Onlayn konsaltinq

Onlayn konsaltinq və ya E-konsaltinq – hökumət və vətəndaşlar arasında internet vasitəsi ilə həyata keçirilən mübadilə. Onlayn konsaltinq onlayn fikirləşmənin bir formasıdır. Onlayn konsaltinq dedikdə həm də internet vasitəsi ilə bir və ya bir neçə spesifik mövzu ilə bağlı bir qrup insanın fikrini öyrənmək nəzərdə tutulur. Ümumiyyətlə, agentliklər layihə və ya siyasət üzərində işləyərkən və ya həyata keçirərkən hər hansı bir məsələyə dair fikirlərini almaq üçün bir qrup insanla məsləhətləşir. Bu, hökumətlərə daha çox vətəndaş mərkəzli siyasət hazırlamağa imkan verir.

İnternetin ictimaiyyət arasında rəy bildirmək üçün populyarlığı artdıqca vətəndaşların kiberməkan vasitəsilə siyasətin formalaşdırılmasında iştirakı demokratiyanın simasını dəyişir. İnternetin yüksəlişi ilə vətəndaşların elektron texnologiyalar və internet vasitəsilə siyasətdə, hökumət məsələlərində və siyasi inkişafda iştirakı mənasına gələn e-demokratiya və vətəndaşların dövlət məlumat və xidmətləri ilə onlayn təmin edilməsini ifadə edən e-hökumət anlayışları da inkişaf etmişdir.