Bəxtiyar İslamov (siyasətçi, 1995)

İslamov Bəxtiyar Qabil oğlu 1995-ci ildə Bakı şəhərində anadan olmuşdur.^[3] 2001–2012-ci illərdə Bakı şəhəri Nəsimi rayonu 42 saylı tam orta məktəbdə təhsil alıb. 2012–2017-ci illərdə ADA Universitetinin Biznesin idarə edilməsi ixtisasında bakalavr təhsili alıb. 2014-cü ildə Mübadilə Proqramı ilə Macarıstanın Budapeşt şəhərində, Corvinus Universitetində təhsil alıb. 2018–2020-ci illərdə Azərbaycan Respublikasının Təhsil Nazirliyinin xətti ilə Hökümətlərarası Təqaüd Proqramı ilə Çin Xalq Respublikasının Pekin şəhərində, Beynəlxalq Biznes və İqtisadiyyat Universitetinin Beynəlxalq İdarəetmə ixtisası üzrə magistr təhsili alıb. 2019-cu ildə Koreya Respublikasının Seul şəhərində, Koreya Universitetində Rəqəmsal İnnovasiyalar üzrə ixtisas kursunu bitirib.^[4]

2014-cü ildə Azərbaycan Respublikasının Xarici İşlər Nazirliyinin İqtisadi əməkdaşlıq və inkişaf idarəsində təcrübə keçib. 2015-ci ildə Bakı 2015 1-ci Avropa Oyunları Əməliyyat Komitəsində Tədbir Xidmətləri meneceri vəzifəsində işləyib. 2016-cı ildə Uqandada (Mərkəzi Afrika) TİKA ilə əməkdaşlıq çərçivəsində həyata keçirilən "Əhalinin təmiz su ehtiyatlarına çıxışının təmin edilməsi" layihəsinin rəhbəri olmuşdur. 2016-cı ildə Gəncə şəhərində həyata keçirilən "1-ci Beynəlxalq Startap Akademiyası" layihəsinin təşkilati komitəsinin rəhbəri olmuşdur. 2016–2018-ci illərdə “ASAN Könülləri” Gənclər Təşkilatı İctimai Birliyinin sədri kimi fəaliyyət göstərib. 2017–2018-ci illərdə Azərbaycan Respublikası Prezidenti Seçkilərində Cənab Prezident İlham Əliyevin təbliğat-təşviqat proqramlarından olan "SƏNİNLƏ" proqramınının müəllifi və layihə rəhbəri olmuşdur. 2020-ci ildə Almaniya Beynəlxalq Əməkdaşlıq Cəmiyyəti (GIZ Azerbaijan) tərəfindən həyata keçirilmiş "Good Governance for Local Development in Azerbaijan" layihəsində ekspert qismində fəaliyyət göstərmişdir. 2016-cı ildən “ASAN Könülləri” Gənclər Təşkilatı İctimai Birliyinin idarə heyətinin üzvüdür. 2019-cu ilin iyun ayından Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin Elektron hökumət və rəqəmsalar innovasiyalar şöbəsində çalışır. 2019-cu ilin iyul ayından YUNESKO-nun "İnformasiya hamı üçün" Proqramının Milli Komitəsinin üzvüdür. Azərbaycan Respublikası Prezidentinin 27 fevral 2020-ci il tarixli sərəncamı ilə təsdiq edilmiş "Açıq Hökumətin Təşviqinə dair 2020–2022-ci illər üçün Milli Fəaliyyət Planı"nın tərkib hissəsi olaraq təsis edilmiş "Ağıllı Şəhər Konsepti" üzrə yaradılmış işçi qrupunun üzvüdür. 2021-ci ilin 11 mart tarixində Yeni Azərbaycan Partiyasının sədri, Prezident İlham Əliyevin təqdimatı əsasında YAP Gənclər Birliyinin sədri təyin olunmuşdur^[5]. Azərbaycan Dövlət İqtisad Universitetinin müəllimidir.^[6]

2018-ci ildə gənclər siyasəti sahəsindəki uğurlu fəaliyyətinə görə Azərbaycan Respublikasının Gənclər və İdman Nazirliyi tərəfindən təltif olunmuşdur.