2003-cü illərdə Reykyavik Universitetində İdarəetmə Məktəbinə (Stjórnendaskóla) rəhbərlik etmişdir. 2003-2005-ci illərdə Reykyavik Universitetinin rəhbəri olmuşdur.
2005-ci ildən 2006-cı ilə qədər Eimskip şirkətinin kommunikasiyalar şöbəsinə rəhbərlik etmişdir.
2007-2009-cu illərdə Reykyavik Universitetində dərs demişdir.
2007-2009-cu illərdə səhiyyə naziri Qvyudlyöygyur Tour Tourdarsonun köməkçisi olmuşdur.
2009-2011-ci illərdə Bivryöst Universitetində dərs demişdir.
2010-2016-cı illərdə Icepharma şirkətində biznesin inkişafı üzrə direktor (2010–2012) və səhiyyə departamentinin meneceri (2012–2016) kimi fəaliyyət göstərmişdir.
2016-cı il parlament seçkilərinin nəticələrinə görə Reykyavik-Cənub seçki dairəsindən "İntibah" Partiyasının namizədi olaraq altinqə seçilmişdir. 2017 və 2021-ci il seçkilərində təkrar millət vəkili olmuşdur. 2024-cü il parlament seçkilərində Reykyavik-Şimal seçki dairəsindən namizədliyini irəli sürmüş və parlamentə seçilmişdir. 2016-2024-cü illərdə "Dirçəliş" parlament qrupunun sədri olmuşdur.
2023-cü ilin martında Şimal Şurasında Mərkəz qrupunun sədri seçilmişdir.
Dekabrın 21-də Baş nazir Kristrun Frostadouttirin (Sosial Demokrat Alyansı) rəhbərlik etdiyi koalisiya hökumətinin sənaye naziri təyin edilmişdir.[1]
- ↑ "Ráðuneyti Kristrúnar Frostadóttur skipað" (island). Stjórnarráðið. 2024-12-21. İstifadə tarixi: 2024-12-21.