Dauqmale (Daugmale) – Riqadan (Latviya Respublikası) 22 km cənub şərqində, Dauqava (Qərbi Dvina) çayının sol sahilində, Erkən Dəmir dövrü və orta əsrlərə aid arxeoloji abidələr kompleksi.[1]
.jpg)
1933, 1935–37, 1966–70, 1986–88-ci illərdə tədqiq olunmuşdur. Qövsvarı torpaq səddi və xəndəyi, daş döşənək üstündə qülləli darvazası olan qədim şəhər yerindən (sahəsi 0,4 ha), habelə ona bitişik posaddan (qəsəbə sahəsi 2 ha), portdan və iki torpaq məzarlıqdan ibarətdir. E.ə. 1-ci minillikdən gec olmayaraq məskunlaşmışdır. Eramızın 3-cü əsrindən etibarən istehkamlar qurulmuş, 14 dəfə yenidən tikilmişdir. Darvazadan başlanan yol porta və posada aparırdı. 10-cu əsrin sonlarından 13-cü əsrin əvvəllərinədək Dauqmale mühüm sənətkarlıq və ticarət mərkəzi kimi inkişaf etmişdi. Qazıntılar zamanı posaddan kürə qalıqları, metaltökmə qəlibləri, ərəb (9–10-cu əsrlər), Bizans (10–11-ci əsrlər) və Qərbi Avropa (11-ci əsr) sikkələri, bəzək əşyaları tapılmışdır. 9-cu əsr – 10-cu əsrin birinci yarısında Dauqmale sakinləri arasında zemqallar, 11-ci əsrdə livlər üstünlük təşkil etmişlər. Dauqmale Qərbi Avropanın erkən şəhər mərkəzlərindən biri hesab olunur. [1]
- ↑ 1 2 Dauqmale// Azərbaycan Milli Ensiklopediyası (25 cilddə). — VI cild. Bakı, 2009. — Səh.: 378.