Bu səhifədə iş davam etməkdədir. |
Azərbaycan Dövlət Gənclər Teatrı — Bakı şəhərində fəaliyyət göstərmiş teatr. Teatr 1989-cu ildə Əməkdar incəsənət xadimi və rejissor Hüseynağa Atakişiyev tərəfindən yaradılmışdır. 1993-cü ildə teatra dövlət statusu verilmişdir. Azərbaycan Respublikası Nazirlər Kabinetinin 19 mart 2009-cu il tarixli 41 nömrəli qərarına əsasən teatr Azərbaycan Dövlət Milli Gənc Tamaşaçılar Teatrına birləşdirilmişdir.
Azərbaycan Dövlət Gənclər Teatrı rejissor Hüseynağa Atakişiyev tərəfindən yaradılmış və ilkin olaraq Gənclər Teatrı adı ilə fəaliyyətə başlamışdır. Teatr fəaliyyətə 27 mart 1989-cu ildə Yusif Səmədoğlunun "Qətl günü" romanı əsasında səhnələşdirilmiş eyniadlı tamaşa ilə başlamışdır.
Teatrın yaradılması Azərbaycan Teatr Xadimləri İttifaqı və Respublika Gənclər İttifaqının dəstəyi ilə həyata keçirilmişdir. 1993-cü ildə teatra dövlət statusu verilmişdir.
2009-cu ildə Azərbaycan Respublikası Nazirlər Kabinetinin qərarı ilə Azərbaycan Dövlət Gənclər Teatrı və Bakı Kamera Teatrı əsaslı təmirdən çıxmış Azərbaycan Dövlət Milli Gənc Tamaşaçılar Teatrına birləşdirilmiş və müstəqil fəaliyyətini dayandırmışdır.
Teatrın bədii rəhbəri Hüseynağa Atakişiyev teatrın yaradılma konsepsiyasını belə izah edirdi:
 |
“Bütün Qərb teatrı Şərqə doğru gedir. Biz niyə Qərbə doğru gedək. Bütün Qərb indi Yapon teatrı, Çin teatrı, Hindistan teatrı üzərində öz teatrlarını qururlar. Biz isə nədənsə rus teatrından, onların realist ənənələrindən yapışıb əl çəkmirik. Biz öz kökümüzə qayıtmalıyıq.” |
 |
Teatr fəaliyyətə milli əsərlə — Yusif Səmədoğlunun "Qətl günü" əsəri ilə başlamışdır. Sonrakı illərdə kollektiv Rafiq Səməndərin Qara Yanvar hadisələrinə həsr olunmuş "Şəhidlər" əsərini səhnələşdirmişdir.
Teatr yarandığı gündən milli dramaturgiyanın inkişafına xüsusi diqqət yetirmişdir. Yusif Səmədoğlu, Vaqif Səmədoğlu, Əli Əmirli, Firuz Mustafa, Rəhman Əlizadə, Elçin Hüseynbəyli və digər dramaturqların əsərləri teatrın repertuarında mühüm yer tutmuşdur.
Müstəqillik illərində teatrın repertuarında olan bəzi əsərlər sonradan digər teatrların səhnələrində də tamaşaya qoyulmuşdur. Bunlara Kamal Abdullanın "Şah və şair və yaxud hamı səni sevənlər burdadı", Vaqif Səmədoğlunun "Generalın son əmri", Əli Əmirlinin "Varlı qadın" kimi əsərlərini misal göstərmək olar.
Teatrın repertuarında tarixi-qəhrəmanlıq, sosial-ictimai, ailə-məişət və məhəbbət mövzulu tamaşalar yer almışdır. Truppa "Vicdan hökmü", "Neron oynayır və ya İblisin komediyaları", "Sərgüzəşti-vəziri-xani-Lənkəran", "Aydın", "Yeddi məhbusə", "Onun iki qabırğası", "Dodaqdan qəlbə" və digər tamaşalarla çıxış etmişdir.
Teatr həmçinin dünya dramaturgiyasının nümunələrini də səhnələşdirmişdir. Uilyam Şekspirin "Hamlet", "Maqbet", "Yay gecəsində yuxu", Samuel Bekketin "Qodonu gözləyərkən", Prosper Merimenin "Karmen" və digər əsərləri tamaşaçılara təqdim edilmişdir.
Absurd teatrının yaradıcılarından olan Samuel Bekketin yaradıcılığına Azərbaycanda ilk dəfə məhz Dövlət Gənclər Teatrı müraciət etmişdir. Teatr 1989-cu ildə dramaturqun "Qodonu gözləyərkən" pyesini rejissor Əliyar Əliyevin quruluşunda səhnəyə qoymuşdur.
Teatrın repertuarına daxil edilən tamaşalardan biri də Bəxtiyar Vahabzadənin "Atamın kitabı" əsəri olmuşdur. Tamaşanın dramaturji strukturu Cəlil Məmmədquluzadənin "Anamın kitabı" pyesindən ilhamlanmışdır.
Hüseynağa Atakişiyev 2006-cı ildə vəfat etdikdən sonra teatrın fəaliyyətinə bir müddət Rəhman Əlizadə rəhbərlik etmişdir.
Teatr fəaliyyət göstərdiyi təxminən 20 il ərzində 100-dən çox səhnə əsərini tamaşaçılara təqdim etmişdir.
Teatrın aktyor heyətində aşağıdakı sənətkarlar fəaliyyət göstərmişdir: