Türkdilli Vikipediyalar üzrə Beynəlxalq Konfrans 2012-ci ilin 20-21 aprel ayında Almaata şəhərində keçirildi. Konfransda Qazaxıstan, Türkiyə, Azərbaycan, Özbəkistan, Türkmənistan, Qırğızıstan, Başqırdıstan və Saxa Respublikasından vikipediyaçılar, müxtəlif təşkilatların nümayəndələri iştirak edirdilər.

Konfrans iştirakçıları arasında "Wikimedia Foundation", "Creative Commons", "Open Software Foundation", həmçinin "Google" kimi tanınmış təşkilatların və şirkətlərin nümayəndələri də iştirak edirdilər.

Azərbaycan dilində fəaliyyət göstərən Vikipediya layihəsini idarəçi İrada və fəal istifadəçilərdən olan Interfase təmsil edirdi. Konfransın ikinci günü Interfase təqdimatla çıxış etdi, Azərbaycan Vikipediyası, Azərbaycan mədəniyyəti və zəngin Azərbaycan mədəniyyətinin Vikipediyanın bütün dil bölmələrində tanıdılmasının əhəmiyyətindən danışdı.

Türkdilli xalqların viki-görüşü çox maraqlı və səmərəli keçdi. Vikipediyaçılar təcrübə mübadiləsi apardılar, Vikipediyada rastlaşdıqları problemləri müzakirə etdilər.

Konfrans Qazaxıstan Respublikasının "WikiBilim" ictimai fondu tərəfindən təşkil olunmuşdur.