Zümrüd Qurbanhacıyeva 1988, 1999 və 2001-ci illərdə Rusiya Çempionatının qalibi olub.

Beynəlxalq turnirlərdə isə 1998-ci ildə Bratislava şəhərində baş tutan Avropa Çempionatını dördüncü pillənin sahibi olan Zümrüd Qurbanhacıyeva, 1999-cu ildə Poznan şəhərində (Polşa) baş tutan Dünya Çempionatını 5-ci, 2000-ci ildə Sofiya şəhərində (Bolqarıstan) baş tutan Dünya Çempionatını 6-cı, 2001-ci ildə isə növbəti dəfə Sofiya şəhərində (Bolqarıstan) baş tutan Dünya Çempionatını 8-ci pillədə başa vurub.

2004-cü ildə Azərbaycan Güləş Federasiyası (AGF) Zümrüd Qurbanhacıyevanı Azərbaycan yığmasının heyətinə dəvət elədi. Həmin illərdə Azərbaycanda qadın güləşçilərdən ibarət yığma yeni-yeni formalaşdırılırdı. Zümrüd Qurbanhacıyeva həmin dəvəti qəbul elədi və 2004-cü ildən Azərbaycan bayrağı altında beynəlxalq turnirlərdə mübarizə apardı.

2004-cü ildə Zümrüd Qurbanhacıyeva əvvəl Tunisdə baş tutan Dünya Olimpiya Təsnifat Turnirində 11-ci pillənin, sonra isə İspaniyada baş tutan Dünya Olimpiya Təsnifat Turnirində 4-cü pillənin sahibi oldu və nəticələrə əsasən Afina Olimpiadasını lisenziya qazana bilmədi.

Daha sonra Zümrüd Qurbanhacıyeva 2007-ci ildə Azərbaycanda baş tutan Dünya Çempionatını 24-cü pillədə, 2008-ci ildə Finlandiyada baş tutan Avropa Çempionatını isə 7-ci pillədə başa vurdu. Həmçinin Zümrüd Qurbanhacıyeva 2008-ci ilin mayında İsveçdə baş tutan Dünya Olimpiya Təsnifat Turnirini yeddinci pillədə başa vurdu və nəticədə olimpiya lisenziyasına sahib ola bilmədi.

2009-cu ilin aprelində isə Zümrüd Qurbanhacıyeva Litvanın Vilnüs şəhərində baş tutan Avropa Çempionatında mübarizə apardı. Turnirin 1/8 final mərhələsində Almaniya nümayəndəsi Mariya Selmayera 2:0, 1/4 final mərhələsində İspaniya nümayəndəsi Aurora Fajardo Prietoya 2:1, 1/2 final mərhələsində isə Bolqarıstan nümayəndəsi Ralitza İvanovaya 2:0 hesabı ilə qalib gələn Zümrüd Qurbanhacıyeva Avropa Çempionatının final görüşünə vəsiqə qazandı. Həlledici görüşdə onun rəqibi Katerina Burmistrova oldu. Gərgin idman mübarizəsi şəraitində baş tutan görüşdə Zümrüd Qurbanhacıyeva rəqibinə 1:2 hesabı ilə məğlub oldu və Avropa Çempionatını gümüş medalla başa vurdu.

Daha sonra iyulda Qızıl Qran-Pri beynəlxalq turnirinin qalibi olan Zümrüd Qurbanhacıyeva, sentyabrda Dünya Çempionatını 8-ci pillədə başa vurdu.

2010-cu ildə isə Austrian Ladies Open beynəlxalq turnirinin qalibi olan Zümrüd Qurbanhacıyeva, Qızıl Qran-Pri beynəlxalq turnirini beşinci, Dünya Çempionatını isə 18-ci pillədə başa vurdu.

Daha sonra Zümrüd Qurbanhacıyeva 2011-ci ildə Qızıl Qran-Pri beynəlxalq turnirinin bürünc medalına sahib oldu. Bir il sonra Yaşar Doğu beynəlxalq turnirini dördüncü, Hindistan Qran-Prisini isə beşinci pillədə başa vuran Zümrüd Qurbanhacıyeva 2012-ci ilin mayında idmanla vidalaşdı.