Bədənin üst tərəfinin ümumi rəngi qonur – boz noxudu, qaramtıl – qonur çilli, alt tərəfi isə paslı – sarımtıl qəhvəyidir. Quyruğu intensiv şabalıdı – paslıdır. Alçaq və sərt tük örtüyü müxtəlif mövsümlərdə rəngini dəyişmir. Qulaqları nisbətən gödək olub zirvəsində adi sincablar üçün çox səciyyəvi olan fırçaları yoxdur. Zaqafqaziya sincabının kəsici dişləri bir qədər qısa və zəif olub üst çənəsində cəmi 1 yalançı kök dişi olur. Zaqafqaziya sincabında 10 əmzik olur.

Ağaclarda yaşamağa uyğunlaşmış bu heyvanlar respublikada bir – birindən ayrı iki regionda rast gəlinir: cənub yamaclarındakı dağ meşələrində və Alazan – Əyriçay vadisinin aran meşələrində və Kiçik Qafqazın dağ meşələrində . Həyat tərzinə görə sincab gündüz heyvanlarına aiddir. Sincablar öz yaşayış yerlərini koğuşlarda düzəldirlər. Koğuş olmadıqda gövdə haçalarında yarpaqlardan və budaqlardan sığınacaq qururlar. Toxum, qoz, fındıq, şabalıd, müxtəlif meyvələr, , meşə ağacların və kolluqların cavan pöhrələri ilə qidalanır.

Sincab il ərzində 3 dəfə çoxalır. Yanvarın sonu – fevralın əvvəlində, aprelin sonunda və iyulun ortalarından avqustun sonuna qədər. Bir nəsildə 2- 4 bala olur.

Xəzinə görə az miqdarda ovlansa da xəzin keyfiyyəti aşağı olur və yüksək qiymətləndirilmir.

• Azərbaycan heyvanlar aləmi III cild, onurğalılar Bakı-<<ELm>>-2004