DreamWorks Animation LLC — "Universal Pictures"ın bölməsi olan "NBCUniversal"ın (özü də Comcast-ın törəmə şirkətidir) nəzdində fəaliyyət göstərən ABŞ animasiya studiyası. Studiya indiyədək 50 tammetrajlı film ərsəyə gətirib, bunların arasında dünya animasiya tarixində ən yüksək gəlir gətirən layihələr mövcuddur – misal üçün, 2004-cü ildə ekranlara çıxan "Şrek 2" filmi öz dövrü üçün rekord göstəricilər nümayiş etdirib. Studiyanın ilk istehsalı olan "Qarışqa Z" filmi 1998-ci il oktyabrın 2-də təqdim olunub, ən son ekran əsəri isə 2025-ci il yanvarın 31-də nümayiş etdirilən "Dog Man" filmidir. "DreamWorks"un gələcək planlarına "Əjdahanı necə ram etməli" filminin canlı versiyası (13 iyun 2025), "Pis oğlanlar 2" (1 avqust 2025), "Qebbinin kukla evi: Film" (26 sentyabr 2025) və "Şrek 5" (23 dekabr 2026) daxildir. Bundan əlavə, studiyanın 2026-cı il sentyabrın 25-i və 2028-ci il sentyabrın 22-si üçün hələlik adı açıqlanmayan iki layihəsi də vardır.
| DreamWorks Animation LLC | |
|---|---|
| DreamWorks Animation LLC | |
.png) | |
 | |
| Ümumi məlumatlar | |
| Sənaye | Animasiya filmi |
| Məhsulu | animasiya filmi[d] |
| Təsis tarixi | 12 oktyabr 1994 |
| Varis | Universal Pictures |
| Baş qərargahın yeri | Qlendeyl, Kaliforniya, ABŞ |
| Struktur | |
| İşçi sayı | 1,400 (2022) |
| Bölmələr |
DreamWorks Animation Television DreamWorks Channel |
| Ana şirkət | Universal Pictures (2016-dan etibarən) |
| Tərəfdaşlar | Pacific Data Images[d] |
| Rəhbərlik | |
| Təsisçilər |
Stiven Spilberq Ceffri Katzenberq Devid Geffen |
| dreamworksanimation.com | |
 Vikianbarda əlaqəli mediafayllar | |
"DreamWorks Pictures" şirkətinin tərkibində 1994-cü ildə qurulan studiya "Amblin Entertainment" şirkətinin keçmiş animasiya bölməsi "Amblimation"ın təcrübəli kadrları tərəfindən yaradılıb. 2004-cü ildə müstəqil şirkətə çevrilən "DreamWorks Animation", 2016-cı ildə "NBCUniversal" tərəfindən 3.8 milyard dollar müqabilində satın alınıb. İlk illərində ənənəvi animasiya filmlərinin istehsalı ilə məşğul olan və "Aardman Animations" ilə birgə üç "stop-motion" layihəsi hazırlayan studiya, hazırda yalnız kompüter animasiyası üzərində ixtisaslaşıb. Buna baxmayaraq, 2022-ci ildə studiyanın prezidenti Margie Cohn ənənəvi animasiyaya qayıdış imkanlarını istisna etmədiklərini bildirib. Studiya öz tarixində "Misir şahzadəsi", "Uolles və Qromit: Qurd-dovşan lənəti" kimi əsərlərlə yanaşı, "Şrek", "Madaqaskar", "Kunq-fu Panda", "Əjdahanı necə ram etməli" və "Trollar" kimi məşhur film silsilələri ilə tamaşaçıların rəğbətini qazanmışdır. Bu əsərlər üç "Oskar" mükafatı, qırx bir "Emmi" mükafatı, çoxsaylı "Enni" mükafatları başda olmaqla, "Qızıl Qlobus" və BAFTA kimi nüfuzlu film mükafatlarına namizəd göstərilmişdir.
"DreamWorks Animation" şirkətinin istehsal etdiyi filmlər ilkin mərhələdə 2005-ci ilədək "DreamWorks Pictures" tərəfindən nümayiş olunub. Növbəti mərhələdə 2006-2012-ci illər ərzində "Paramount Pictures" şirkəti ekran əsərlərinin yayımını öz üzərinə götürüb. 2013-2017-ci illər aralığında isə hazırda "20th Century Studios" adı altında fəaliyyət göstərən "20th Century Fox" şirkəti bu funksiyanı yerinə yetirib. 2019-cu ildən etibarən "DreamWorks Animation"ın əksər filmləri "Universal Pictures" vasitəsilə tamaşaçılara təqdim edilir, üstəlik şirkətin əvvəlki film arxivinin əhəmiyyətli hissəsinə də məhz "Universal Pictures" sahiblik edir.