Benediktin

1863-cü ildə Aleksandr Le Qrand dini bir fonddan əldə etdiyi köhnə dərman reseptlərindən istifadə edərək və yerli bir kimyaçının köməkliyi ilə bitki mənşəli likör resepti hazırladı. Le Qrand bu içkini satmaq üçün onun tarixi ilə bağlı bir hekayə uydurdu: guya bu içki ilk dəfə Normandiyadakı Benediktin abbatlığının rahibləri tərəfindən hazırlanmışdı və onlar içkini Fransa İnqilabı zamanı abbatlığın dağıdılmasına qədər istehsal edirmişlər. Le Qrand içkini "Bénédictine" ticarət adı altında, özünəməxsus forma və etiketi olan şüşə ilə istehsal etməyə başladı. O, içki ilə bağlı uydurduğu mifi gücləndirmək üçün etiketin üzərinə "Deo Optimo Maximo" ("ən yaxşı və ən böyük Tanrıya") ifadəsinin qısaltması olan "DOM" abreviaturasını yerləşdirdi.

Birinci Dünya müharibəsi zamanı Normandiyadakı Britaniya Ordusunun Şərqi Lankşir alayının əsgərləri səngərlərdə isinmək üçün Benediktini isti su ilə birlikdə içirdilər. Müharibədə sonra geri dönən əsgərlər Britaniyaya özləri ilə birlikdə Benediktin şüşələri də gətirdilər.^[2] Bu gün Britaniyanın Börnli şəhərində insanlar hələ də Benediktini isti su ilə birlikdə içirlər və bu qarışıq "Bene 'n' 'ot" adlanır. Şəhəri təmsil edən "Börnli" futbol klubunun ev matçlarında Benediktinin təqdim olunması ənənəyə çevrilmişdir və klub bu içkinin dünyadakı ən böyük satıcılarından biridir.^[2]

1982-ci ildə likör istehsalının yalnız 15%-i Fransada satılırdı və məhsulun 45%-i Amerika Birləşmiş Ştatlarına gedirdi.^[3]

1986-cı ildə Martini & Rossi şirkəti Benediktinin nəzarətini ələ keçirdi. 1992-ci ildə Martini & Rossi şirkəti Bacardi tərəfindən 1,4 milyard dollara satın alındı.

2010-cu ilə qədər Benediktin istehsalının təxminən 75%-i ixrac edilmiş və bu, Fransada içkinin populyarlığının əhəmiyyətli dərəcədə artmasına səbəb olmuşdur. Bu içkinin ən böyük istehlakçıları ABŞ, Malayziya və Sinqapurdur.^[4][5]

Benediktinin resepti ciddi formada qorunan ticarət sirridir və hər hansı bir dövrdə eyni anda yalnız üç nəfərə məlum olmuşdur.^[6] Bu günə qədər bu içkini o qədər çox insan istehsal etməyə çalışıb ki, şirkət öz ərazisində "Saxtalar zalı" (Salle des Contrefaçons) adlı xüsusi bir bölmə yaradıb. Bu cür saxta məhsullar Benediktinin həm şüşə və etiketini, həm də adını kiçik dəyişikliklərlə təqlid etmişdir. Şirkət əqli mülkiyyətini pozduğunu düşündüyü şəxslərə qarşı hüquqi tədbirlər görür.

İçkinin resepti sirr olsa da, onun tərkibində 27 növ ot və ədviyyat olduğu bilinir və bunlardan 21-i ictimaiyyətə məlumdur: angelica, hyssopus officinalis, ardıc, kommifora qətranı, zəfəran, myristica, şam qozası, aloe, dağlıq öküzotu, dərman ballınanəsi, çay, kəklikotu, keşniş, mixək, limon, vanil, portağal qabığı, bal, qırmızı giləmeyvələr, darçın və myristica toxumları.

• Harold J. Grossman and Harriet Lembeck, Grossman's Guide to Wines, Beers and Spirits (6th edition). Charles Scribner's Sons, New York, 1977, pp. 377–8. ISBN 0-684-15033-6ISBN 0-684-15033-6
• Jean Pierre Lantaz, Bénédictine, d'un alambic à cinq continents, éditions Bertout 1991.
• Stéphane Nappez, Le palais Bénédictine, éditions PTC 2005

1. ↑ "Dom Benedictine Dom 1510 Liqueur".
2. ↑ ^{1 2} "Ashley Barnes: Burnley's Béné 'n' hotshot". Lancashire Telegraph. 2024-11-27 tarixində arxivləşdirilib. İstifadə tarixi: 2025-01-18.
3. ↑ Minton, Robert. "The Secret Of Succession". Inc.com (ingilis). 1982-03-01. İstifadə tarixi: 2021-08-20.
4. ↑ Xavier Oriot, Benedictine: From the elixir of health to the liqueur, west-france.fr, 6 November 2010.
5. ↑ "Iconic Ingredient from Singapore Sling builds on its appeal in S E Asia". 2014. 2019-07-03 tarixində arxivləşdirilib.
6. ↑ "Benedictine". Liquor.com (ingilis). 2018-08-30 tarixində arxivləşdirilib. İstifadə tarixi: 2018-08-30.