Yaşar 24 dekabr 1960-cı ildə Mingəçevir şəhərində anadan olub. 3 nömrəli Mingəçevir şəhər orta məktəbini bitirdikdən sonra 1977-ci ildə Azərbaycan Dövlət Bədən Tərbiyəsi İnstitutuna daxil olub. Ali təsilini başa çatdırdıqdan sonra 1981-1982-ci illərdə hərbi komissarlıq tərəfindən hərbi xidmətə çağırılıb. Hərbi xidməti başa vurduqdan sonra Yaşar Mingəçevir şəhərinə qayıdır və 1983-cü ildən Mingəçəvir şəhər avarçəkmə bazasında müəllim vəzifəsində işə başlayır. Avarçəkmə üzrə idman ustası idi. İdman təşkilatında işlədiyi müddətdə yüksək idman ustalığı ilə fərqlənmişdir.

1985-ci ildə Mingəçevir şəhər 10 nömrəli məktəbə bədən tərbiyəsi müəllimi kimi işə qəbul olur və paralel olaraq həmin illərdə Komsomol partiyasının 3-cü katibi kimi də çalışır.

1986-cı ildən etibarən Yaşar Məmmədzadə Daxili İşlər Nazirliyinin cinayət axtarış şöbəsində işə qəbul olmuş və öz bacarığı sayəsində Kapitan rütbəsinə kimi yüksəlmişdi.

Yaşarın üç övladı var.

20 fevral 1988-ci ildə Erməni quldurlarının Azərbaycana basqını zamanı Yaşar könüllü olaraq Vətənin müdafiəsinə getmişdir. Bir müddət sonra Yaşarın birbaşa iştirakı və müstəsna fəaliyyətilə Mingəçəvir şəhər Tank Əlehinə Batalyonu yaradılmışdır. Yaşar bir çox Qarabağ bölgələrində - Ağdərə, Xankəndi, Ağdam, Tərtər və Xocavənd bölgələrində Tank Əlehinə Batalyon komandiri olaraq mərdliklə vuruşmuşdur.

Kapitan Yaşar Çələbi oğlu Məmmədzadə 4 yanvar 1994-cü il tarixində Xocavənd rayonunun Ceyl yüksəkliyi uğrunda gedən döyüşlərdə yüksək cəsarət göstərərək qəhrəmancasına şəhid olmuşdur.

Azərbaycan Respublikasının Prezidenti Heydər Əliyevin 16 sentyabr 1994-cü il tarixli fərmanı ilə Yaşar Çələbi oğlu Məmmədzadə ölümündən sonra "Azərbaycan Bayrağı" ordeni ilə təltif edilib. Mingəçevir şəhərində fəaliyyət göstərən futbol stadionu şəhidin adını daşıyır. Yaşar Məmmədzadə adına stadionda şəhidin büstü qoyulub.

2. (mingechevir-ih.gov.az)
4. (mi-news.az)
5.  » Teref.az