Əjdahanı necə ram etməli

Şimal dənizinin soyuq sularının əhatə etdiyi qədim Vikinq məskəni Berk adasında baş verən bu əhvalat, əslində iki fərqli dünyanın toqquşması və sonradan möhtəşəm bir dostluğa çevrilməsinin hekayəsidir. Adanın ən hörmətli adamı, kənd başçısı Böyük Stoikin oğlu, gənc Hıçqırıq uşaqlıqdan fərqli olub - nə güclü əzələləri, nə də vikinq döyüşçüsünə xas olan fiziki görkəmi var. Əvəzində texnikaya, ixtiraçılığa hədsiz marağı və iti zəkası ilə seçilir. Atası həmişə arzulayıb ki, oğlu da onun kimi əzəmətli bir döyüşçü olsun, amma Hıçqırığın arıq cüssəsi və tez-tez etdiyi səhvlər atasını daim məyus edir. Berk adasının ən böyük problemi isə əjdahaların tez-tez edilən basqınlarıdır. Hər basqında mal-qara oğurlanır, evlər dağıdılır. Buna görə də adada yaşayan hər bir vikinq uşaqlıqdan əjdaha öldürməyi öyrənir, bu onların həyat tərzinə çevrilib. Amma Hıçqırıq fərqli düşünür. O inanır ki, problemi başqa cür həll etmək olar. Atası və kəndin digər sakinləri onun döyüşə getməsinə qarşı olsalar da, o öz düzəltdiyi silahla gizlicə əjdaha ovuna çıxır. Bir gün tale ona gözlənilməz bir fürsət verir - öz icad etdiyi silahla əfsanəvi Gecə Qəzəbi əjdahasını vurmağı bacarır. Bu əjdaha növü ən təhlükəli, ən güclü və ən nadir növlərdən sayılır. Amma Hıçqırıq əjdahanı öldürmək üçün bıçağı qaldıranda vicdanı buna imkan vermir. Yaralı əjdahaya yazığı gəlir və beləcə, vikinqlərin tarixində görünməmiş bir hadisə baş verir - bir vikinq əjdaha ilə dostluq edir. Hıçqırıq əjdahaya Dişsiz adını verir və gizlicə hər gün ona baş çəkir, yemək gətirir, yarasını sağaldır. Günlər keçdikcə aralarında elə bir səmimi münasibət yaranır ki. Hıçqırıq getdikcə başa düşür ki, əjdahalar əslində qəddar, qaniçən məxluqlar deyil, onlar da hisslərə, düşüncəyə malik olan canlılardır. Dişsizlə keçirdiyi hər gün ona göstərir ki, vikinqlərin əjdahalar haqqında bildikləri, demək olar ki, tamamilə yanlışdır.