Abdulrəşid Sadulayev

2017-ci il Dünya Çempionatında əvvəl Abdulrəşid Sadulayev, 12–14 iyunda Rusiyanın Nazran şəhərində baş tutan Rusiya Çempionatında mübarizə apardı. 2014 və 2015-ci illərdə baş tutan Rusiya Çempionatlarının qalibi olan Sadulayev, 1/16 final mərhələsində Yuri Belonovsini, 1/8 final mərhələsində Dağıstan nümayəndəsi Umar Kudliyevi, 1/4 final mərhələsində güləşçisi Stanislav Hacıyevi, 1/2 final mərhələsində isə Çeçenistan nümayəndəsi Tamerlan Rasuyevi məğlub etdi və üçüncü dəfə Rusiya Çempionatının final görüşünə vəsiqə qazandı. Final görüşündə isə Abdulrəşid Sadulayev, Şimali Osetiya nümayəndəsi Vladislav Baytçayev ilə üz-üzə gəldi. Gərgin idman mübarizəsi şəraitində baş tutan görüşdə Sadulayev, 8:7 hesabı ilə qalib gəldi. Bununla da Sadulayev üçüncü dəfə Rusiya Çempionatının qızıl medalına sahib oldu.

Abdulrəşid Sadulayev 2017-ci ilin əsas yarışına 20–26 avqustda Fransanın Paris şəhərində baş tutan Dünya Çempionatı çərçivəsində qatıldı. 2013-cü ilin noyabr ayından bütün görüşlərində qalib gələn Sadulayev, bu uğurlu seriyanın davam etməsi niyyətində idi və üçüncü dəfə qatıldığı Dünya Çempionatının qalibi olmadığı hədəfləyirdi. O, 1/16 final mərhələsində Kuba nümayəndəsi Reineris Salas ilə üz-üzə gəldi və həmin görüşdə 4:0 hesabı ilə qalib gəldi. Daha sonra Sadulayev, Polşa güləşçisi Mateusz Filipçza ilə qarşılaşdı və 4 dəqiqə 10 saniyə ərzində 14:0 hesabı ilə qalib gəldi. 1/4 final mərhələsində isə o, Gürcüstan nümayəndəsi Elizbar Odihadze ilə üz-üzə gəldi və həmin görüşdə də 10:0 hesabı ilə qalib gəldi. Bununla da Sadulayev, Dünya Çempionatının 1/2 final mərhələsinə adladı. Bu mərhələdə o, 2008-ci il Olimpiadasının bürünc medalçısı olan Ermənistan güləşçisi Georgi Ketoyev ilə qarşılaşdı və 2:0 hesabı ilə qalib gəldi. Bu minvalla da Abdulrəşid Sadulayev üçüncü dəfə Dünya Çempionatının final görüşünə vəsiqə qazandı. Final görüşündə o, 2016-cı il Rio-de-Janeyro Olimpiadasının qalibi olan ABŞ nümayəbdəsi Kyle Snyder ilə üz-üzə gəldi. Final görüşü gərgin idman mübarizəsi şəraitində baş tutdu və gözlənilmədən Abdulrəşid Sadulayev 5:6 hesabı ilə məğlub oldu. Bununlada o, Dünya Çempionatının gümüş medalına sahib oldu. 2013-cü ilin noyabr ayından bütün görüşlərində qalib gələn Abdulrəşid Sadulayevin 61 görüş davam edən məğlubiyyətsiz görüşlər seriyası başa çatdı.

•   "Dostluq" ordeni — 2016-cı ildə Braziliyanın Rio-de-Janeyro şəhərinin ev sahibliyində baş tutan XXXI Yay Olimpiya Oyunlarında qazandığı uğura görə Rusiya Federasiyası Prezidenti Vladimir Putinin 25 avqust 2016-cı il tarixli Sərəncamı ilə təltif edildi.
•   "Dağıstan qarşısında xidmətlərinə görə" ordeni — 2016-cı ildə Braziliyanın Rio-de-Janeyro şəhərinin ev sahibliyində baş tutan XXXI Yay Olimpiya Oyunlarında qazandığı uğura görə Dağıstanın başçısı Ramazan Abdulatipovun 26 avqust 2016-cı il tarixli Sərəncamı ilə təltif edildi.
•   "Dağıstan qarşısında xidmətlərinə görə" ordeni — 2019-cu ildə Qazaxıstanın Nur-Sultan şəhərinin ev sahibliyində baş tutan Dünya Çempionatında qazandığı uğura görə Dağıstanın başçısı Vladimir Vasilyevin 24 sentyabr 2019-cu il tarixli Sərəncamı ilə təltif edildi.