Algorithms Unlocked — amerikalı kompüter alimi Tomas H. Kormen tərəfindən yazılmış, kompüter alqoritmlərinin əsas prinsiplərini və tətbiq sahələrini izah edən elmi-populyar kitabdır. Kitab texniki hazırlığı olmayan oxucular üçün nəzərdə tutulmuşdur və alqoritmlərin gündəlik həyatda istifadə olunan texnologiyaların əsasını necə təşkil etdiyini sadə və anlaşılan dildə təqdim edir. Kitabın orijinalı MIT Press [2] tərəfindən çap edilmişdir.
| Alqoritmlərin Sirri | |
|---|---|
| ing. Algorithms Unlocked | |
| Müəllif | Tomas H. Kormen |
| Janr | Elmi-kütləvi ədəbiyyat |
| Orijinalın dili | ingilis |
| Orijinalın nəşr ili | 2013 |
| Tərcüməçi | Adil Əliyev |
| Nəşriyyat | Altun Kitab,[1] MIT Press[2] |
| ISBN-13 | 978-9952-24-510-3 |
Kitab on fəsildən ibarətdir və axtarış və çeşidləmə alqoritmləri, əsas qraf alqoritmləri, mətnlərin emalı, kriptoqrafiyanın və məlumatların sıxılmasının fundamental anlayışları, eləcə də hesablama nəzəriyyəsinə giriş kimi mövzuları əhatə edir. Müəllif alqoritmləri problemlərin həlli üçün istifadə olunan addım-addım prosedurlar kimi təqdim edərək, oxucuların texnologiyaya "qara qutu" kimi deyil, daxili mexanizmləri anlaşılan sistem kimi baxmasına imkan yaradır.
Əsərdə kompüterlərin məlumatları necə axtardığı və təşkil etdiyi, xəritələr və sosial şəbəkələr kimi strukturların necə analiz olunduğu, mətnlərin və məlumat axınlarının hansı üsullarla emal edildiyi izah edilir. Bundan əlavə, kitabda real həyatda mühüm əhəmiyyət daşıyan məlumat təhlükəsizliyi, şifrələmə mexanizmləri və məlumatların sıxılması kimi mövzulara da toxunulur. Müəllif bəzi hesablama problemlərinin hətta müasir, yüksək hesablama gücünə malik kompüterlər üçün belə praktiki baxımdan həllinin mümkün olmadığını göstərərək hesablama məhdudiyyətləri anlayışını təqdim edir.
Algorithms Unlocked tələbələr, müəllimlər, mütəxəssislər və ümumilikdə alqoritmlərin müasir rəqəmsal texnologiyalardakı rolunu başa düşmək istəyən oxucular üçün nəzərdə tutulmuşdur. Kitab dərin riyazi və proqramlaşdırma biliyi tələb etmədən alqoritmik düşüncənin əsaslarını izah etməyi hədəfləyir və kompüter elminin fundamental anlayışlarına giriş xarakteri daşıyır.
Kitab 2022-ci ildə Azərbaycan dilində "Alqoritmlərin Sirri" adı ilə çap olunmuşdur. Kitabın tərcüməçisi tanınmış proqramçı Adil Əliyev,[3] elmi redaktoru isə İbrahim Nəbioğludur.[4] Kitab Altun Kitab nəşriyyatında [1] çap olunmuşdur. Tərcümə edildikdən sonra bir sıra ali məktəblərdə dərslik kimi istifadə edilməyə başlamışdır. Kitabın müzakirə günləri keçirilmişdir.[5]
- ↑ 1 2 "Alqoritmlərin sirri". İstifadə tarixi: 29 dekabr 2025.
- ↑ 1 2 "Algorithms Unlocked". MIT Press. İstifadə tarixi: 9 dekabr 2024.
- ↑ "Dünyanın tanınmış şirkətlərində proqram mühəndisi çalışan həmvətənimiz Azərbaycanda yeni layihələr reallaşdıracaq – MÜSAHİBƏ".
- ↑ "Dünya şöhrətli amerikalı alimin kitabı AZƏRBAYCAN DİLİNƏ tərcümə edildi".
- ↑ "UNEC-də "Alqoritmlərin sirri" kitabı müzakirə olunub". İstifadə tarixi: 29 dekabr 2025.