Azərbaycanda yayılmış bu ifadə təhqiredici xarakter daşıyır. Bu, adətən hədə-qorxu gəlmək və rüşvət almaq ilə məşğul olan, qeyri-peşəkar hesab edilən reket jurnalistlər üçün istifadə edilir. "İctimai TV"də yayımlanan "İTV Xəbər"in 2021-ci il iyulunda təqdim olunan buraxılışında reket jurnalistikadan bəhs edilərkən həmin sahədə fəaliyyət göstərən jurnalistlər "zurnalist" kimi təqdim olunmuş, onlara dövlət tərəfindən məhdudiyyətlərin qoyulması fikri müdafiə olunmuşdur.

Buna baxmayaraq, bu ifadədən kimə qarşı istifadə edilməsi ideoloji olaraq dəyişir. Siyasi mövqeyindən asılı olaraq, bu ifadə həm milliyətçi və vətənpərvər ideologiyasında çıxış etməyən jurnalistlərə,liberal jurnalistlərə, həm də hökumətmeylli jurnalistlərə qarşı istifadə olunur. Məsələn, hökumətdən ev alan jurnalistlər ictimaiyyətdə bəzən "zurnalist" adlandırılmışdır. Bu ifadədən həmçinin, Azərbaycanda mətbuatın vəziyyətini təsvir edərkən istifadə olunmuşdur. "XəzərNews" əməkdaşı Elmar Hüseynovun fikrinə görə, Azərbaycanda önə çıxmış jurnalistlər keçmiş jurnalistləri üstələmiş, mətbuat nüfuzdan düşmüşdür.Azərbaycan Milli Məclisinin deputatı Aqil Abbasa görə, ictimaiyyətdə Babək Hüseynoğlu, Elçin Şıxlı, Rauf Arifoğlu və Rəşad Məcid kimi "müstəqil media" quran şəxsləri "zurnalist" adlandırırlar.

"Modern Doctors of Azerbaijan" qrupunda bir qrup həkim 2015-ci ildə döyülən, daha sonra isə xəstəxanada dünyasını dəyişən jurnalist Rasim Əliyevin ölümünə görə sosial şəbəkələrdə həkimləri tənqid edən jurnalistlər haqqında "zurnalist" ifadəsini işlətmişdir.AXCP-dən Dilarə Miriyeva Qarabağ münaqişəsi zamanı həlak olmuş bəzi jurnalistləri "zurnalist" adlandırmış, bu, YAP Nizami rayon təşkilatının sədri Ramil Vəlibəyov tərəfindən tənqid edilmişdir. Azərbaycanlı şair Təranə Şəms jurnalistləri tənqid edərək "Gəl adam ol, jurnalist" şeirində "zurnalist" sözündən dəfələrlə istifadə etmişdir.

• Çurnalistika